കാലിഫോര്ണിയ: എന്ജിന് തകരാറിനേ തുടര്ന്ന് എമര്ജന്സി ലാന്ഡിംഗ് നടത്തേണ്ടി വന്ന ചെറുവിമാനം ഗോള്ഫ് കോഴ്സില് നിന്ന് തെന്നി മാറി സമീപത്തെ കെട്ടിടത്തില് ഇടിച്ച് കയറി. വടക്കന് കാലിഫോര്ണിയയിലാണ് സംഭവം. കാലിഫോര്ണിയയിലെ ഹാഗിന് ഓക്സ് ഗോള്ഫ് ക്ലബ്ബ് കോംപ്ലക്സിലേക്കാണ് ചെറുവിമാനം ഇടിച്ചിറങ്ങിയത്. നിലത്തിറങ്ങിയതിന് പിന്നാലെ നിയന്ത്രണം നഷ്ടമായ വിമാനം അതിവേഗതയില് നിരങ്ങിയാണ് ക്ലബ്ബ് കെട്ടിടത്തിലേക്ക് ഇടിച്ച് കയറിയത്.
മിന്നല് വേഗത്തില് നിരങ്ങി നീങ്ങിയ വിമാനത്തിന്റെ മുന്നില് നിന്ന് തലനാരിഴയ്ക്കാണ് ഗോള്ഫ് കോഴ്സിലുണ്ടായിരുന്ന യുവാവ് രക്ഷപ്പെടുന്നത്. ഞായറാഴ്ച പ്രാദേശിക സമയം ഉച്ചയ്ക്ക് ഒരു മണിയോടെയാണ് അപകടമുണ്ടായത്. ഗോള്ഫ് ക്ലബ്ബിന് സമീപത്തെ മക്കെല്ലന് എയര് ബേസില് നിന്നാണ് ചെറുവിമാനം ടേക്ക് ഓഫ് ചെയ്തത്. എന്നാല് ടേക്ക് ഓഫിന് പിന്നാലെ വിമാനത്തിന്റെ എന്ജിന് തകരാറിലാവുകയായിരുന്നു. 400 അടിയോളം ഉയരത്തില് നിന്നാണ് വിമാനം ഗോള്ഫ് ക്ലബ്ബിലേക്ക് കൂപ്പുകുത്തിയത്. ബാലന്സ് ചെയ്ത് നിര്ത്താനുള്ള പൈലറ്റിന്റെ ശ്രമങ്ങള് പാളിയതോടെയാണ് വിമാനം പുല്മൈതാനത്തിലൂടെ അതിവേഗതയില് നിരങ്ങി നീങ്ങിയത്. ഗോള്ഫ് കോഴ്സിനും പരിസരത്തുമായി നിരവധി ആളുകളുള്ള സമയത്താണ് അപകടമുണ്ടായത്.
ഗോള്ഫ് കോഴ്സില് നിന്ന് ഉപേക്ഷിക്കപ്പെട്ട ബോളുകള് പെറുക്കിയെടുത്തു കൊണ്ടിരുന്ന യുവാവ് ഓടി മാറിയതിനാലാണ് വിമാനത്തിന് അടിയില് പെടാതെ രക്ഷപ്പെട്ടത്. വലിയ ഒരു ശബ്ദം മാത്രമാണ് കേട്ടതെന്നാണ് ഗോള്ഫ് ക്ലബ്ബിലെ സ്ഥിരം സന്ദര്ശകര് പ്രാദേശിക മാധ്യമങ്ങളോട് പ്രതികരിക്കുന്നത്. ക്ലബ്ബിലെ കെട്ടിടത്തിന് വിമാനം ഇടിച്ച് കയറി കേടുപാടുകള് സംഭവിച്ചെങ്കിലും ആളപായമില്ലെന്നാണ് അധികൃതര് വിശദമാക്കുന്നത്. അപകടത്തില് പൈലറ്റിന് പരിക്കുകളുണ്ടെങ്കിലും സാരമുള്ളതല്ലെന്നാണ് പൊലീസ് വിശദമാക്കുന്നത്. സംഭവത്തില് പൊലീസും വ്യോമയാന അധികൃതരും അന്വേഷണം പ്രഖ്യാപിച്ചിട്ടുണ്ട്.
