BREAKING NEWSKERALALATEST

മതപഠനം നടത്താത്തതിന് അഡ്മിഷനിടെ കുട്ടിയെ അധിക്ഷേപിച്ച് കന്യാസ്ത്രീ; മാനനഷ്ടക്കേസ് കൊടുക്കാന്‍ കുടുംബം

കോതമംഗലം: മെറിറ്റ് സീറ്റില്‍ അഡ്മിഷന്‍ നേടാനായി എത്തിയ വിദ്യാര്‍ഥിനിയെ മതപഠനത്തോട് താത്പര്യമില്ലെന്ന് അറിയിച്ചതിന്റെ പേരില്‍ സ്‌കൂള്‍ അധികൃതര്‍ അവഹേളിച്ചതായി പരാതി. കോതമംഗലം രൂപതയുടെ കീഴിലുള്ള സെന്റ് അഗസ്റ്റിന്‍ ഗേള്‍സ് ഹയര്‍ സെക്കന്ററി സ്‌കൂള്‍ അധികൃതരാണ് തങ്ങളെയും മകളെയും അധിക്ഷേപിക്കുകയും മോശമായി സംസാരിക്കുകയും ചെയ്തതെന്നാണ് കോതമംഗലം സ്വദേശികളായ കുടുംബം ആരോപിക്കുന്നത്.
കോതമംഗലം വേങ്ങൂരാന്‍ വീട്ടില്‍ വി ഡി മാത്യുവിന്റെയും ദീപ്തി ഡന്നിയുടെയും മകള്‍ക്കാണ് ദുരനുഭവം നേരിട്ടത്. ജനറല്‍ വിഭാഗത്തില്‍ 24ാം റാങ്കോടു കൂടി അഡ്മിഷനു യോഗ്യത നേടിയിരുന്നുവെന്നാണ് കുട്ടി ബാലാവകാശ കമ്മീഷനു നല്‍കിയ പരാതിയില്‍ പറയുന്നത്. സെപ്റ്റംബര്‍ 25ാം തീയതി ഉച്ചയ്ക്ക് 2 മണിക്കാണ് കേസിനാസ്പദമായ സംഭവമുണ്ടായിരിക്കുന്നെന്ന് കുട്ടിയുടെ അമ്മ ദീപ്തി പറഞ്ഞത്. കുട്ടി വരേണ്ടതില്ലെന്ന് വാട്‌സാപ്പ് ഗ്രൂപ്പില്‍ നിര്‍ദ്ദേശം ലഭിച്ചിരുന്നു. ഇതേത്തുടര്‍ന്ന് അമ്മ കുട്ടിയെ കൂടാതെ ഒറ്റക്കാണ് സ്‌കൂളില്‍ എത്തിയത്. എന്നാല്‍, കുട്ടിയെ കാണണമെന്ന് സ്‌കൂള്‍ അധികൃതര്‍ നിര്‍ദ്ദേശിച്ചതു പ്രകാരം കുട്ടിയെ വിളിച്ചുകൊണ്ട് വരികയായിരുന്നു.
കുട്ടിയെ എത്തിച്ചതിനു പിന്നാലെ സ്‌കൂളിലുണ്ടായിരുന്ന സിസ്റ്റര്‍ ജസീന എന്ന കന്യാസ്ത്രീ രൂക്ഷമായ ഭാഷയില്‍ ശകാരിച്ചതായാണ് മാതാവ് പരാതിയില്‍ ആരോപിക്കുന്നത്. അതിന് പുറമെ, കൊവിഡ് കാലമായിരുന്നിട്ടു കൂടി മാസ്‌ക് നിര്‍ബന്ധിച്ച് അഴിപ്പിക്കുകയും ചെയ്തുവെന്ന് ആരോപിച്ചു. കന്യാസ്ത്രീയുടെ ശകാരത്തില്‍ താന്‍ വിഷമിച്ചു കരഞ്ഞെങ്കിലും കന്യാസ്ത്രീ നിര്‍ത്തിയില്ലെന്നും കുട്ടിയുടെ പരാതിയില്‍ പറയുന്നു.
