ENTERTAINMENTBOLLYWOOD

നടനാണ്, രാഷ്ട്രീയക്കാരനല്ലെന്ന് പ്രഖ്യാപിച്ച അച്ഛനും മകനും

പവര്‍ സ്റ്റാര്‍’ എന്ന് കന്നഡ സിനിമ ലോകം ആദരവോടെ വിളിച്ച പുനീത് രാജ്കുമാര്‍ വിടവാങ്ങുമ്പോള്‍ വികാരഭരിതമായ രംഗങ്ങളാണ് ബംഗളൂരുവിലെ വിക്രം ആശുപത്രിയ്ക്ക് മുന്നില്‍ അരങ്ങേറുന്നത്. ഇന്ത്യന്‍ സിനിമയിലെ തന്നെ എക്കാലത്തെയും മികച്ച അഭിനേതാക്കളില്‍ ഒരാളായ രാജ്കുമാറിന്റെ മകന്‍ എന്നതിലുപരി കന്നഡിഗരെ സ്‌നേഹിച്ച വ്യക്തി എന്ന നിലയിലാണ് പുനീത് അംഗീകരിക്കപ്പെട്ടത്.
സിനിമയിലൂടെ രാഷ്ട്രീയ പ്രവേശനം എന്ന മാര്‍ഗം പൂര്‍ണമായി തിരസ്‌കരിച്ച ചരിത്രമാണ് രാജ്കുമാറിനും മകന്‍ പുനീതിനും ഉണ്ടായിരുന്നത്. 1978ല്‍ ചിക്കമംഗളൂരു ലോക്‌സഭ ഉപതിരഞ്ഞെടുപ്പില്‍ ഇന്ദിരാ ഗാന്ധിക്കെതിരെ മത്സരിക്കാന്‍ രാജ്കുമാറിന് മേല്‍ സമ്മര്‍ദ്ദമുണ്ടായിരുന്നു എന്ന് രാഷ്ട്രീയ നിരീക്ഷകനായ എം.കെ ഭാസ്‌കര്‍ റാവു വെളിപ്പെടുത്തിയിരുന്നു. ജനതാ പാര്‍ട്ടിയുടെ ജെ.എച്ച് പട്ടേലും ജോര്‍ജ് ഫെര്‍ണാണ്ടസും ഇക്കാര്യം ആവശ്യപ്പെട്ട് രാജ്കുമാറിനെ സമീപിച്ചിരുന്നു. എന്നാല്‍ ജനങ്ങളുടെ സ്‌നേഹം അധികാരം നേടാന്‍ ഉപയോഗിക്കില്ലെന്ന ഉറച്ചനിലപാടാണ് രാജ്കുമാര്‍ അന്ന് സ്വീകരിച്ചത്.
ഏത് തിരഞ്ഞെടുപ്പില്‍ മത്സരിച്ചാലും രാജ്കുമാര്‍ അനായാസം ജയിച്ചുകയറുമെന്ന് പല പ്രമുഖ മാധ്യമങ്ങളും അക്കാലത്ത് റിപ്പോര്‍ട്ട് ചെയ്തിരുന്നെങ്കിലും രാഷ്ട്രീയത്തില്‍ നിന്ന് അകന്ന് നില്‍ക്കാനായിരുന്നു രാജ്കുമാറിന്റെ തീരുമാനം. രാഷ്ട്രീയത്തിലൂടെ അല്ലാതെ തന്നെ കന്നഡ ഭാഷയെ സംരക്ഷിക്കുന്നതിലും പ്രചരിപ്പിക്കുന്നതിലും വലിയ പങ്കുവഹിച്ച വ്യക്തിയാണ് രാജ്കുമാര്‍.
അച്ഛന്‍ കാണിച്ചുതന്ന വഴിയിലൂടെ തന്നെയാണ് പുനീത് രാജ്കുമാറും സഞ്ചരിച്ചത്. ഒരിക്കലും അദ്ദേഹം സിനിമ വിട്ട് മറ്റൊരു മേച്ചില്‍പ്പുറം തേടിപ്പോകാന്‍ തയ്യാറായിരുന്നില്ല. വിടവാങ്ങുമ്പോള്‍ ആശുപത്രിയ്ക്ക് മുന്നില്‍ തടിച്ചുകൂടിയവരില്‍ എല്ലാ പാര്‍ട്ടികളുടെയും അനുഭാവികളുണ്ടാകും എന്നത് തന്നെയാണ് പുനീതിനെയും ഇത്രമേല്‍ സ്വീകാര്യനാക്കിയത്.
രാഷ്ട്രീയത്തിലേയ്ക്ക് തന്റെ പേര് വലിച്ചിഴയ്ക്കരുതെന്ന് ആവശ്യപ്പെട്ട് നിരവധി തവണ പുനീത് അഭ്യര്‍ത്ഥനകള്‍ നടത്തിയിരുന്നു. താന്‍ ഒരു പ്രത്യേക രാഷ്ട്രീയ പാര്‍ട്ടിയെ പിന്തുണയ്ക്കുന്നില്ലെന്നും ഒരു രാഷ്ട്രീയ പാര്‍ട്ടിയുടെയും അംഗമാകാന്‍ ആഗ്രഹിക്കുന്നില്ലെന്നും അദ്ദേഹം വ്യക്തമാക്കിയിരുന്നു.
രാഷ്ട്രീയക്കാരന്‍ എന്നല്ല, മറിച്ച് ഒരു നടന്‍ എന്ന് അറിയപ്പെടാനായിരുന്നു പുനീതിന്റെ ആഗ്രഹം. തിരഞ്ഞെടുപ്പുകളില്‍ എല്ലാവരും വോട്ടുകള്‍ രേഖപ്പെടുത്തണമെന്ന് മാത്രം ആഹ്വാനം ചെയ്തിരുന്ന പുനീത് ഒരു വ്യക്തിയ്‌ക്കോ പാര്‍ട്ടിക്കോ വോട്ട് രേഖപ്പെടുത്തണമെന്ന് ആരാധകരോട് ആവശ്യപ്പെടില്ലെന്നും പരസ്യമായി പറഞ്ഞിരുന്നു.
അച്ഛന്റെ പാരമ്പര്യം പിന്തുടര്‍ന്ന് കന്നഡിഗരുടെ മനം കവര്‍ന്ന പുനീത് ബാലതാരമായാണ് സിനിമയിലെത്തിയത്. 1985ല്‍ മികച്ച ബാലതാരത്തിനുള്ള ദേശീയ പുരസ്‌കാരം, മികച്ച നടനുള്ള മൂന്ന് സംസ്ഥാന അവാര്‍ഡുകള്‍, ഫിലിം ഫെയര്‍ ഉള്‍പ്പെടെയുള്ള മറ്റ് നിരവധി പുരസ്‌കാരങ്ങള്‍ എന്നിവയെല്ലാം പുനീതിനെ തേടി എത്തിയിരുന്നു. മോഹന്‍ലാലിനൊപ്പം കന്നഡ ചിത്രമായ ‘മൈത്രി’യിലും പുനീത് വേഷമിട്ടിട്ടുണ്ട്. ഫിറ്റ്‌നസിന് എന്നും പ്രാധാന്യം നല്‍കിയിരുന്ന താരത്തിന്റെ പെട്ടെന്നുള്ള വിയോഗം ആരാധകരെ ഞെട്ടിച്ചിരിക്കുകയാണ്.

Related Articles

Back to top button

Adblock Detected

Please consider supporting us by disabling your ad blocker