കോഴിക്കോട്: സിനിമ, സീരിയല് നടന് മേഘനാഥന് (60) അന്തരിച്ചു. കോഴിക്കോട്ടെ സ്വകാര്യ ആശുപത്രിയില് വ്യാഴാഴ്ച പുലര്ച്ചെ രണ്ടു മണിയോടെയാണ് അന്ത്യം. ശ്വാസകോശ സംബന്ധമായ അസുഖത്തെ തുടര്ന്ന് ചികിത്സയിലായിരുന്നു. നടന് ബാലന് കെ.നായരുടെ മകനാണ്. അന്പതോളം സിനിമകളിലും നിരവധി സീരിയലുകളിലും അഭിനയിച്ചിട്ടുണ്ട്.
1980ല് പി.എന്.മേനോന് സംവിധാനം ചെയ്ത’അസ്ത്രം’ എന്ന ചിത്രത്തില് ഒരു സ്റ്റുഡിയോ ബോയിയുടെ കഥാപാത്രത്തെ അവതരിപ്പിച്ചാണ് മേഘനാഥന് സിനിമാ രംഗത്തേയ്ക്കു പ്രവേശിക്കുന്നത്.
പഞ്ചാഗ്നി, ചമയം, രാജധാനി, ഭൂമിഗീതം, ചെങ്കോല്, മലപ്പുറം ഹാജി മഹാനായ ജോജി, പ്രായിക്കര പാപ്പാന്, ഉദ്യാനപാലകന്, ഈ പുഴയും കടന്ന്, ഉല്ലാസപ്പൂങ്കാറ്റ്, രാഷ്ട്രം, കുടമാറ്റം, വാസന്തിയും ലക്ഷ്മിയും പിന്നെ ഞാനും, വാസ്തവം, ആക്ഷന് ഹീറോ ബിജു എന്നിവയാണ് പ്രധാന ചിത്രങ്ങള്. 2022ല് റിലീസ് ചെയ്ത കൂമനാണ് അവസാന ചിത്രം.
