ന്യൂഡല്ഹി: ഹരിയാണ, ജമ്മു-കശ്മീര് നിയമസഭാ തിരഞ്ഞെടുപ്പുഫലം ചൊവ്വാഴ്ച അറിയാം. രാവിലെ എട്ടോടെ വോട്ടെണ്ണല് ആരംഭിക്കും. പന്ത്രണ്ടോടെ കൃത്യമായ ഫലസൂചന ലഭിക്കും.
90 സീറ്റുവീതമുള്ള ഹരിയാണയിലും ജമ്മു-കശ്മീരിലും യഥാക്രമം കോണ്ഗ്രസിനും ഇന്ത്യസഖ്യത്തിനുമാണ് എക്സിറ്റ് പോള് സാധ്യത പ്രവചിച്ചതെങ്കിലും ബി.ജെ.പി. ക്യാമ്പുകളിലും ആത്മവിശ്വാസത്തിന് കുറവില്ല. ഹരിയാണയില് ഇത്തവണയും സര്ക്കാര് രൂപവത്കരിക്കുമെന്ന് മുഖ്യമന്ത്രി നയാബ് സിങ് സൈനി അവകാശപ്പെട്ടു. വന്ഭൂരിപക്ഷത്തോടെ ഹരിയാണയില് വിജയിക്കുമെന്ന് പാര്ട്ടിനേതാവ് ഭൂപീന്ദര് സിങ് ഹൂഡയും പറഞ്ഞു. 49-55 സീറ്റു ലഭിക്കുമെന്നാണ് കോണ്ഗ്രസിന്റെ പ്രതീക്ഷ. 46 സീറ്റാണ് കേവലഭൂരിപക്ഷത്തിനുവേണ്ടത്. ജമ്മു-കശ്മീരില് ഇന്ത്യസഖ്യത്തിന് എക്സിറ്റ് പോളുകള് മുന്തൂക്കം പ്രഖ്യാപിച്ചിട്ടുണ്ടെങ്കിലും വോട്ടവകാശമുള്ള അഞ്ചുപേരെ നാമനിര്ദേശം ചെയ്യാനുള്ള ലെഫ്റ്റ്നന്റ് ഗവര്ണറുടെ നീക്കത്തെ കോണ്ഗ്രസ് കരുതലോടെയാണ് കാണുന്നത്.
