BREAKING NEWSGULFNRIWORLD

കൊവിഡ് കാല നഷ്ടം പരിഹരിക്കാന്‍ രാത്രികാല ക്ലാസ് നടത്താന്‍ ഒരുങ്ങി കുവൈറ്റ്

കുവൈറ്റ് സിറ്റി: കൊവിഡ് വ്യാപനത്തെ തുടര്‍ന്നുണ്ടായ നിയന്ത്രണങ്ങള്‍ കാരണം ഒന്നര വര്‍ഷത്തോളം സ്‌കൂളുകള്‍ അടച്ചിടേണ്ടി വന്നതു മൂലമുണ്ടായ പഠന നഷ്ടം നികത്താന്‍ പദ്ധതികള്‍ ആവിഷ്‌ക്കരിക്കുന്നു. ഇതിന്റെ ഭാഗമായി അടുത്ത മാസം മുതല്‍ രാത്രി കാല സ്‌കൂള്‍ ക്ലാസ്സുകള്‍ ആരംഭിക്കാനാണ് ആലോചിക്കുന്നതെന്ന് വിദ്യാഭ്യാസ മന്ത്രാലയം അധികൃതര്‍ അറിയിച്ചു. കുവൈറ്റ് ന്യൂസ് ഏജന്‍സിയാണ് ഇക്കാര്യം റിപ്പോര്‍ട്ട് ചെയ്തത്.
കൊവിഡ് കാലത്ത് ഒന്നര വര്‍ഷത്തോളം സ്‌കൂള്‍ അടഞ്ഞുകിടന്നത് വിദ്യാര്‍ഥികളുടെ പഠനമികവിനെ ബാധിച്ചതായി കണ്ടെത്തിയ പശ്ചാത്തലത്തിലാണ് നടപടി. വിദ്യാര്‍ഥികളില്‍ നടത്തിയ 34 ഡയഗ്‌നോസ്റ്റിക്, അനലറ്റിക് പരിശോധനകളിലാണ് ദീര്‍ഘനാളത്തെ അടച്ചിടല്‍ വിദ്യാര്‍ഥികളുടെ പല കഴിവുകളെയും പ്രതികൂലമായി ബാധിച്ചതായി കണ്ടെത്തിയത്. ഇതിന്റെ അടിസ്ഥാനത്തില്‍ പ്രശ്‌നങ്ങള്‍ പരിഹരിച്ച് സ്‌കൂള്‍ വിദ്യാഭ്യാസത്തിന്റെ ഗുണനിലവാരം വര്‍ധിപ്പിക്കാന്‍ ശാസ്ത്രീയ പരിശ്രമം ആരംഭിച്ചതായും വിദ്യാഭ്യാസ മന്ത്രാലയം അറിയിച്ചു. ഓരോ വിദ്യാര്‍ഥിയെയും പ്രത്യേകം പരിഗണിച്ച് കൂടുതല്‍ ശ്രദ്ധ കൊടുത്തുള്ള തുടര്‍ പ്രവര്‍ത്തനങ്ങള്‍ നടത്താനാണ് മന്ത്രാലയത്തിന്റെ പരിപാടി. വിദഗ്ധരുമായി കൂടിയാലോചിച്ച് ഇതിനായി പദ്ധതി തയാറാക്കുമെന്ന് മന്ത്രാലയം അണ്ടര്‍ സെക്രട്ടറി ഡോ. അലി അല്‍ യാഖൂബ് അറിയിച്ചു. വൈകുന്നേര, രാത്രി ക്ലാസ്സുകള്‍ നവംബര്‍ മുതല്‍ ആരംഭിക്കാനാണ് ആലോചിക്കുന്നതെന്നും അദ്ദേഹം വ്യക്തമാക്കി.
ക്ലാസ് സമയം, ഹാജര്‍ സംവിധാനം തുടങ്ങിയ വിഷയങ്ങളില്‍ ആരോഗ്യ മന്ത്രാലയവുമായി കൂടിയാലോചിച്ച് തീരുമാനമെടുക്കും. നിലവില്‍ ഓരോ വിദ്യാര്‍ഥിയും ഒന്നിടവിട്ട ദിവസങ്ങളില്‍ ക്ലാസിലെത്തുന്ന രീതിയാണ് തുടരുന്നത്. ഇതില്‍ മാറ്റം വരുത്തുന്നത് ആലോചിക്കുമെന്നും അധികൃതര്‍ വ്യക്തമാക്കി. ഈ വര്‍ഷത്തെ കരിക്കുലം വെട്ടിക്കുറക്കുന്നതും പരിഗണിക്കുന്നുണ്ട്. കോവിഡ് പശ്ചാത്തലത്തില്‍ സ്‌കൂളുകള്‍ പൂര്‍ണതോതില്‍ പ്രവര്‍ത്തിക്കുന്നതിലെ പ്രയാസങ്ങള്‍ കണക്കിലെടുത്താണ് വിദ്യാര്‍ഥികളുടെ പഠന ഭാരം കുറയ്ക്കുകയെന്ന ലക്ഷ്യത്തോടെ ആദ്യ സെമസ്റ്ററിലെ കരിക്കുലം വെട്ടിക്കുറക്കാന്‍ ആലോചിക്കുന്നത്.

Related Articles

Back to top button

Adblock Detected

Please consider supporting us by disabling your ad blocker