ഹേമാ കമ്മിറ്റി റിപ്പോര്‍ട്ടുമായി ബന്ധപ്പെട്ട വെളിപ്പെടുത്തലുകളില്‍ പ്രതികരണവുമായി നടിയും ബി.ജെ.പി നേതാവുമായ ഖുശ്ബു സുന്ദര്‍. സ്വന്തം നിലപാടില്‍ ഉറച്ചുനില്‍ക്കുകയും വിജയിക്കുകയും ചെയ്ത സ്ത്രീകള്‍ക്ക് അഭിനന്ദനങ്ങളര്‍പ്പിക്കുന്നുവെന്ന് അവര്‍ എക്‌സില്‍ പോസ്റ്റ് ചെയ്ത കുറിപ്പില്‍ പറഞ്ഞു. സിനിമാരം?ഗത്തെ ദുരുപയോ?ഗം തകര്‍ക്കാന്‍ ഹേമാ കമ്മിറ്റി ആവശ്യമായിരുന്നു. കരിയറിലെ ഉയര്‍ച്ച വാഗ്ദാനം ചെയ്തുള്ള ലൈംഗിക പീഡനങ്ങളും വിട്ടുവീഴ്ച ചെയ്യാനുള്ള സമ്മര്‍ദവും എല്ലായിടത്തും ഉള്ളതാണെന്നും ഖുശ്ബു പറഞ്ഞു.
എന്തുകൊണ്ടാണ് ഒരു സ്ത്രീ ഒറ്റയ്ക്ക് ഈ പ്രതിസന്ധിയിലൂടെ കടന്നുപോകാന്‍ വിധിക്കപ്പെടുന്നത് എന്ന് ഖുശ്ബു ചോദിച്ചു. പുരുഷന്മാരും ഇത് അഭിമുഖീകരിക്കുന്നുണ്ടെങ്കിലും, അതിന്റെ ഭാരം വഹിക്കുന്നത് നേരിയ തോതിലെങ്കിലും സ്ത്രീകളാണെന്നും ഖുശ്ബു അഭിപ്രായപ്പെട്ടു.
‘എന്റെ 24-ഉം 21-ഉം വയസുള്ള പെണ്‍മക്കളുമായി ഇതേക്കുറിച്ച് സുദീര്‍ഘമായി സംസാരിച്ചിരുന്നു. അതിജീവിക്കപ്പെട്ടവരെ എന്റെ മക്കള്‍ മനസിലാക്കുകയും സഹാനുഭൂതി പ്രകടിപ്പിക്കുകയും ചെയ്തതുകണ്ട് ഞാന്‍ അദ്ഭുതപ്പെട്ടു. അവര്‍ അതിജീവിതകളെ ശക്തമായി പിന്തുണയ്ക്കുകയും ഈ ഘട്ടത്തില്‍ അവര്‍ക്കൊപ്പം നില്‍ക്കുകയും ചെയ്യുന്നു. നിങ്ങള്‍ സംസാരിക്കുന്നത് ഇന്നോ നാളെയോ ആകട്ടെ, സംസാരിക്കുക. ഉടനടി സംസാരിക്കുന്നത് അത്രയും നേരത്തെ മുറിവുകളുങ്ങാനും അന്വേഷണം കാര്യക്ഷമമാക്കാനും അത് സഹായിക്കും.
അപകീര്‍ത്തിപ്പെടുത്തുമെന്ന ഭയം, നീ എന്തിനത് ചെയ്തു? എന്തിനുവേണ്ടി ചെയ്തു? തുടങ്ങിയ ചോദ്യങ്ങളാണ് അവളെ തകര്‍ത്തു കളയുന്നത്. അതിജീവിത എനിക്കും നിങ്ങള്‍ക്കും പരിചയമില്ലാത്തയാള്‍ ആയിരിക്കും. പക്ഷേ നമ്മുടെ പിന്തുണ അവര്‍ക്കാവശ്യമുണ്ട്. അവരെ കേള്‍ക്കാനുള്ള മനസും നമ്മുടെ മാനസിക പിന്തുണയും അവര്‍ക്കു വേണം. പ്രതികരിക്കാനുള്ള സാഹചര്യങ്ങള്‍ എല്ലാവര്‍ക്കും ഒരുപോലെയാകില്ലെന്ന് എന്തുകൊണ്ട് നേരത്തെ പറഞ്ഞില്ല എന്നുചോദിക്കുന്നവര്‍ മനസിലാക്കണം.
ഒരു സ്ത്രീയെന്നും അമ്മയെന്നുമുള്ള നിലയില്‍, ഇത്തരം അതിക്രമങ്ങളുണ്ടാക്കുന്ന മുറിവ് ശരീരത്തെ മാത്രമല്ല ആത്മാവില്‍പ്പോലും ആഴ്ന്നിറങ്ങുന്നതാണ്. അത്തരം ക്രൂരമായ പ്രവൃത്തികള്‍ നമ്മുടെ വിശ്വാസത്തിന്റെയും സ്‌നേഹത്തിന്റെയും ശക്തിയുടെയും അടിത്തറ ഇളക്കുന്നു. എല്ലാ അമ്മമാരുടെയും പിന്നില്‍, പോഷിപ്പിക്കാനും സംരക്ഷിക്കാനുമുള്ള ഒരു ഇച്ഛാശക്തിയുണ്ട്, ആ വിശുദ്ധി തകര്‍ന്നാല്‍, അത് നമ്മെയെല്ലാം ബാധിക്കുന്നു.
