ഇപ്പോഴത്തെ ഫാഷന് ട്രെന്ഡില് മുന്നില് നില്ക്കുന്നതാണ് ക്രോപ്പ് ടോപ്പ്. എന്നാല് ഇതേ വസ്ത്രം ധരിച്ചതിന് രണ്ട് യുവതികളെ വിമാനത്തില് നിന്ന് പുറത്താക്കിയ വാര്ത്തയാണ് ഇപ്പോള് പുറത്ത് വരുന്നത്. താര കെഹിദി, ആന്ജ് തെരേസ ആരൗജോ എന്നിവരെയാണ് വിമാനത്തില് നിന്ന് പുറത്താക്കിയത്. ലോസ് ആഞ്ചല്സില് നിന്ന് ന്യൂ ഓര്ലിയന്സിലേക്ക് പോവുകയാണ് സ്പിരിറ്റ് എയര്ലൈന്സിലാണ് സംഭവം. വിമാനത്തില് കയറിയിരുന്ന ഉടന് തന്നെ ഇവരുടെ വസ്ത്രത്തെ ചൊല്ലി പ്രശ്നമുണ്ടാവുകയായിരുന്നു.
തുടക്കത്തില് കമ്പിളി വസ്ത്രങ്ങള് അണിഞ്ഞിരുന്നുവെങ്കിലും വിമാനത്തിലെ മോശം ശീതികരണം കാരണം കമ്പിളി വസ്ത്രങ്ങള് അഴിക്കേണ്ടി വന്നു. പിന്നീടുണ്ടായിരുന്ന വയറുകാണിക്കുന്ന ക്രോപ്പ് ടോപ്പാണ് പ്രശ്നത്തിന് കാരണമായതെന്ന് യുവതികള് ആരോപിക്കുന്നു. ന്യൂയോര്ക്ക് പോസ്റ്റ് പുറത്ത് വിട്ട റിപ്പോര്ട്ട് പ്രകാരം ഫ്ളൈറ്റിലെ പുരുഷ ഉദ്യോഗസ്ഥന് ഇവര്ക്കരികിലേക്ക് വന്ന് എന്തെങ്കിലും വസ്ത്രങ്ങള് ധരിക്കണമെന്ന് ആവശ്യപ്പെട്ടു. വിമാനത്തിലെ വസ്ത്രനിയമങ്ങള് എന്താണെന്നും അതുമായി ബന്ധപ്പെട്ട നിയമങ്ങള് എന്താണെന്ന് ആരാഞ്ഞപ്പോള് ഉദ്യോഗസ്ഥന് യാതൊന്നും പറയാതെ പോയി.
സഹയാത്രികര് യുവതികള്ക്കായി നിലകൊണ്ടെങ്കിലും പോലീസിനെ വിളിക്കുമെന്ന് സൂപ്പര്വൈസര് പറഞ്ഞതോടെ യുവതികള്ക്ക് വിമാനത്തില് നിന്ന് ഇറങ്ങേണ്ടിവന്നു.
ഞങ്ങള് ക്രോപ്പ് ടോപ്പാണ് ധരിച്ചത്. അല്പ്പം വയര് മാത്രമാണ് കാണുന്നുണ്ടായിരുന്നത്. വിവേചനമപരമായ നടപടിയാണിത് യുവതികളിലൊരാളായ കെഹ്ദി മാധ്യമങ്ങളോട് വിശദീകരിച്ചു
യുവതികള്ക്ക് വീണ്ടും മറ്റൊരു വിമാനം ബുക്ക് ചെയ്ത് പോവാനായി ഏകദേശം 10000 ഡോളര് ചിലവായെന്ന് ഇന്സ്റ്റാഗ്രാമില് ഇവര് പങ്കുവെച്ച പോസ്റ്റില് പറയുന്നു. ഫ്ളൈറ്റിലെ ഫോട്ടോയും വീഡിയോയും ഉള്പ്പെടെയാണ് ഇവര് പങ്കുവെച്ചത്. അവര്ക്ക് വീണ്ടും കമ്പിളി വസ്ത്രങ്ങള് ധരിച്ച് യാത്ര ചെയ്യാന് പോലും അവസരം തന്നില്ലെന്നും ക്രിമിനലുകളെ പോലെയാണ് ഞങ്ങളെ കൈകാര്യം ചെയ്തതെന്ന് യുവതികള് ആരോപിക്കുന്നു. നിയമനടപടികള്ക്കായി മുന്നോട്ട് പോവുകയാണെന്നും ഇവര് വ്യക്തമാക്കി.
സ്പിരിറ്റ് എയര്ലൈന്സിന്റെ പോളിസി പ്രകാരം മാന്യമായി വസ്ത്രം ധരിക്കണമെന്ന് മാത്രമാണ് നിയമാവലിയിലുള്ളത്. ഏത് വസ്ത്രം ധരിക്കരുതെന്ന് വ്യക്തമാക്കിയിട്ടില്ല. മാന്യമായ വസത്രം ധരിച്ച് വരാത്തവരെ വിമാനത്തില് യാത്ര ചെയ്യാന് അനുവദിക്കില്ലെന്ന് ഇവരുടെ ഔദ്യോഗിക വെബ്സൈറ്റില് വ്യക്തമാക്കിയിട്ടുണ്ട്.
യുവതികളുടെ വാര്ത്തകള് വളരെ പെട്ടെന്ന് തന്നെ വൈറലായി. എയര്ലൈനിന്റെ ഇത്തരം നടപടികള് അംഗീകരിക്കാനാവില്ലെന്ന് ചിലര് അഭിപ്രായപ്പെട്ടു. വ്യക്തമായ നിയമാവലി തയ്യാറാക്കാതെ ഇത്തരം നടപടികള്ക്ക് മുതിരുന്നത് യാത്രക്കാരെ ക്രുരമായി അപമാനിക്കലാണെന്ന് ഒരാള് പറഞ്ഞു
