BREAKING NEWSKERALALATEST

ഔദ്യോഗിക വാട്‌സാപ്പ് ഗ്രൂപ്പില്‍ ഗോഡ്‌സെയുടെ പ്രസംഗം അയച്ച എസ്‌ഐയ്ക്ക് താക്കീത്

തിരുവനന്തപുരം: കേരള പോലീസിനുള്ളില്‍ സംഘപരിവാര്‍ സാന്നിധ്യമുണ്ടെന്ന വിവാദത്തിനിടെ പോലീസിന്റെ ഔദ്യോഗിക വാട്‌സാപ്പ് ഗ്രൂപ്പില്‍ ഗോഡ്‌സെയുടെ പ്രസംഗം. ഒരു സബ് ഇന്‍സ്‌പെക്ടറാണ് ഗാന്ധി ഘാതകനായ ഗോഡ്‌സെയുടെ പ്രസംഗം ശ്രീപത്മനാഭ സ്വാമി ക്ഷേത്രത്തിലെ പോലീസ് ഉദ്യോഗസ്ഥരുട വാട്‌സാപ്പ് ഗ്രൂപ്പില്‍ പങ്കുവെച്ചത്. സംഭവത്തില്‍ എസ് ഐ രാധാകൃഷ്ണ പിള്ളയ്ക്ക് കേരള പോലീസ് താക്കീത് നല്‍കി.
ഉന്നത ഉദ്യോഗസ്ഥര്‍ അടക്കമുള്ള ഗ്രൂപ്പിനായിരുന്നു നാഥുറാം ഗോഡ്‌സെയുടെ പ്രസംഗത്തിന്റെ പരിഭാഷ ഇദ്ദേഹം പങ്കുവെച്ചത്. തുടര്‍ന്ന് ഇതേപ്പറ്റി വകുപ്പുതല അന്വേഷണവും നടത്തിയിരുന്നു. ഇതിന്റെ ഭാഗമായി പോലീസുകാരന്റെ വിശദീകരണവും തേടിയിരുന്നു. തനിക്ക് അബദ്ധം പറ്റിയതാണെന്ന് രാധാകൃഷ്ണ പിള്ള വിശദീകരണത്തില്‍ വ്യക്തമാക്കി. ഇതേത്തുടര്‍ന്നായിരുന്നു അച്ചടക്ക നടപടിയായി താക്കീത് നല്‍കിയത്.
കേരള പോലീസിനുള്ളില്‍ ആര്‍എസ്എസ് ഗ്യാങ്ങുകളുണ്ടെന്ന സി പി ഐ നേതാവ് ആനി രാജയുടെ വിവാദപരാമര്‍ശത്തിനു പിന്നാലെയാണ് സംഭവം എന്നത് ശ്രദ്ധേയമാണ്. സ്ത്രീസുരക്ഷയുമായി ബന്ധപ്പെട്ട് സര്‍ക്കാര്‍ സ്വീകരിക്കുന്ന നയത്തിനെതിരെയാണ് പോലീസ് പ്രവര്‍ത്തിക്കുന്നതെന്നും ഇത് ദേശീയ തലത്തില്‍ തന്നെ നാണക്കേടിന് ഇടയാക്കുകയാണെന്നുമായിരുന്നു സിപിഐ നേതാവ് ആനി രാജയുടെ പ്രസ്താവന. സര്‍ക്കാര്‍ നയം അട്ടിമറിയ്ക്കാന്‍ പോലീസ് സേനയില്‍ നിന്ന് ബോധപൂര്‍വമായ ശ്രമം ഉണ്ടാകുന്നുണ്ടെന്നും പോലീസില്‍ ആര്‍എസ്എസ് ഗ്യാങ് പ്രവര്‍ത്തിക്കുന്നതായി സംശയിക്കുന്നുണ്ടെന്നും അവര്‍ പറഞ്ഞു. ആനി രാജയുടെ പ്രസ്താവനയെ പിന്തുണച്ച് ഡി രാജയും രംഗത്തെത്തിയിരുന്നു.
പോലീസിന്റെ അനാസ്ഥ മൂലം മരണങ്ങള്‍ പോലുമുണ്ടായെന്ന് അവര്‍ വിമര്‍ശിച്ചു. എല്‍ഡിഎഫ് സര്‍ക്കാരിന്റെ കാലത്ത് കുട്ടികള്‍ക്കും സ്ത്രീകള്‍ക്കും എതിരായ അതിക്രമങ്ങള്‍ തടയാനുള്ള നടപടികള്‍ സ്വീകരിക്കുന്നതിനിടെ സര്‍ക്കാരിന്റെ പ്രതിച്ഛായയ്ക്ക് മങ്ങലേല്‍പ്പിക്കുന്ന സംഭവങ്ങളാണ് കേരള പോലീസിന്റെ ഭാഗത്തു നിന്നുണ്ടാകുന്നതെന്ന് ആനി രാജ പറഞ്ഞു. തുടര്‍ഭരണം കിട്ടിയതിനു ശേഷം കേരള പോലീസിലെ ഈ അജണ്ട ശക്തിപ്പെട്ടിരിക്കുകയാണെന്നും അവര്‍ കുറ്റപ്പെടുത്തിയിരുന്നു.
അതേസമയം, ആനി രാജയെയും ഡി രാജയെയും തള്ളുന്നതാണ് സിപിഐയുടെ ഔദ്യോഗിക നിലപാട്. ആനി രാജയെ ഡി രാജ ന്യായീകരിച്ചത് ശരിയായില്ലെന്ന് സിപിഐ വിമര്‍ശിച്ചു. സി പി ഐ സംസ്ഥാന എക്‌സിക്യൂട്ടീവിലാണ് പാര്‍ട്ടി ജനറല്‍ സെക്രട്ടറി ഡി രാജയ്‌ക്കെതിരെ രൂക്ഷവിമര്‍ശനമുയര്‍ന്നത്. ദേശീയ എക്‌സിക്യൂട്ടീവ് ആനി രാജയെ പിന്തുണച്ചില്ലായിരുന്നുവെന്നും എന്നാല്‍ വാര്‍ത്താ സമ്മേളനത്തില്‍ ഡി രാജ അവരെ ന്യായീകരിക്കുകയായിരുന്നുവെന്നുമാണ് വിമര്‍ശം. തുടര്‍ന്ന് ഔദ്യോഗികമായി വിജോയിപ്പറിയിക്കാന്‍ ബിനോയ് വിശ്വത്തെ ചുമതലപ്പെടുത്തുകയായിരുന്നു.
പാര്‍ട്ടിയ്ക്കുള്ളില്‍ നിന്നും വിമര്‍ശനം ഉയര്‍ന്നിട്ടും ആനി രാജ നിലപാട് തിരുത്തിയിട്ടില്ല. സംസ്ഥാനത്ത് സ്ത്രീകള്‍ക്കെതിരെ നടക്കുന്ന അതിക്രമങ്ങളുടെ സാഹചര്യത്തിലാണ് പ്രസ്താവന നടത്തിയതെന്നാണ് ആനി രാജയുടെ വിമര്‍ശനം.

Related Articles

Back to top button

Adblock Detected

Please consider supporting us by disabling your ad blocker