BREAKING NEWSKERALALATEST

‘മുസ്ലീങ്ങള്‍ക്ക് എന്നില്‍ വിശ്വാസമുണ്ട്’: ലീഗിന് അവരുടെ അട്ടിപ്പേറവകാശമില്ലെന്ന് മുഖ്യമന്ത്രി

തിരുവനന്തപുരം: ന്യൂനപക്ഷക്ഷേമ വകുപ്പ് ഏറ്റെടുത്തതു സംബന്ധിച്ച് മുസ്ലീം ലീഗിന്റെ ആരോപണങ്ങള്‍ തള്ളി മുഖ്യമന്ത്രി പിണറായി വിജയന്‍. മുസ്ലീങ്ങളുടെ അട്ടിപ്പേറവകാശം ലീഗിനല്ലെന്ന് മുഖ്യമന്ത്രി പരിഹസിച്ചു. വകുപ്പ് വിഭജനം സംബന്ധിച്ച് ലീഗ് ഉയര്‍ത്തിയ ആരോപണം മാധ്യമങ്ങള്‍ ശ്രദ്ധയില്‍പ്പെടുത്തിയപ്പോഴായിരുന്നു മുഖ്യമന്ത്രിയുടെ മറുപടി.
ന്യൂനപക്ഷക്ഷേമ വകുപ്പ് മുഖ്യമന്ത്രി ഏറ്റെടുത്തതിനെ എല്ലാവരും സ്വാഗതം ചെയ്തതായാണ് കണ്ടതെന്ന് പിണറായി വിജയന്‍ വിശദീകരിച്ചു. ഏതെങ്കിലും കൂട്ടര്‍ക്ക് ഇതില്‍ ആശങ്കയുള്ളതായി തോന്നുന്നില്ല. മുസ്ലീം ലീഗല്ല വകുപ്പ് തീരുമാനിക്കുന്നതെന്നും മുസ്ലീം വിഭാഗത്തിന്റെ അട്ടിപ്പേറവകാശം ലീഗിനല്ലെന്നും മുഖ്യമന്ത്രി വ്യക്തമാക്കി.
എന്നിലും സര്‍ക്കാരിലും മുസ്ലീം വിഭാഗത്തിനു വിശ്വാസമുണ്ടെന്ന് എല്ലാവര്‍ക്കും അറിയാമെന്ന് മുഖ്യമന്ത്രി പറഞ്ഞു. നീക്കത്തിനു പിന്നില്‍ സഭാനേതൃത്വത്തിന്റെ ആവശ്യമല്ലെന്നും പൊതുവിലുള്ള ആലോചനയുടെ ഭാഗമായാണ് ഈ തീരുമാനം എടുത്തതെന്നും മുഖ്യമന്ത്രി പറഞ്ഞു. മുന്‍പ് കെടി ജലീലായിരുന്നു വകുപ്പ് കൈകാര്യം ചെയ്തിരുന്നത്. ന്യൂനപക്ഷക്ഷേമവും പ്രവാസികാര്യവും മികച്ച രീതിയില്‍ കൈകാര്യം ചെയ്യാവുന്നതാണെന്ന ചിന്തയിലാണ് മുഖ്യമന്ത്രി തന്നെ ആ വകുപ്പുകള്‍ ഏറ്റെടുക്കാന്‍ തീരുമാനിച്ചതെന്നും മുഖ്യമന്ത്രി വിശദീകരിച്ചു.
അതേസമയം, തൊട്ടുപിന്നാലെ മറുപടിയുമായി പി കെ കുഞ്ഞാലിക്കുട്ടി രംഗത്തെത്തി. മുഖ്യമന്ത്രിയുടെ നടപടി ഒരു പ്രത്യേക വിഭാഗത്തെ അപമാനിക്കുന്നതാണെന്നായിരുന്നു കുഞ്ഞാലിക്കുട്ടിയുടെ ആരോപണം. ഒരു മന്ത്രിയ്ക്ക് നല്‍കിയ വകുപ്പ് തിരിച്ചെടുക്കുന്നത് ശരിയായ നടപടിയല്ലെന്നും ഇത് സമുദായത്തെ അപമാനിക്കുന്നതിനു തുല്യമാണെന്നും കുഞ്ഞാലിക്കുട്ടി പറഞ്ഞു. ഏതു വകുപ്പ് കൊടുക്കുന്നു എന്നല്ല, കൊടുത്ത വകുപ്പ് തിരിച്ചെടുക്കുന്നതാണ് പ്രശ്‌നമെന്നും അദ്ദേഹം വ്യക്തമാക്കി.

Related Articles

Back to top button

Adblock Detected

Please consider supporting us by disabling your ad blocker