കോഴിക്കോട്: കോഴിക്കോട് കൊയിലാണ്ടി ബസ് സ്റ്റാന്ഡില് സംഘടിച്ചുനിന്ന വിദ്യാര്ഥികളോട് പിരിഞ്ഞുപോകാന് പറഞ്ഞ വനിതാ എ എസ് ഐയെക്കൊണ്ട് എസ് എഫ് ഐ പ്രദേശിക നേതാവ് മാപ്പ് പറയിപ്പിച്ച സംഭവത്തില് അന്വേഷണം. കോഴിക്കോട് പ്രൈവറ്റ് ബസ് സ്റ്റാന്ഡില് സംഘടിച്ചുനിന്നപ്പോള് പിങ്ക് പൊലീസ് പറഞ്ഞതനുസരിച്ച് സ്ഥലം വിട്ട വിദ്യാര്ഥികള് എസ് എഫ് ഐ പ്രാദേശിക നേതാവുമായി മടങ്ങി വരുകയായിരുന്നു. പിന്നീടാണ് വനിതാ എ എസ് ഐയെക്കൊണ്ട് നിര്ബന്ധപൂര്വ്വം മാപ്പ് പറയിച്ചത്. സംഭവത്തില് സ്പെഷ്യല് ബ്രാഞ്ചാണ് അന്വേഷണം തുടങ്ങിയത്.
വിശദ വിവരങ്ങള് ഇങ്ങനെ
കൊയിലാണ്ടി ബസ്റ്റാന്ഡില് അനാവശ്യമായി സംഘടിച്ചു നിന്ന വിദ്യാര്ത്ഥികളോട് പിരിഞ്ഞു പോകാന് പറഞ്ഞ വനിതാ എ എസ് ഐയെകൊണ്ടാണ് എസ് എഫ് ഐ പ്രദേശിക നേതാവ് മാപ്പ് പറയിച്ചത്. കഴിഞ്ഞ ദിവസം വൈകീട്ട് ആയിരുന്നു സംഭവം നടന്നത്. സ്കൂള് വിട്ട സമയത്ത് ബസ്റ്റാന്ഡില് സംഘടിച്ച ഒരു കൂട്ടം വിദ്യാര്ഥികളോട് വനിതാ എ എസ് ഐയുടെ നേതൃത്വത്തിലുള്ള പിങ്ക് പോലീസ് തിരിച്ചു പോകാന് നിര്ദേശിച്ചിരുന്നു. ഈ സമയം അവിടെ നിന്നും പോയ വിദ്യാര്ത്ഥികള് എസ് എഫ് ഐ പ്രാദേശിക നേതാവുമായെത്തി പൊലീസിനോട് കയര്ക്കുകയായിരുന്നു. എ എസ് ഐയോട് മാപ്പ് പറയണം എന്നും നിര്ബന്ധിച്ചു. ഇതോടെ വനിതാ എ എസ് ഐ മാപ്പ് പറയുകയും ചെയ്തു. സംഘര്ഷ സാഹചര്യം ഒഴിവാക്കാനാണ് താന് കുട്ടികളോട് മാപ്പ് പറഞ്ഞതെന്നാണ് എ എസ് ഐ പറയുന്നത്. സംഭവത്തില് സ്പെഷ്യല് ബ്രാഞ്ച് അന്വേഷണം തുടങ്ങിയിട്ടുണ്ട്. ചെറിയ കുട്ടികള് ആയതിനാല് തനിക്ക് പരാതി ഇല്ലെന്നാണ് എ എസ് ഐ പറയുന്നത്.
