കുര്ണൂല്: അടുത്ത സുഹൃത്തിന് വിവാഹ സമ്മാനം നല്കുന്നതിനിടെ കുഴഞ്ഞ് വീണ യുവാവിന് ദാരുണാന്ത്യം. ആന്ധ്ര പ്രദേശിലെ കുര്ണൂലിലാണ് സംഭവം. ബെംഗളൂരുവില് ആമസോണില് ജീവനക്കാരനായ വംശി എന്ന യുവാവാണ് സുഹൃത്തിന്റെ വിവാഹ ദിനത്തില് ഹൃദയാഘാതത്തേ തുടര്ന്ന് മരിച്ചത്. നിരവധി ആളുകള് നോക്കി നില്ക്കുന്നതിനിടെയാണ് യുവാവ് വിവാഹ വേദിയില് കുഴഞ്ഞ് വീണത്. ഇതിന്റെ ദൃശ്യങ്ങളും സമൂഹമാധ്യമങ്ങളില് വൈറലായിട്ടുണ്ട്. എന്തോ പ്രാങ്ക് ആണെന്ന് കരുതിയ സംഭവത്തിന്റെ സ്വഭാവം പെട്ടന്നാണ് മാറിയത്.
നവദമ്പതികള്ക്ക് സമ്മാനം നല്കാനായി വേദിയില് എത്തിയതായിരുന്നു വംശിയും സുഹൃത്തുക്കളും. നവ വരന് വിവാഹ സമ്മാനം തുറന്ന് നോക്കുന്നതിനിടെ ശാരീരിക അസ്വാസ്ഥ്യം അനുഭവപ്പെട്ട യുവാവ് മുന്നോട്ട് ആയുകയും പിന്നാലെ സുഹൃത്തിനെ പിടിക്കാന് ആയുകയും ചെയ്തതിന് പിന്നാലെ യുവാവ് കുഴഞ്ഞ് വീഴുകയായിരുന്നു. തുടക്കത്തില് എന്താണ് സംഭവിക്കുന്നതെന്ന് വ്യക്തമായില്ലെങ്കിലും തമാശ അല്ലെന്ന് വ്യക്തമായതോടെ യുവാവിനെ ഉടനടി ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു.
സുഹൃത്തിന്റെ വിവാഹത്തില് പങ്കെടുക്കാനായി വംശി ബെംഗളൂരുവില് നിന്ന് പെനുമാടയിലെത്തിയതായിരുന്നു. ദോണ് സിറ്റി ആശുപത്രിയില് എത്തിച്ച യുവാവിന്റെ മരണം ഡോക്ടര്മാര് സ്ഥിരീകരിക്കുകയായിരുന്നു. സമാനമായ മറ്റൊരു സംഭവത്തില് വിവാഹ ആഘോഷങ്ങള് പുരോഗമിക്കുന്നതിനിടെ ഹത്രാസിലെ ഭോജ്പൂരില് 22 വയസ് മാത്രമുള്ള വരന് കുഴഞ്ഞ് വീണ് മരിച്ചിരുന്നു. വിവാഹദിനത്തിന് തലേന്നായിരുന്നു യുവാവിന്റെ ദാരുണാന്ത്യം.
72 Less than a minute