പത്തനംതിട്ട: ശബരിമലയില് തീര്ത്ഥാടകരുടെ എണ്ണത്തിലും വരുമാനത്തിലും വര്ധനവുണ്ടായതായി റിപ്പോര്ട്ട്. നടതുറന്ന് 9 ദിവസം പൂര്ത്തിയാകുമ്പോള് കഴിഞ്ഞ വര്ഷത്തേക്കാള് 3,03,501 തീര്ത്ഥാടകരാണ് അധികമായി എത്തിയത്. വരുമാനത്തില് 13,33,79,701 രൂപയുടെ വര്ധനയുമുണ്ടായെന്ന് ദേവസ്വം ബോര്ഡ് പിഎസ് പ്രശാന്ത് വാര്ത്താസമ്മേളനത്തില് പറഞ്ഞു. എത്രത്തോളം തീര്ത്ഥാടകര് എത്തിയാലും സ്പോര്ട്ട് ബുക്കിംഗ് വഴി ദര്ശനം നടത്താനുള്ള സൗകര്യമൊരുക്കിയിട്ടുണ്ട്. ദേവസ്വം ബോര്ഡിന്റെ കാലദൈര്ഘ്യം കുറവായതിനാല് പല വികസന പ്രവര്ത്തനങ്ങളും പൂര്ത്തിയാക്കുന്നതില് തടസ്സമുണ്ടെന്നും പിഎസ് പ്രശാന്ത് പറഞ്ഞു.
നേരത്തെ, ശബരിമലയില് ദര്ശനത്തിനായി വെര്ച്വല് ക്യൂ വഴി ബുക്ക് ചെയ്യുന്ന ഭക്തരില് 20 മുതല് 25 ശതമാനം വരെ എത്താറില്ലെന്ന് തിരുവിതാംകൂര് ദേവസ്വം ബോര്ഡ് ഹൈക്കോടതിയെ അറിയിച്ചിരുന്നു. ദര്ശനത്തിന് വരുന്നില്ലെങ്കില് ബുക്കിംഗ് ക്യാന്സല് ചെയ്യണമെന്നുള്ള നിര്ദേശം മാധ്യമങ്ങളിലൂടെ അടക്കം അറിയിപ്പായി നല്കണമെന്നും ഹൈക്കോടതി നിര്ദശിച്ചു. ശബരിമലയില് കാര്യങ്ങള് പൂര്ണമായും നിയന്ത്രണവിധേയമാണെന്നും ദേവസ്വം ബോര്ഡ് കോടതിയെ അറിയിച്ചു.
നിലക്കല് -പമ്പാ റൂട്ടില് 122 കെഎസ്ആര്ടിസി ചെയിന് സര്വീസ് ബസുകള് സര്വീസ് നടത്തി വരികയാണ്. സീതത്തോട് നിലയ്ക്കല് കുടിവെള്ള പദ്ധതിയുടെ പൈപ്പിടല് ഒരാഴ്ചയ്ക്കകം പൂര്ത്തിയാക്കുമെന്ന് വാട്ടര് അതോറിറ്റി അറിയിച്ചു. പ്രായമായവര്, കുട്ടികള്, ശാരീരിക ബുദ്ധിമുട്ടുള്ളവര് എന്നിവരെ ദര്ശനം നടത്തുന്നതിന് സഹായിക്കാന് സന്നിധാനത്ത് അനുഭവസമ്പത്തുള്ള പൊലീസ് ഉദ്യോഗസ്ഥര് വേണമെന്ന് ഹൈക്കോടതി നിര്ദേശിച്ചു. ഈ മാസം 30ന് പുതിയ ബാച്ച് പൊലീസ് ഉദ്യോഗസ്ഥര് ചുമതല ഏല്ക്കുമ്പോഴും ഇക്കാര്യം ശ്രദ്ധിക്കണമെന്നും ഹൈക്കോടതി നിര്ദേശിച്ചു.
47 1 minute read