തിരുവനന്തപുരം: സംസ്ഥാനത്ത് വീണ്ടും മുഖ്യമന്ത്രി ഗവര്ണര് പോര് മുറുകുന്നു. 27 ദിവസമായി മുഖ്യമന്ത്രി തന്റെ കത്തിന് പ്രതികരിച്ചിരുന്നില്ലെന്നും ഇപ്പോഴെങ്കിലും പ്രതികരണം ഉണ്ടായതില് സന്തോഷമുണ്ടെന്നും ഗവര്ണര് ആരിഫ് മുഹമ്മദ് ഖാന് പറഞ്ഞു. മറുപടിക്കത്ത് നല്കാത്തപ്പോഴാണ് ചീഫ് സെക്രട്ടറിയോടും ഡിജിപിയോടും താന് ചോദിച്ചത്.
ദേശവിരുദ്ധ പ്രവര്ത്തനം നടന്നെന്ന് താന് പ്രസ്താവന നടത്തിയിട്ടില്ലെന്നാണ് കഴിഞ്ഞ ദിവസം ഗവര്ണര്ക്കയച്ച കത്തില് മുഖ്യമന്ത്രി പറയുന്നത്. എന്നാല് രാജ്യത്തിനെതിരായ ക്രിമിനല് സംഭവങ്ങളുണ്ടെന്ന് കത്തില് പറയുന്നതായി ഗവര്ണര് ചൂണ്ടിക്കാട്ടി. രാജ്യ വിരുദ്ധ പ്രവര്ത്തനം സംബന്ധിച്ച് മുഖ്യമന്ത്രിയുടെ വിശദീകരണം വ്യക്തമല്ലെന്നാണ് ഗവര്ണര് ആവര്ത്തിക്കുന്നത്.
രാജ്യ വിരുദ്ധ പ്രവര്ത്തനവും രാജ്യത്തിനെതിരെയുള്ള കുറ്റകൃത്യവും എങ്ങനെയാണ് വ്യത്യാസപ്പെട്ടിരിക്കുന്നത് എന്ന് ഗവര്ണര് ചോദിച്ചു.’ഇവ രണ്ടും ഒന്നാണ്. അതാണ് താന് ചോദിച്ചത്. അതിന് മറുപടി കിട്ടിയിട്ടില്ല. കഴിഞ്ഞ മൂന്ന് വര്ഷമായി രാജ്യത്തിനെതിരായ കുറ്റകൃത്യങ്ങള് നടക്കുന്നുവെന്ന് മുഖ്യമന്ത്രി പറയുമ്പോള് എന്റെ സ്ഥാനത്ത് നിങ്ങളായിരുന്നെങ്കില് എന്താണ് ചെയ്യുക? ദേശത്തിനെതിരായ കുറ്റകൃത്യങ്ങള് നടക്കുന്നുണ്ടെന്ന് അദ്ദേഹം പറയുമ്പോള് അതിലാണ് ഞാന് നടപടി ആവശ്യപ്പെട്ടത്. എല്ലാ കാര്യങ്ങളും നിയമത്തിനും ഭരണഘടനയ്ക്കും അനുസൃതമായിരിക്കണം. അല്ലാത്തരീതിയില് കാര്യങ്ങള് നടത്താന് ഞാന് അനുവദിക്കില്ല. അതുകൊണ്ടുതന്നെ ആളുകള് എന്നോട് അസ്വസ്ഥരാവുകയാണ്. അതുകൊണ്ടാണ് തനിക്കെതിരേ പോലും ആക്രമണം ഉണ്ടായത്’, ഗവര്ണര് കൂട്ടിച്ചേര്ത്തു.
എസ്എഫ്ഐ പ്രവത്തകര് കാര് തടഞ്ഞ സംഭവത്തെ കുറിച്ചും ഗവര്ണര് പരാമര്ശിച്ചു. ‘തന്റെ കാര് ആക്രമിക്കപ്പെട്ടിരുന്നു. എന്നാല് എങ്ങനെയാണ് ആക്രമണമുണ്ടായതെന്ന് മുഖ്യമന്ത്രി അന്വേഷിച്ചതുപോലുമില്ല പക്ഷെ എന്തിനാണ് ഞാന് കാറിന് പുറത്തേക്ക് വന്നത് എന്നാണ് അദ്ദേഹം ചോദിച്ചത്. ഞാന് കാറിനകത്ത് തന്നെ ഇരിക്കണമെന്നും ഗുണ്ടകളാല് ആക്രമിക്കപ്പെടണമെന്നുമാണ് അദ്ദേഹം ഉദ്ദേശിച്ചത്. അന്നത്തെ ആക്രമണത്തില് 75,000 രൂപയുടെ നഷ്ടമാണുണ്ടായത്’. എന്നോട് അതൃപ്തിയുണ്ടായതിനാലാണ് അന്ന് താന് ആക്രമിക്കപ്പെട്ടതെന്നും ഗവര്ണ്ണര് പറഞ്ഞു.
