മണിപ്പുരില്‍ വീണ്ടും വെടിവെപ്പ്: രണ്ടുപേര്‍ മരിച്ചു

ഇംഫാല്‍: കലാപത്തീ അണയാത്ത മണിപ്പുരില്‍ വെള്ളിയാഴ്ചയുണ്ടായ സുരക്ഷാസേനയും നാട്ടുകാരും തമ്മിലുണ്ടായ ശക്തമായ വെടിവെപ്പില്‍ രണ്ടുപേര്‍ കൊല്ലപ്പെട്ടു. അമ്പതോളംപേര്‍ക്ക് പരിക്കേറ്റു.
അസം റൈഫിള്‍സ് ജവാനും കുക്കി സമുദായക്കാരനുമാണ് മരിച്ചത്. രാവിലെ ആറോടെ തെങ്നൗപാല്‍, കാക്ചിങ് ജില്ലകളില്‍ പ്രതിഷേധക്കാരും അസം റൈഫിള്‍സും തമ്മിലാണ് വെടിവെപ്പുണ്ടായത്. പല്ലേല്‍ മേഖലയില്‍ ആരംഭിച്ച വെടിവെപ്പ് മറ്റിടങ്ങളിലേക്ക് വ്യാപിക്കുകയായിരുന്നു. ഇതോടെ താഴ്വരയില്‍ വീണ്ടും കര്‍ഫ്യൂ ഏര്‍പ്പെടുത്തി.
സൈനികവേഷം ധരിച്ചെത്തിയ മെയ്ത്തികള്‍ അക്രമം അഴിച്ചുവിടുകയായിരുന്നെന്ന് കുക്കികള്‍ ആരോപിച്ചു. മേയ് മൂന്നിന് മണിപ്പുരില്‍ ആരംഭിച്ച വംശീയസംഘര്‍ഷം ഇപ്പോഴും തുടരുകയാണ്. ഇതുവരെ 180-ലധികംപേര്‍ കൊല്ലപ്പെടുകയും നൂറുകണക്കിനുപേര്‍ക്ക് പരിക്കേല്‍ക്കുകയും ചെയ്തു.