എന്റെ പിതാവില്‍നിന്ന് എനിക്കുണ്ടായ ദുരനുഭവങ്ങള്‍ തുറന്നുപറയാന്‍ ഒരുപാട് കാലമെടുത്തു. അത് നേരത്തെ പറയേണ്ടതായിരുന്നുവെന്ന് സമ്മതിക്കുന്നു. എന്നാല്‍ എനിക്കുണ്ടായ ദുരനുഭവം കരിയര്‍ കെട്ടിപ്പടുക്കുന്നതിനായി വിട്ടുവീഴ്ച ചെയ്യുന്നതിനു വേണ്ടിയായിരുന്നില്ല. അങ്ങനെയൊരു അനുഭവം എനിക്ക് നേരിടേണ്ടി വന്നിരുന്നെങ്കില്‍ എന്നെ സംരക്ഷിക്കേണ്ട കൈകളുടെ ഉടമ തന്നെയാണ് എന്നെ ചൂഷണം ചെയ്തത്.
അതിജീവിക്കപ്പെട്ടവര്‍ക്കൊപ്പം നില്‍ക്കാനും അചഞ്ചലമായ പിന്തുണ കാണിക്കാനും എല്ലാ പുരുഷന്മാരോടും അഭ്യര്‍ത്ഥിക്കുന്നു. അവിശ്വസനീയമായ വേദനയും ത്യാഗവും സഹിച്ച ഒരു സ്ത്രീക്കാണ് ഓരോ പുരുഷനും ജനിച്ചത്. അമ്മമാര്‍, സഹോദരിമാര്‍, അമ്മായിമാര്‍, അധ്യാപകര്‍, സുഹൃത്തുക്കള്‍ എന്നിങ്ങനെ നിങ്ങളുടെ വളര്‍ച്ചയില്‍ പല സ്ത്രീകളും ഒഴിച്ചുകൂടാനാവാത്ത പങ്കുവഹിക്കുന്നുണ്ട്. നിങ്ങളുടെ ഐക്യദാര്‍ഢ്യം പ്രത്യാശയുടെ വിളക്കുമാടമാകും, നീതിയും ദയയും വിജയിക്കുമെന്നതിന്റെ പ്രതീകമാണ്. ഞങ്ങളോടൊപ്പം നില്‍ക്കുക, ഞങ്ങളെ സംരക്ഷിക്കുക, നിങ്ങള്‍ക്ക് ജീവിതവും സ്‌നേഹവും നല്‍കിയ സ്ത്രീകളെ ബഹുമാനിക്കുക. അക്രമത്തിനെതിരായ പോരാട്ടത്തില്‍ നിങ്ങളുടെ ശബ്ദം കേള്‍ക്കട്ടെ, നിങ്ങളുടെ പ്രവര്‍ത്തനങ്ങള്‍ ഓരോ സ്ത്രീയും അര്‍ഹിക്കുന്ന ആദരവും സഹാനുഭൂതിയും പ്രതിഫലിപ്പിക്കട്ടെ.
നമ്മള്‍ ഒരുമിച്ചാണ് കൂടുതല്‍ ശക്തരായിരിക്കുന്നത്. ഒരുമിച്ച് നിന്നാല്‍ മാത്രമേ ഈ മുറിവുകള്‍ മാറ്റാനും സുരക്ഷിതവും കൂടുതല്‍ അനുകമ്പയുള്ളതുമായ ഒരു ലോകത്തിന് വഴിയൊരുക്കാനും കഴിയൂ എന്ന് പ്രത്യേകം ഓര്‍ക്കണം. പല സ്ത്രീകള്‍ക്കും അവരുടെ കുടുംബത്തിന്റെ പിന്തുണ പോലുമില്ലെന്ന് മനസ്സിലാക്കണം. കണ്ണുകളില്‍ നക്ഷത്രങ്ങളുമായി അവര്‍ ചെറുപട്ടണങ്ങളില്‍ നിന്ന് വരുന്നു, തിളങ്ങുമെന്ന് പ്രതീക്ഷിക്കുന്നു, പക്ഷേ പലപ്പോഴും അവരുടെ സ്വപ്നങ്ങള്‍ മുളയിലേ നുള്ളുകയും തകര്‍ക്കപ്പെടുകയും ചെയ്യുന്നു.’ ഖുശ്ബു വ്യക്തമാക്കുന്നു.
ഇത് എല്ലാവര്‍ക്കും ഒരു ഉണര്‍ത്തുപാട്ടായിരിക്കണം. ചൂഷണം ഇവിടെ നിര്‍ത്തട്ടെ. സ്ത്രീകളേ, പുറത്തു വന്ന് സംസാരിക്കൂ. ഓര്‍ക്കുക, ജീവിതത്തില്‍ നിങ്ങള്‍ക്ക് എപ്പോഴും ഒരു തിരഞ്ഞെടുപ്പുണ്ട്. നിങ്ങളുടെ NO തീര്‍ച്ചയായും ഒരു NO ആണ്. നിങ്ങളുടെ അന്തസ്സും മാന്യതയും ഒരിക്കലും വിട്ടുവീഴ്ച ചെയ്യരുത്. ഇതിലൂടെ കടന്നു പോയ എല്ലാ സ്ത്രീകള്‍ക്കും ഒപ്പം അമ്മയായും സ്ത്രീയായും താന്‍ നില്‍ക്കുന്നുവെന്നും പറഞ്ഞുകൊണ്ടാണ് ഖുശ്ബു കുറിപ്പ് നിര്‍ത്തുന്നത്.