അപേക്ഷയില്‍ കുട്ടി റോമന്‍ കത്തോലിക്ക വിഭാഗക്കാരി ആണെന്ന് മനസ്സിലായതോടെ ഏത് പള്ളിയിലാണ് പോകുന്നതെന്നും സണ്‍ഡേ ക്ലാസുകളില്‍ എവിടെയാണ് പോകുന്നതുമടക്കമുള്ള വിവരങ്ങള്‍ ചോദിച്ചു. എന്നാല്‍, മതപഠനത്തിന് പോകാറില്ലെന്നും നാലാം ക്ലാസ് വരെ മാത്രമാണ് സണ്‍ഡേ സ്‌കൂളില്‍ പോയതെന്നും കുട്ടി പറഞ്ഞു. തന്റെ മാതാപിതാക്കള്‍ മനുഷ്യസ്‌നേഹിയായാണ് തന്നെ വളര്‍ത്തുന്നത് എന്നുമായിരുന്നു കുട്ടിയുടെ മറുപടി. എന്നാല്‍ മറുപടിയില്‍ തൃപ്തരാകാത്ത അധികൃതര്‍ ഇങ്ങനെയുള്ള കുട്ടിയെ പഠിപ്പിക്കുന്നതിന് വികാരിയച്ചന്റെ അനുമതി വേണമെന്നും പറഞ്ഞു. ‘താന്‍ വിശ്വാസപ്രമാണം പഠിപ്പിക്കാനല്ല എത്തിയതെന്നും സയന്‍സ് പഠിപ്പിക്കാനുമാണ് എത്തിയത് എന്നു മറുപടി പറഞ്ഞു.’ കുട്ടിയുടെ അമ്മ പറഞ്ഞു.
ഇതില്‍ ക്ഷുഭിതയായ കന്യാസ്ത്രി ‘നീ അധികം സംസാരിക്കുകയൊന്നും വേണ്ട. അധികം സംസാരിക്കന്നവരെ എനിക്ക് ഇഷ്ടമല്ല. നിന്നെ കണ്ടപ്പോഴേ മനസ്സിലായി നീ എങ്ങനെ ഉള്ളതാണെന്ന്’ എന്നിങ്ങനെ രൂക്ഷമായ ഭാഷയില്‍ സംസാരിക്കുകയായിരുന്നു എന്നാണ് ആരോപണം. ‘കുട്ടിയെ ആദ്യം കൊണ്ടുവരാത്തപ്പോഴേ വശപ്പിശക് തോന്നി, നീ അമ്മ പറയുന്നത് ഒന്നും കേള്‍ക്കണ്ട എന്നും പള്ളിയിലോ മറ്റോ പോകണമെങ്കില്‍ സിസ്റ്ററോട് പറഞ്ഞാല്‍ മതിയെന്നും’ അവര്‍ കുട്ടിയോടു പറഞ്ഞെന്നും അമ്മ ആരോപിച്ചു.
സ്‌കൂള്‍ അധികൃതര്‍ക്കെതിരെ മാനനഷ്ടത്തിന് കേസ് നല്‍കുമെന്നും കുട്ടിയുടെ അമ്മ പറഞ്ഞു. പ്രിന്‍സിപ്പല്‍ സിസ്റ്റര്‍ ട്രീസ ജോസിന്റെ സാന്നിദ്ധ്യത്തില്‍ സി ജസീനയാണ് രൂക്ഷമായ ഭാഷയില്‍ തങ്ങളെ അപസഹിച്ചതെന്നാണ് ഇവര്‍ കേന്ദ്ര മനുഷ്യാവകാശ കമ്മീഷനെഴുതിയ പരാതിയില്‍ പറയുന്നത്. ‘മതപഠന ക്ലാസുകളില്‍ പങ്കെടുക്കാത്തതിനാണ് സി. ജസീന എന്ന കന്യാസ്ത്രീ എന്നെയും മകളെയും അധിക്ഷേപിക്കുകയായിരുന്നു. ആരെയും ജാതിയുടെയും മതത്തിന്റെയും പേരില്‍ ചെറുതായി കാണാതെ എല്ലാവരെയും ഒരു പോലെ കാണുന്ന രീതിയില്‍ മക്കളെ വളര്‍ത്തുന്ന മാതാപിതാക്കളാണ് ഞങ്ങള്‍.’ അമ്മയുടെ പരാതിയില്‍ പറയുന്നു.
