BREAKING NEWSKERALA

മരട് ഫ്‌ളാറ്റ്: ഉടമകള്‍ക്ക് 91 കോടി രൂപ തിരികെ നല്‍കി

തിരുവനന്തപുരം: സുപ്രീംകോടതി നിര്‍ദേശപ്രകാരം പൊളിച്ചുനീക്കിയ മരട് ഫ്‌ളാറ്റിലെ ഉടമകള്‍ക്ക് 91 കോടി രൂപ തിരിച്ചുനല്‍കി. കഴിഞ്ഞ വര്‍ഷം ജനുവരിയിലാണ് ഫ്‌ളാറ്റ് ഇടിച്ചുനിരത്തിയത്. ഫ്‌ളാറ്റ് നിര്‍മാതാക്കള്‍ കെട്ടിട ഉടമകള്‍ക്കു നല്‍കിയ 120 കോടി രൂപയില്‍ 91 കോടി രൂപയാണ് ഇതിനകം തിരിച്ചുനല്‍കിയത്. സുപ്രീംകോടതി നിയമിച്ച ജസ്റ്റിസ് ബാലകൃഷ്ണന്‍ നായര്‍ കമ്മിറ്റിയുടെ മേല്‍നോട്ടത്തിലാണ് ഇതിന്റെ നടപടികള്‍ പൂര്‍ത്തിയാവുന്നത്. പണം തിരികെ ലഭിക്കാന്‍ അര്‍ഹതയുള്ള 272 ഫ്‌ളാറ്റുകളില്‍ 110 ഫ്‌ളാറ്റുകളുടെ ഉടമകള്‍ക്ക്, അവര്‍ കെട്ടിടനിര്‍മാതാവിനു നല്‍കിയ പണം പൂര്‍ണമായും തിരിച്ചുലഭിച്ചതായും ജസ്റ്റിസ് ബാലകൃഷ്ണന്‍ നായര്‍ കമ്മിറ്റി അറിയിച്ചു.
ഗോള്‍ഡന്‍ കായലോരം(37 ഫ്‌ളാറ്റുകള്‍), ജെയിന്‍ കോറല്‍ കോവ്(73 ഫ്‌ളാറ്റുകള്‍) എന്നീ ഫ്‌ളാറ്റ് സമുച്ചയങ്ങളിലെ ഫ്‌ളാറ്റുകളുടെ ആദ്യ ഉടമകള്‍ നിര്‍മാതാക്കള്‍ക്കു നല്‍കിയ തുക പൂര്‍ണമായി തിരിച്ചുനല്‍കി. ഗോള്‍ഡന്‍ കായലോരം ഉടമകള്‍ക്ക് 13.37 കോടിയും ജയിന്‍ കോറല്‍ കോവ് ഉടമകള്‍ക്ക് 32.16 കോടിയുമാണ് തിരികെ നല്‍കിയത്.
ആല്‍ഫ സെറിന്‍ എന്ന ഫ്‌ളാറ്റ് സമുച്ചയത്തിലെ(76 ഫ്‌ളാറ്റുകള്‍) ഉടമകള്‍ക്ക് ഫ്‌ളാറ്റുകളുടെ ആദ്യത്തെ ഉടമകള്‍ നല്‍കിയ 32.10 കോടി രൂപയില്‍ 25.63 കോടി രൂപ തിരികെ ലഭിച്ചു. ഇതില്‍ 17.50 കോടി രൂപ കേരള സര്‍ക്കാര്‍ ഇടക്കാല നഷ്ടപരിഹാരമായി നല്‍കിയതും ബാക്കി 8.13 കോടി രൂപ ആല്‍ഫാ വെഞ്ചേഴ്‌സ് കമ്പനിയില്‍നിന്നു പിരിച്ച് ഫ്‌ളാറ്റുടമകള്‍ക്ക് കമ്മിറ്റി നല്‍കിയിട്ടുള്ളതുമാണ്. ബാക്കി തുകയായ 6.47 കോടി രൂപ കെട്ടിടനിര്‍മാതാവില്‍നിന്നു പിരിക്കുന്നതിന് കമ്മിറ്റിയുടെ മേല്‍നോട്ടത്തില്‍ നിര്‍മാണക്കമ്പനിയുടെതന്നെ ഉടമസ്ഥതയില്‍ വല്ലാര്‍പാടത്തു സ്ഥിതിചെയ്യുന്ന ആല്‍ഫാ ഹൊറൈസണ്‍ എന്ന കെട്ടിടത്തില്‍ ഓഫീസുകള്‍ക്കുള്ള സ്ഥലം വില്‍പ്പന നടത്തിക്കൊണ്ടിരിക്കുകയാണ്. അടുത്ത മൂന്നുനാല് മാസത്തിനുള്ളില്‍ ഇതു പൂര്‍ത്തീകരിക്കാനാകുമെന്നു കരുതുന്നു.