ഗവര്ണര് തനിക്കെതിരേ വ്യക്തിപരമായ ആക്ഷേപം നടത്തുന്നുവെന്ന മുഖ്യമന്ത്രിയുടെ ആരോപണത്തോടും ഗവര്ണര് പ്രതികരിച്ചു. മുഖ്യമന്ത്രിക്ക് സ്വന്തം അഭിപ്രായം പറയാന് സ്വാതന്ത്ര്യമുണ്ടെന്നും അദ്ദേഹം പറയുന്നതിനുള്ള ഉത്തരവാദിത്തം അദ്ദേഹത്തിനാണെന്നും ഗവര്ണര് പറഞ്ഞു. മുഖ്യമന്ത്രി പിണറായി വിജയന് ഹിന്ദുവിന് നല്കിയ അഭിമുഖത്തെക്കുറിച്ചുള്ള നിലപാട് ഗവര്ണര് ആവര്ത്തിച്ചു. ‘മുഖ്യമന്ത്രിയുടെ അഭിമുഖത്തില് പിആര് ഏജന്സി ഇടപെട്ടിട്ടുണ്ടെന്ന് ദ ഹിന്ദു പത്രമാണ് പറഞ്ഞത്. അഭിമുഖത്തില് പറഞ്ഞ കാര്യങ്ങള് മുഖ്യമന്ത്രി നിഷേധിച്ചു. അങ്ങനെയെങ്കില് എന്തുകൊണ്ട് ഹിന്ദുവിനെതിരേ നടപടിയെടുക്കുന്നില്ല? ഹിന്ദുവിന് നല്കിയ അഭിമുഖത്തില് മാത്രമല്ല, പിന്നീടും മുഖ്യമന്ത്രി ഇതേ കാര്യം ആവര്ത്തിച്ചു. എന്നാല് ഒരു സ്ഥലത്തെയോ വ്യക്തിയോ എടുത്തുപറയാതെയായിരുന്നു അദ്ദേഹത്തിന്റെ പരാമര്ശം. ഇതിലൂടെ മുഖ്യമന്ത്രി കേരളത്തെ മുഴുവനുമാണ് കുറ്റപ്പെടുത്തുന്നത്. മുഖ്യമന്ത്രിക്ക് എന്തും പറയാനുള്ള അവകാശമുണ്ട്. പക്ഷേ ഈ കുറ്റകൃത്യങ്ങള് നടത്തുന്നതാരാണെന്ന് പറയണം. എവിടെയാണ് നടക്കുന്നതെന്ന് പറയണം’, ആരിഫ് മുഹമ്മദ് ഖാന് പറഞ്ഞു.
പോലീസ് വെബ്സൈറ്റില് ഉണ്ടെന്ന് പറഞ്ഞ് ഗവര്ണര് ഉയര്ത്തിക്കാട്ടിയ കാര്യങ്ങള് തെറ്റാണെന്നും തനിക്ക് ഒന്നും മറയ്ക്കാനില്ലെന്നുമായിരുന്നു മുഖ്യമന്ത്രിയുടെ കത്തില് പറയുന്നത്. കത്തില് പറയാത്ത കാര്യങ്ങള് ഗവര്ണര് മാധ്യമങ്ങള്ക്ക് മുന്നില് പറഞ്ഞു. താന് പറയാത്ത കാര്യങ്ങളാണ് പ്രസിദ്ധീകരിച്ചതെന്ന് ദ ഹിന്ദു ദിനപത്രം തന്നെ വ്യക്തമാക്കിയിട്ടുണ്ട്. പോലീസിന്റെ ഔദ്യോഗിക വെബ്സൈറ്റില് അത്തരത്തില് ഒരു കാര്യവുമില്ലെന്നും കത്തില് മുഖ്യമന്ത്രി വിശദീകരിച്ചിരുന്നു.
താന് ഉദേശിക്കാത്ത കാര്യമാണ് രാജ്യദ്രോഹ പ്രവര്ത്തനവുമായി ബന്ധപ്പെട്ട് ഗവര്ണര് വ്യാഖ്യാനിച്ചത് എന്നായിരുന്നു കഴിഞ്ഞ ദിവസം മുഖ്യമന്ത്രി ഗവര്ണര്ക്കയച്ച കത്തില് പറഞ്ഞിരുന്നത്. സ്വര്ണ്ണക്കടത്ത് രാജ്യ വിരുദ്ധ പ്രവര്ത്തനം തന്നെയാണ്. ഇത് രാജ്യത്തിന്റെ സമ്പദ്വ്യവസ്ഥയ്ക്ക് ഉണ്ടാക്കുന്ന പ്രശ്നങ്ങളും രാജ്യവിരുദ്ധ ശക്തികള് ഈ സാഹചര്യം മുതലെടുക്കുന്നതിനെ കുറിച്ചുമാണ് താന് ഉദേശിച്ചതെന്നും പിണറായി പറയുന്നു. എന്നാല്, താന് ഉദ്ദേശിച്ച കാര്യത്തിന് അപ്പുറത്തേക്കാണ് ഗവര്ണ്ണര് നല്കുന്ന വ്യാഖ്യാനമെന്ന് മുഖ്യമന്ത്രി കത്തില് ആരോപിച്ചിരുന്നു
