കണ്ണൂര്‍: വളപട്ടണം മന്നയിലെ അരി മൊത്ത വ്യാപാരി കെ.പി അഷ്റഫിന്റെ വീട്ടില്‍ നിന്ന് 300 പവന്‍ സ്വര്‍ണവും ഒരു കോടി രൂപയും കവര്‍ന്നുവെന്ന വാര്‍ത്ത കേട്ട് ആദ്യം സങ്കടപ്പെടുകയായിരുന്നു അയല്‍ക്കാരന്‍ കൂടിയായ പ്രതി ലിജീഷ്. സ്വാഭാവിക നടപടിയുടെ ഭാഗമായി പോലീസ് മൊഴിയെടുക്കാന്‍ വിളിച്ചപ്പോള്‍ ഒരു സംശയത്തിനും ഇടതരാതെ സഹകരിക്കുകയും ചെയ്തു. ഇത്രയും വലിയ കവര്‍ച്ച അയല്‍ക്കാരന്‍ തന്നെ നടത്തുമെന്ന് പോലീസ് കരുതില്ലെന്ന ധൈര്യത്തിലായിരുന്നു അപ്പോഴെല്ലാം പ്രതി. പക്ഷെ, സി.സി.ടി.വി ദൃശ്യങ്ങളടക്കം ഉപയോഗപ്പെടുത്തി നടത്തിയ അന്വേഷണം ഒരാഴ്ചകൊണ്ട് വിജയത്തിലെത്തുകയായിരുന്നു.
കവര്‍ച്ചാമുതല്‍ സംഭവസ്ഥലത്തുനിന്ന് ദൂരേയ്ക്ക് പോയിട്ടില്ലെന്ന് പോലീസിന് നേരത്തെതന്നെ ഉറപ്പുണ്ടായിരുന്നതായി അന്വേഷണ സംഘത്തിലുണ്ടായിരുന്ന വളപട്ടണം എസ്.ഐ പി. ഉണ്ണികൃഷ്ണന്‍ പറഞ്ഞു. ആദ്യഘട്ടംമുതല്‍ അയല്‍വാസിയായ ലിജീഷ് സംശയനിഴലിലുമായിരുന്നു. അന്വേഷണം രാജ്യമൊട്ടാകെ വലവിരിച്ചുള്ളതായിരുന്നുവെങ്കിലും പോലീസ് കൂടുതല്‍ ശ്രദ്ധകേന്ദ്രീകരിച്ചത് സമീപവാസികളില്‍ത്തന്നെയായിരുന്നു. തുടര്‍ന്നാണ് ലിജീഷിലേക്ക് അന്വേഷണം ചുരുക്കിയതെന്നും എസ്.ഐ ചൂണ്ടിക്കാട്ടി. ലഭിച്ച സി.സി.ടി.വി ദൃശ്യങ്ങളും ഗുണം ചെയ്തു. പ്രതിയുടെ മൊഴിയെടുക്കുമ്പോള്‍ ദേഹത്ത് കണ്ട മാറാല സംശയം വര്‍ധിപ്പിക്കുകയും ചെയ്തു. തുടര്‍ന്ന് വിരലടയാളം ഉപയോഗിച്ചുള്ള പരിശോധനകളും നടത്തി.
2023-ല്‍ കീച്ചേരിയില്‍ പ്രതി സമാനമായ ഒരു കവര്‍ച്ച നടത്തിയിരുന്നുവെന്നും അന്ന് ഈ കേസിന്റെ അന്വേഷണം തനിക്കായിരുന്നുവെന്നും ഉണ്ണികൃഷ്ണന്‍ ചൂണ്ടിക്കാട്ടി. ഗള്‍ഫില്‍ കാര്‍ഗോ നടത്തുന്ന നിയാസ് എന്നയാളുടെ വീട്ടിലായിരുന്നു അന്നത്തെ കവര്‍ച്ച. ആ വീട്ടില്‍ വെല്‍ഡിങ് തൊഴിലാളിയായ പ്രതി നിര്‍മാണപ്രവൃത്തികള്‍ നടത്തിയിരുന്നു. മേല്‍ക്കൂരയില്‍ ഇയാള്‍തന്നെ ഇട്ട ഷീറ്റ് ഇളക്കിമാറ്റിയാണ് അകത്ത് കയറി മോഷണം നടത്തിയത്. ആ വിരലടയാളം സൂക്ഷിച്ചുവെച്ചിരുന്നു. ഇത് വളപട്ടണം കേസിലും നിര്‍ണായകമായെന്ന് എസ്.ഐ ചൂണ്ടിക്കാട്ടി. കീച്ചേരിയിലെ വീട്ടുടമ ഹൃദയാഘാതം വന്ന് മരിക്കുന്നതിന് കുറച്ച് ദിവസം മുമ്പായിരുന്നു കവര്‍ച്ച. കീച്ചേരിയിലെ വീട്ടില്‍നിന്ന് ലിജീഷ് 11 പവന്‍ മോഷ്ടിച്ചിരുന്നു. അന്ന് തൊണ്ടിമുതല്‍ കണ്ടെത്താനോ പ്രതിയെ പിടികൂടാനോ സാധിച്ചിരുന്നില്ല.
വളപട്ടണത്ത് കവര്‍ച്ച നടന്ന വീടിനടുത്തേക്ക് പ്രതി ലിജീഷ് വന്നുപോവുന്ന സി.സി.ടി.വി ദൃശ്യങ്ങള്‍ ലഭിച്ചിരുന്നു. ചോദ്യം ചെയ്യലില്‍, ആദ്യമൊക്കെ താന്‍ അവിടെ പണിക്ക് പോയിരുന്നു എന്നൊക്കെ പറഞ്ഞ് ഒഴിഞ്ഞുമാറുകയായിരുന്നു ലിജീഷെന്ന് എസ്.ഐ ഉണ്ണികൃഷ്ണന്‍ പറയുന്നു. പെട്ടെന്ന് കാണുമ്പോള്‍ കവര്‍ച്ച നടത്തുന്ന ഒരാളായി ഇയാളേക്കുറിച്ച് തോന്നില്ല. ഈയൊരു ധൈര്യംകൊണ്ടുകൂടി ആയിരിക്കാം തന്റെയടുത്തേക്ക് അന്വേഷണം എത്തില്ലെന്ന് പ്രതി കരുതാന്‍ കാരണമെന്നും എസ്.ഐ ചൂണ്ടിക്കാട്ടുന്നു. പോലീസ് നടത്തിയ നിരന്തര ചോദ്യം ചെയ്യലിന് ഒടുവില്‍ ലിജീഷ് കുറ്റം സമ്മതിക്കുകയായിരുന്നു.
