BREAKING NEWSGULFNRIWORLD

ഫുട്‌ബോള്‍ ആരാധകര്‍ക്ക് താമസിക്കാന്‍ ആഢംബര കപ്പലുകളും; ഖത്തര്‍ ഒരുക്കുന്നത് 4000 മുറികളുള്ള രണ്ട് കപ്പലുകള്‍

ദോഹ: വര്‍ഷാവസാനം നടക്കുന്ന ഫിഫ ലോകകപ്പ് ഫുട്‌ബോള്‍ ഉല്‍സവത്തിനായി ലോകത്തിന്റെ വിവിധ ഭാഗങ്ങളില്‍ നിന്ന് എത്തിച്ചേരുന്ന ആരാധകര്‍ക്കായി വിസ്മയിപ്പിക്കുന്ന സൗകര്യങ്ങള്‍ ഒരുക്കുന്ന തിരക്കിലാണ് ടൂര്‍ണമെന്റിന്റെ പ്രാദേശിക സംഘാടകരായ സുപ്രിം കമ്മിറ്റി ഫോര്‍ ഡെലിവറി ആന്റ് ലെഗസി. മികച്ച സ്‌റ്റേഡിയങ്ങള്‍, ഗതാഗത സംവിധാനങ്ങള്‍ എന്നിവയ്‌ക്കൊപ്പം ഖത്തറിലെ ദിനങ്ങള്‍ ആഹ്ലാദകരമായ അനുഭവമാക്കി മാറ്റുന്നതിനായി ആകര്‍ഷകമായ താമസ ഇടങ്ങളാണ് അധികൃതര്‍ ഒരുക്കിയിരിക്കുന്നത്.
നിലവിലുള്ള സ്റ്റാര്‍ ഹോട്ടലുകള്‍ക്കു പുറമെ, ഒട്ടേറെ പുതിയ ഹോട്ടലുകള്‍ ഖത്തറില്‍ പ്രവര്‍ത്തനം തുടങ്ങി. അതോടൊപ്പം ഖത്തറിലെ വീടുകള്‍ രാജ്യത്തെത്തുന്ന അതിഥികള്‍ക്ക് താമസിക്കാനായി നല്‍കുന്ന പദ്ധതിയും അധികൃതര്‍ നടപ്പിലാക്കിയിട്ടുണ്ട്. ഇതിനകം 1,30,000ത്തിലേറെ ഹോട്ടല്‍ മുറികള്‍ മാത്രം ഫുട്‌ബോള്‍ ആരാധകര്‍ക്കായി ഒരുങ്ങിക്കഴിഞ്ഞു. എന്നാല്‍ ടിക്കറ്റ് വില്‍പ്പന വേളയില്‍ ജനങ്ങളില്‍ നിന്നുണ്ടായ മികച്ച പ്രതികരണത്തില്‍ നിന്ന് മനസ്സിലാവുന്നത് ആരാധകരുടെ വലിയ പ്രവാഹം തന്നെ ഖത്തറിലേക്ക് ഉണ്ടാകുമെന്ന തിരിച്ചറിവിലാണ് അധികൃതര്‍. അതുകൊണ്ടു തന്നെ കൂടുതല്‍ താമസ സൗകര്യങ്ങള്‍ കണ്ടെത്താനുള്ള നീക്കവും അധികൃതര്‍ ആരംഭിച്ചു കഴിഞ്ഞു.
ഇതിന്റെ ഭാഗമായി കടലില്‍ താമസ സൗകര്യമൊരുക്കാനാണ് അധികൃതര്‍ കണ്ടെത്തിയ വഴികളിലൊന്ന്. ഇതിനായി രണ്ട് ആഢംബര ക്രൂയിസ് കപ്പലുകളാണ് ഖത്തര്‍ ചാര്‍ട്ടര്‍ ചെയ്തിരിക്കുന്നത്. ഈ ആവശ്യം മുന്നില്‍ക്കണ്ട് ക്രൂയിസ് കപ്പല്‍ കമ്പനിയായ എംഎസ്‌സി ക്രൂയിസസുമായി ഇതുമായി ബന്ധപ്പെട്ട ഖത്തര്‍ സുപ്രിം കമ്മിറ്റി നേരത്തേ കരാറില്‍ ഏര്‍പ്പെട്ടിരുന്നു. രണ്ട് ആഢംബര കപ്പലുകളിലായി നാലായിരത്തിലേറെ കാബിനുകള്‍ ഒരുക്കാനാണ് അധികൃതര്‍ പദ്ധതിയിട്ടിരിക്കുന്നത്. കടലിലെ മനോഹരമായ കാഴ്ചകള്‍ കണ്ട് ആഢംബര സൗകര്യങ്ങളോടെ കഴിയാന്‍ അവസരം നല്‍കുന്നതാണ് ഈ കപ്പല്‍ ഹോട്ടലുകള്‍.
