LATESTKERALAPATHANAMTHITTA

തിരുവല്ല ശ്രീവല്ലഭ മഹാക്ഷേത്രത്തിലെ പാളനമസ്‌കാരം വീണ്ടും സജീവമായി

തിരുവല്ല: ആചാര അനുഷ്ട്ടാനങ്ങളാല്‍ സമ്പുഷ്ടമായ തിരുവല്ല ശ്രീവല്ലഭ മഹാക്ഷേത്രത്തിലെ പാളനമസ്‌കാരം വീണ്ടും സജീവമായി. ലോക്ക്ഡൗണ്‍ മൂലം മുടങ്ങിക്കിടന്ന പാളനമസ്‌കാരം കഴിഞ്ഞ ദിവസമാണ് പുനരാരംഭിച്ചത്. കേരളത്തിലെ ക്ഷേത്രങ്ങളില്‍ അത്യപൂര്‍വമായി മാത്രം ആചരിക്കുന്ന ചടങ്ങാണ് ഇത്.മധ്യ തിരുവിതാംകൂറില്‍ ശ്രീ വല്ലഭ ക്ഷേത്രത്തില്‍ മാത്രം ആചരിച്ചുവരുന്ന പ്രത്യേക വഴിപാടാണ് പാളനമസ്‌കാരം.
മൂര്‍ത്തിയുടെ പൂജ കഴിഞ്ഞ് ഉച്ചയ്ക്ക് നിവേദ്യം ശ്രീകോവിലിനുള്ളിലേക്ക് എഴുന്നള്ളിച്ചുകഴിയുമ്പോള്‍ കീഴ്ശാന്തി പൂവും ചന്ദനവും തീര്‍ഥവുമെടുത്ത്, കിഴക്കേ മണ്ഡപത്തില്‍ നമസ്‌കാരത്തിനിരിക്കുന്ന ബ്രഹ്മചാരിയുടെ കാല്‍ കഴുകിച്ച് പൂവും ചന്ദനവും നല്‍കും. വിഷ്യക്‌സേനന്റെ വടക്കുവശത്തുള്ള ശാലയില്‍ ആവണിപ്പലകയിട്ട് ബ്രഹ്മചാരിയെ ദൈവീകഭാവത്തില്‍ ഇരുത്തി കമുകിന്‍ പാളയില്‍ ചോറ്, ഉപ്പുമാങ്ങ, ഇഞ്ചിതൈര്, തൃപ്പുളി, എരിശേരി, പരിപ്പ്, വറുത്ത ഉപ്പേരി, മെഴുക്ക് പുരട്ടി (വെള്ള വഴുതനങ്ങയോ, ചേനയോ കൊണ്ടുള്ള ) എന്നീ വിഭവങ്ങള്‍ നല്‍കി നമസ്‌ക്കാരം തുടങ്ങിയശേഷം മാത്രമാണ് ശ്രീവല്ലഭസ്വാമിക്കുള്ള നിവേദ്യ പൂജ പൂര്‍ത്തിയാക്കുന്നത്.
ശങ്കരമംഗലത്ത് മനയില്‍ ദ്വാദശി ഊണിനെത്തിയ ബ്രഹ്മചാരിക്ക് (വാമനമൂര്‍ത്തി) ശങ്കരമംഗലത്തമ്മ പാളയിലായിരുന്നു ആഹാരം വിളമ്പിയത്. അതേസമയത്ത്, ലക്ഷ്മീദേവി ഗൃഹസ്താശ്രമവേഷത്തിലെത്തി ബ്രഹ്മചാരിക്ക് തൃപ്പൂളി വിളമ്പുകയുണ്ടായി. ഈ സങ്കല്‍പത്തെ മുന്‍നിര്‍ത്തിയുള്ള ചടങ്ങാണ് ഇത്.നമസ്!കാര മണ്ഡപങ്ങളും ഇവിടെ പ്രത്യേകതയാണ്. ഇതര ക്ഷേത്രങ്ങളില്‍ നിന്ന് വ്യത്യസ്തമായി ഇവിടെ ശ്രീകോവിലിന്റെ രണ്ട് ഭാഗത്തും നമസ്‌കാരമണ്ഡപങ്ങലുണ്ട് കിഴക്കേ നടയില്‍ ശ്രീവല്ലഭസ്വാമിയുടെ തിരുമുമ്പിലും രണ്ടാമത്തേത് പടിഞ്ഞാറേ നടയില്‍ ശ്രീസുദര്‍ശനമൂര്‍ത്തിയുടെ തിരുമുമ്പിലുമാണ്.
രണ്ടും ചെമ്പുമേഞ്ഞ് സ്വര്‍ണ്ണത്താഴികക്കുടങ്ങള്‍ ചാര്‍ത്തിയതാണ്. കിഴക്കേ നടയിലെ നമസ്‌കാരമണ്ഡപത്തില്‍ ആയിരത്തൊന്ന് കലശം വരെ വച്ചുപൂജിയ്ക്കാന്‍ സൗകര്യമുണ്ടെന്നാണ് വിശ്വാസം. ഇതിനുള്ളിലാണ് പാള നമസ്‌കാരം നടക്കുന്നത്. സമ്പദ്‌സമൃദ്ധിക്കും ഐശ്വര്യലബ്ധിക്കുമായി ഭക്തജനങ്ങള്‍ പാള നമസ്‌ക്കാരം വഴിപാട് നടത്തുന്നത്. ഇതിനായി മാസങ്ങള്‍ക്ക് മുന്‍പേ തന്നെ ബുക്ക് ചെയ്ത് കാത്തിരിക്കുന്നവര്‍ ഏറെയാണ്. ഇടക്ക് ലോക്ക് ഡൗണ്‍ കാലയളവില്‍ ഇടക്ക് തടസ്സപ്പെട്ടത് കൂടി ഇനി പൂര്‍ത്തിയാക്കാനായുണ്ട്.

Related Articles

Back to top button

Adblock Detected

Please consider supporting us by disabling your ad blocker