ഈ മൂന്നു കെട്ടിടനിര്‍മാതാക്കളില്‍നിന്നും വീണ്ടെടുത്ത് ഫ്‌ളാറ്റുടമകള്‍ക്ക് കമ്മിറ്റി നല്‍കിയ മൊത്തം തുക 28.41 കോടി രൂപയാണ്. ഇടക്കാല നഷ്ടപരിഹാരമായി കേരള സര്‍ക്കാര്‍ നല്‍കിയ 62.75 കോടി രൂപയ്ക്കു പുറമേയാണിത്.
നാലാമത്തെ കെട്ടിടനിര്‍മാതാവായ ഹോളിഫെയ്ത്ത് ബില്‍ഡേഴ്‌സ് തുകയൊന്നുംതന്നെ അടച്ചിട്ടില്ല. കേരള സര്‍ക്കാരിനു നല്‍കേണ്ട 29 കോടി രൂപയും ഫ്‌ളാറ്റുടമകള്‍ക്കു നല്‍കേണ്ട 22.15 കോടി രൂപയും ഉള്‍പ്പെടെ 42.15 കോടി രൂപയാണ് ഈ നിര്‍മാതാവ് അടയ്ക്കാനുള്ളത്. ഹോളിഫെയ്ത്ത് എച്ച് ടു ഒയിലെ 86 ഫ്‌ളാറ്റുടമകള്‍ക്ക് സര്‍ക്കാര്‍ ഇടക്കാല നഷ്ടപരിഹാരമായി നല്‍കിയ 20 കോടി രൂപ മാത്രമാണ് ലഭിച്ചിട്ടുള്ളത്. ഈ കെട്ടിടനിര്‍മാതാവില്‍നിന്ന് റവന്യൂ റിക്കവറിയിലൂടെ പരമാവധി തുക തിരിച്ചുപിടിക്കുന്നതിനുള്ള സാധ്യതകളെക്കുറിച്ച് റിപ്പോര്‍ട്ട് സമര്‍പ്പിക്കാന്‍ എറണാകുളം ജില്ലാ കളക്ടറോട് സുപ്രീംകോടതി നിര്‍ദേശിച്ചിരുന്നു. കളക്ടറുടെ റിപ്പോര്‍ട്ട് പ്രകാരം ഈ കെട്ടിടനിര്‍മാതാവിന്റെ അസ്സല്‍ ആസ്തി 7.62 കോടി രൂപ മാത്രമാണ്. നവംബര്‍ 10ന് ഈ കേസില്‍ സുപ്രീംകോടതി വീണ്ടും വാദം കേള്‍ക്കും.
ജസ്റ്റിസ് ബാലകൃഷ്ണന്‍ നായര്‍ അധ്യക്ഷനായ സമിതിയില്‍, റിട്ട. ചീഫ് സെക്രട്ടറി കെ.ജോസ് സിറിയക്, റിട്ട. ചീഫ് എന്‍ജിനിയര്‍ ആര്‍.മുരുകേശന്‍ എന്നിവര്‍ അംഗങ്ങളാണ്. റിട്ട. ജില്ലാ ജഡ്ജി എസ്.വിജയകുമാറാണ് കമ്മിറ്റിയുടെ സെക്രട്ടറി.

Related Articles

Back to top button

Adblock Detected

Please consider supporting us by disabling your ad blocker