BREAKING NEWSNATIONAL

പെഗാസസ് ഫോണ്‍ ചോര്‍ത്തല്‍: നിര്‍ണായക സുപ്രീം കോടതി വിധി ഇന്ന്

ന്യൂഡല്‍ഹി: പെഗാസസ് ഫോണ്‍ ചോര്‍ത്തല്‍ വിവാദവുമായി ബന്ധപ്പെട്ട കേസില്‍ സുപ്രീം കോടതി ഇന്ന് വിധി പറയും. ഫോണ്‍ ചോര്‍ത്തലില്‍ സ്വതന്ത്ര അന്വേഷണം ആവശ്യപ്പെട്ട് കൊണ്ടുള്ള ഹര്‍ജികളിലാണ് കോടതി വിധി പറയുക.
സെപ്റ്റംബര്‍ 13ന് ചീഫ് ജസ്റ്റിസ് എന്‍.വി രമണ, ജസ്റ്റിസുമാരായ സൂര്യകാന്ത്, ഹിമ കോഹ്ലി എന്നിവരടങ്ങിയ ബഞ്ച് പെഗാസസ് കേസില്‍ വിധി പറയുന്നത് മാറ്റിയിരുന്നു. കേന്ദ്രസര്‍ക്കാര്‍ പെഗാസസ് ഉപയോഗിച്ച് ജനങ്ങളുടെ ഫോണുകള്‍ അനധികൃതമായി ചോര്‍ത്തിയോ എന്ന് മാത്രമാണ് അറിയണ്ടതെന്ന് കോടതി വ്യക്തമാക്കിയിരുന്നു. വിഷയത്തെ കുറിച്ച് അന്വേഷിച്ച് ഇടക്കാല ഉത്തരവ് പുറപ്പെടുവിക്കാന്‍ സാങ്കേതിക വിദഗ്ധരടങ്ങിയ ഒരു സമിതിയ്ക്ക് രൂപം നല്‍കുമെന്ന് കോടതി വാക്കാല്‍ പരാമര്‍ശിച്ചിരുന്നു.
ഇടക്കാല ഉത്തരവ് ഏതാനും ദിവസങ്ങള്‍ക്കുള്ളില്‍ പുറപ്പെടുവിക്കുമെന്ന് പറഞ്ഞ കോടതി കേന്ദ്രത്തിന് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്തയോട് വിശദമായ സത്യവാങ്മൂലം സമര്‍പ്പിക്കുന്ന കാര്യത്തില്‍ കേന്ദ്രം പുനര്‍വിചിന്തനം നടത്തുന്നുണ്ടെങ്കില്‍ അറിയിക്കണമെന്ന് നിര്‍ദ്ദേശിച്ചിരുന്നു. രാജ്യസുരക്ഷയെ ബാധിക്കുന്ന വിഷമായതിനാല്‍ സത്യവാങ്മൂലം സമര്‍പ്പിക്കാന്‍ കഴിയില്ലെന്നായിരുന്നു കേന്ദ്രത്തിന്റെ നിലപാട്.
ഇസ്രായേലി ചാര സോഫ്റ്റ്‌വെയറായ പെഗാസസ് ഉപയോഗിച്ച് പ്രമുഖ വ്യക്തികളുടെ ഉള്‍പ്പെടെ ഫോണ്‍ ചോര്‍ത്തിയെന്ന ആരോപണം പ്രതിപക്ഷം പാര്‍ലമെന്റില്‍ ശക്തമായാണ് ഉയര്‍ത്തിയത്. പാര്‍ലമെന്റ് സമ്മേളനം ഏറെക്കുറെ പൂര്‍ണമായി സ്തംഭിപ്പിച്ചാണ് പ്രതിപക്ഷം പ്രതിഷേധം അറിയിച്ചത്. ഈ സാഹചര്യത്തില്‍ സ്വതന്ത്രമായ അംഗങ്ങളെ ഉള്‍പ്പെടുത്തി അന്വേഷണം നടത്താന്‍ അനുവദിച്ചാല്‍ തെറ്റിധാരണകള്‍ മാറുമെന്നായിരുന്നു കോടതിയില്‍ കേന്ദ്രസര്‍ക്കാര്‍ നല്‍കിയ വിശദീകരണം. നാളെ കോടതി വിധി പറയുന്നതോടെ പെഗാസസ് വിഷയം ദേശീയ രാഷ്ട്രീയത്തില്‍ വീണ്ടും സജീവ ചര്‍ച്ചയാകുമെന്നാണ് വിലയിരുത്തല്‍.

Related Articles

Back to top button

Adblock Detected

Please consider supporting us by disabling your ad blocker