തിരുവനന്തപുരം: മേയര് ആര്യ രാജേന്ദ്രനെതിരെ രജിസ്റ്റര് ചെയ്ത കേസിലെ അന്വേഷണത്തിന് കോടതി മേല്നോട്ടം ആവശ്യപ്പെട്ട് സമര്പ്പിച്ച ഹര്ജിയില് ഇന്ന് ഉത്തരവ്. കേസ് ശരിയായ ദിശയില് മുന്നോട്ട് പോകണമെങ്കില് കോടതിയുടെ മേല്നോട്ടം അനിവാര്യമാണെന്നാണ് കെഎസ്ആര്ടിസിയിലെ ഡ്രൈവറായിരുന്ന യദുവിന്റെ ആവശ്യം. മൂന്ന് മാസം കൂടുമ്പോള് അന്വേഷണ പുരോഗതി റിപ്പോര്ട്ട് കോടതിയില് ഹാജരാക്കാന് നിര്ദേശിക്കണമെന്നും യദു ആവശ്യപ്പെട്ടിട്ടുണ്ട്. തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതിയാണ് ഹര്ജി പരിഗണിക്കുന്നത്.
മേയര്ക്കെതിരെ താന് കന്റോണ്മെന്റ് പൊലീസ് സ്റ്റേഷനില് നല്കിയ പരാതിയില് കാര്യമായ അന്വേഷണം നടക്കുന്നില്ലെന്നാണ് യദുവിന്റെ വാദം. എന്നാല് തനിക്കെതിരെ മേയര് കൊടുത്ത പരാതിയില് പൊലീസ് അതിവേഗം നടപടികള് സ്വീകരിക്കുന്നുവെന്നും യദു പറയുന്നു. ഈ സാഹചര്യത്തിലാണ് അന്വേഷണം കോടതിയുടെ മേല്നോട്ടത്തില് വേണമെന്നാവശ്യപ്പെട്ട് കോടതിയെ സമീപിക്കുന്നത്.
കഴിഞ്ഞ ഏപ്രിലിലാണ് പാളയത്ത് വെച്ചായിരുന്നു തിരുവനന്തപുരം മേയറും കെഎസ്ആര്ടിസി ഡ്രൈവറും തമ്മില് നടുറോഡില് വാക്കേറ്റമുണ്ടായത്. പ്ലാമൂട് വെച്ച് ആദ്യം ബസ് കാറിനെ ഇടിക്കുന്ന രീതിയില് ഓടിച്ചെന്നും പിന്നാലെ ഡ്രൈവര് അശ്ലീല ആംഗ്യം കാണിച്ചെന്നുമായിരുന്നു മേയറുടെ പരാതി. ആര്യ രാജേന്ദ്രന്റെ പരാതിയില് യദുവിനെതിരെ പൊലീസ് കേസെടുത്തിട്ടുണ്ട്. കെഎസ്ആര്ടിസി ബസിന് കുറുകെ കാര് നിര്ത്തി ജോലി തടസപ്പെടുത്തുകയും ഭീഷണിപ്പെടുത്തുകയും ചെയ്തെന്ന് കാണിച്ചാണ് ഏപ്രില് 27 ന് യദു പൊലീസില് പരാതി നല്കിയെങ്കിലും കേസെടുക്കാന് പൊലീസ് ആദ്യം തയ്യാറായില്ല. പിന്നീട് കോടതി സമീപിച്ചതോടെയാണ് മേയര്ക്കും ഭര്ത്താവ് സച്ചിന് ദേവ് എംഎല്എയ്ക്കുമെതിരെ കേസെടുത്തത്. തനിക്കെതിരായ കേസില് അന്വേഷണം അതിവേഗം നീങ്ങുമ്പോള് താന് നല്കിയ കേസില് മെല്ലപ്പോക്കാണെന്നും യദു പരാതിപ്പെടുന്നു.
