കാസര്കോട്: ഫാഷന് ഗോള്ഡ് തട്ടിപ്പ് കേസില് ഫാഷന് ഗോള്ഡ് മുന് ചെയര്മാനും മുന് എംഎല്എയുമായ എംസി കമറുദ്ദിന്റെ സ്വത്ത് കണ്ടു കെട്ടി ഇഡി(എന്ഫോഴ്സ്മെന്റ് ഡയറക്ടറേറ്റ്). കമറുദ്ദീനെ കൂടാതെ കമ്പനി ഡയറക്ടര് ബോര്ഡ് അംഗം ടികെ പൂക്കോയ തങ്ങളുടേയും കുടുംബാംഗങ്ങളുടെയും സ്വത്തുക്കളും ഇഡി താല്ക്കാലികമായി കണ്ടുകെട്ടി. 19.60 കോടി രൂപയുടെ സ്വത്തുക്കളാണ് കണ്ടുകെട്ടിയത്.
2006 ല് ഫാഷന് ഗോള്ഡ് ഇന്റെര്നാഷണല് എന്ന പേരില് ചന്തേര മാണിയാട്ട് തവക്കല് കോംപ്ലക്സിലാണ് ആദ്യകമ്പനി രജിസ്റ്റര് ചെയ്തത്. പിന്നീട് 2007 ലും 2008 ലും 2012 ലും 2016 ലുമായാണ് മറ്റുകമ്പനികള് രജിസ്റ്റര് ചെയ്തത്. ഒരേ മേല്വിലാസത്തിലാണ് കമ്പനികള് രജിസ്റ്റര് ചെയ്തതെങ്കിലും ഫാഷന് ഗോള്ഡ് ഇന്റെര്നാഷണല് എന്ന സ്ഥാപനമല്ലാതെ മറ്റൊന്നും മാണിയാട്ട് ഉണ്ടായിരുന്നില്ല.
മുസ്ലീം ലീഗിന്റെ ഭാരവാഹികളും ലീഗുമായി അടുത്ത ബന്ധമുള്ളവരും ചേര്ന്ന് നടത്തുന്ന സ്ഥാപനമെന്ന് പറഞ്ഞ് ജനവിശ്വാസം ആര്ജ്ജിച്ചാണ് ലീഗ് അണികളായ സമ്പന്നരെയും പാവങ്ങളെയും വലയില് വീഴ്ത്തിയത്. ലീഗ് നേതാക്കളുടെ സമ്മര്ദ്ദം കാരണമാണ് ആദ്യം ആരും പരാതി നല്കാന് തയ്യാറാവാതിരുന്നത്. നേതാക്കള് ഉറപ്പ് പാലിക്കാത്തതിലാണ് നിക്ഷേപകര് പോലീസില് പരാതി നല്കിയത്.