സര്‍ക്കാര്‍ ശമ്പളം നല്‍കുന്നത് മതം പഠിപ്പിക്കാനല്ലെന്നും സ്‌കൂളുകളില്‍ മതം പഠിപ്പിക്കുന്നതിന് താന്‍ എതിരാണെന്നും കുട്ടിയുടെ അമ്മ പറഞ്ഞു. അതേസമയം, തങ്ങള്‍ നിരീശ്വരരല്ലെന്നും എന്നാല്‍ മതം പഠിപ്പിക്കാതെയാണ് കുട്ടികളെ വളര്‍ത്തുന്നതെന്നും അതിന് ഇനിയും താല്പര്യമില്ലെന്നും ദീപ്തി തുറന്നു പറഞ്ഞു.
അതേസമയം, കുട്ടിയ്ക്ക് സ്‌കൂള്‍ അധികൃതര്‍ അഡ്മിഷന്‍ നിഷേധിച്ചില്ലെന്ന് അമ്മയും സ്‌കൂള്‍ അധികൃതരും സമ്മതിച്ചു. എന്നാല്‍ കുട്ടിക്ക് അഡ്മിഷന്‍ നല്‍കിയത് ആരുടേയും ഔദാര്യമല്ലെന്നും സര്‍ക്കാര്‍ അലോട്ട് ചെയ്ത സീറ്റിലാണ് കുട്ടിക്ക് അഡ്മിഷന്‍ നല്‍കിയതെന്നും ദീപ്തി പറഞ്ഞു. എന്നാല്‍, ഇത്രയും പ്രശ്‌നമുണ്ടായ സ്‌കൂളില്‍ പഠിക്കാന്‍ തയ്യാറല്ലെന്നും അവര്‍ തങ്ങളുടെ ഭാഗത്താണ് ശരിയെന്ന് സ്ഥാപിക്കുന്നതിന് വേണ്ടി ഏതെങ്കിലും തരത്തില്‍ തങ്ങളെ കുടുക്കുവാന്‍ ശ്രമിക്കുമോ എന്ന ഭയമുണ്ടെന്നും കുട്ടിയുടെ അമ്മ പറഞ്ഞു. നീതി കിട്ടുന്നതിന് വേണ്ടി ഏതറ്റം വരേയും പോകുമെന്നും അവര്‍ കൂട്ടിച്ചേര്‍ത്തു.
എന്നാല്‍ ഈ ആരോപണങ്ങള്‍ സ്‌കൂള്‍ അധികൃതര്‍ നിഷേധിച്ചു. യാതൊരു പ്രകോപനവും ഉണ്ടാകാതെയാണ് കുട്ടിയുടെ അമ്മ പ്രതികരിച്ചത് എന്ന് സ്‌കൂള്‍ പ്രിന്‍സിപ്പാള്‍ സി. ട്രീസ ജോസ് സപ്രതികരിച്ചു. പ്രകോപനം ഒന്നും ഉണ്ടാകേണ്ട കാര്യം ഇല്ല. പരിചയപ്പെടുന്നതിന്റെ ഭാഗമായി സംസാരിക്കുകയായിരുന്നു. തങ്ങള്‍ അഡ്മിഷന്‍ നിഷേധിച്ചിട്ടില്ലെന്നും അവര്‍.
സംഭവസമയത്ത് താന്‍ അവധിയിലായിരുന്നുവെന്നും ചാനല്‍ ചര്‍ച്ചയിലൂടെയാണ് വിവരം അറിഞ്ഞതെന്നും പ്രിന്‍സിപ്പാള്‍ പറഞ്ഞു. ‘പ്രകോപനം ഒന്നും ഉണ്ടാകേണ്ട കാര്യം ഇല്ല. പരിചയപ്പെടുന്നതിന്റെ ഭാഗമായി സംസാരിക്കുകയായിരുന്നു.’ കുട്ടിയോടു മോശമായി പെരുമാറിയിട്ടില്ലെന്നും ആരോപണങ്ങള്‍ ദുഃഖകരമാണെന്നും അവര്‍ പ്രതികരിച്ചു. പരിചയപ്പെടുന്നതിന്റെ ഭാഗമായി മാസ്‌ക് മാറ്റി മുഖം കാണിക്കാന്‍ ആവശ്യപ്പെട്ടതാണെന്നും അല്ലാതെ തങ്ങള്‍ പ്രശ്‌നങ്ങള്‍ ഉണ്ടാക്കിയില്ലെന്ന നിലപാടിലാണ് സ്‌കൂള്‍ അധികൃതര്‍.

Related Articles

Back to top button

Adblock Detected

Please consider supporting us by disabling your ad blocker