മൃതദേഹം മാറിനല്കിയ സംഭവത്തില് എറണാകുളം മെഡിക്കല് സെന്റര് ആശുപത്രി 25 ലക്ഷംരൂപ നഷ്ടപരിഹാരം നല്കണമെന്ന് സുപ്രീം കോടതി. 2009ല് ചികിത്സയിലിരിക്കെ മരിച്ച പുരുഷോത്തമന്റെയും കാന്തിയുടെയും മൃതദേഹങ്ങള് നല്കിയതിലാണ് തെറ്റുപറ്റിയത്. പുരുഷോത്തമന്റെ മക്കളായ പി.ആര്. ജയശ്രീയും പി.ആര്. റാണിയും നല്കിയ പരാതിയില് സംസ്ഥാന ഉപഭോക്തൃകമ്മിഷന് ഇവര്ക്ക് 25 ലക്ഷംരൂപ 12 ശതമാനം പലിശസഹിതം നഷ്ടപരിഹാരം നല്കാന് ആശുപത്രിയോട് ആവശ്യപ്പെട്ടിരുന്നു.
ഇതിനെതിരേ ആശുപത്രി നല്കിയ ഹര്ജിയില് അഞ്ചുലക്ഷംരൂപ പുരുഷോത്തമന്റെ കുടുംബത്തിനും 25 ലക്ഷം സംസ്ഥാന ഉപഭോക്തൃകമ്മിഷന്റെ നിയമസഹായ അക്കൗണ്ടിലേക്കും നല്കാനാണ് ദേശീയ കമ്മീഷന് ആശുപത്രിയോട് ആവശ്യപ്പെട്ടത്. ഇത് ചോദ്യംചെയ്ത് ആശുപത്രിയും പുരുഷോത്തമന്റെ മക്കളും നല്കിയ ഹര്ജികളിലാണ് ജസ്റ്റിസ് ഹിമ കോലി അധ്യക്ഷനായ ബെഞ്ചിന്റെ ഉത്തരവ്.