എംഎസ്‌സി ക്രൂയിസസിന്റെ യൂറോപ്പ, പൊയേഷ്യ എന്നീ ക്രൂയിസ് കപ്പലുകളാണ് ദോഹ തീരത്ത് ഒഴുകി നടക്കുന്ന ഹോട്ടലുകളായി പരിണമിക്കുക. ലോകകപ്പ് ആരാധകരെ വരവേല്‍ക്കുന്നതിന് അത്യാധുനിക സാങ്കേതിക വിദ്യ ഉപയോഗിച്ച് പരിസ്ഥതി സൗഹൃദമായി പ്രത്യേകമായി ഫ്രാന്‍സിലെ സെന്റ് നസാറെയില്‍ നിര്‍മിച്ചതാണ് യൂറോപ്പ. 13 റെസ്റ്റൊറന്റുകള്‍, സൗജന്യ വൈഫൈ, 14 നീന്തല്‍ കുളങ്ങള്‍, സ്പാകള്‍, വെല്‍നെസ് സെന്ററുകള്‍, അത്യാധുനിക ജിം, ബാറുകള്‍, കുട്ടികള്‍ക്കുള്ള കളിസ്ഥലം, കോണ്‍ഫറന്‍സ് ഹാള്‍, ബാസ്‌ക്കറ്റ് ബോള്‍ ടെന്നിസ് കോര്‍ട്ടുകള്‍, സിനിമാ തിയറ്ററുകള്‍, വിവിധ ഭാഷകള്‍ കൈകാര്യം ചെയ്യാന്‍ ശേഷിയുള്ള ജീവനക്കാര്‍ എന്നിവ കപ്പലുകളുടെ സവിശേഷതയാണ്.
രണ്ട് ഫ്‌ളോട്ടിംഗ് ഹോട്ടലുകള്‍ എന്ന രീതിയിലാണ് കപ്പലുകള്‍ സജ്ജമാക്കിയിരിക്കുന്നത്. ഫുട്‌ബോള്‍ പ്രേമികള്‍ക്ക് മികച്ച താമസ സൗകര്യമൊരുക്കുന്ന കാര്യത്തില്‍ എംഎസ്‌സി ക്രൂയിസസുമായി കൈകോര്‍ത്ത് പ്രവര്‍ത്തിക്കാനായതില്‍ ഏറെ സന്തോഷമുണ്ടെന്ന് സുപ്രിം കമ്മിറ്റി ജനറല്‍ സെക്രട്ടറി ഹസന്‍ അല്‍ തവാദി പറഞ്ഞു. കപ്പലിലെ മികച്ച സൗകര്യങ്ങളും പടിഞ്ഞാറന്‍ ഉള്‍ക്കടല്‍ കാഴ്ചകളുമായി ഒരിക്കലും മറക്കാത്ത താമസ അനുഭവമായിരിക്കും ഇവിടെ ലഭിക്കുകയെന്നും അദ്ദേഹം പറഞ്ഞു. ഈ കപ്പലുകളില്‍ നിന്ന് ലോകകപ്പ് സ്റ്റേഡിയങ്ങളിലേക്കും തിരിച്ചും യാത്ര ചെയ്യുന്നതിന് മികച്ച ഗതാഗത സംവിധാനവും അധികൃതര്‍ ഒരുക്കിയിട്ടുണ്ട്. ദോഹ മെട്രോ സ്‌റ്റേഷനുകളിലേക്ക് കാറുകള്‍, ബസ്സുകള്‍ എന്നിവയുടെ ഷട്ടില്‍ സര്‍വീസുകളാണ് ഇതില്‍ പ്രധാനം. ഏത് സമയത്തും കപ്പലുകളില്‍ നിന്ന് സ്റ്റേഡിയത്തിലേക്കും തിരിച്ചുമുള്ള യാത്ര ഇത് എളുപ്പമാക്കും.
ഫിഫ അക്കമഡേഷന്‍ ഏജന്‍സിയുടെ ഔദ്യോഗിക വെബ്‌സൈറ്റ് വഴിയാണ് കപ്പലുകളിലെ ഹോട്ടല്‍ മുറികള്‍ ബുക്ക് ചെയ്യേണ്ടത്. ഹോട്ടല്‍ മുറികളുടെ ലഭ്യത, മുറികളുടെ വാടക തുടങ്ങിയ കാര്യങ്ങള്‍ ഇനിയും പുറത്തിവിട്ടിട്ടില്ല. മാര്‍ച്ച് മാസത്തില്‍ തന്നെ ഇതുമായി ബന്ധപ്പെട്ട കൂടുതല്‍ വിവരങ്ങള്‍ ലഭ്യമാക്കുമെന്നാണ് പ്രതീക്ഷിക്കപ്പെടുന്നത്. ഫുട്‌ബോള്‍ മല്‍സരങ്ങള്‍ക്കൊപ്പം ഒരിക്കലും മറക്കാത്ത അനുഭവമാക്കി കപ്പലിന്റെ ആഢംബര താമസത്തെ മാറ്റിയെടുക്കാനുള്ള തയ്യാറെടുപ്പിലാണ് അധികൃതര്‍.

Related Articles

Back to top button

Adblock Detected

Please consider supporting us by disabling your ad blocker