വാഷിംഗ്ടണ്: അക്രമി ഓടയില് ഉപേക്ഷിച്ച് പോയ തോക്ക് എടുക്കാനുള്ള ശ്രമത്തില് വെടിയേറ്റ പൊലീസുകാരന് ദാരുണാന്ത്യം. അമേരിക്കയിലെ വാഷിംഗ്ടണില് ബുധനാഴ്ചയാണ് സംഭവം. 25വര്ഷമായി മെട്രോപൊലിറ്റന് പൊലീസ് സേനാംഗമായിരുന്ന വെയിന് ഡേവിഡ് എന്ന പൊലീസുകാരനാണ് വെടിയേറ്റ് കൊല്ലപ്പെട്ടത്.
കൊളംബിയയുടെ വടക്ക്കിഴക്കന് മേഖലയില് പതിവ് പട്രോളിംഗിനിറങ്ങിയ പൊലീസ് സംഘമാണ് ഒരു ബെക്കില് നിന്ന് ഓടയിലേക്ക് സംശയാസ്പദമായ വസ്തു വലിച്ചെറിഞ്ഞ ശേഷം അമിത വേഗതയില് വാഹനം ഓടിച്ച് പോവുന്നത് ശ്രദ്ധിക്കുന്നത്.
ബൈക്ക് യാത്രക്കാര് ഓടയിലേക്ക് വലിച്ചെറിഞ്ഞ കവര് എടുക്കാനുള്ള പൊലീസ് സംഘത്തിന്റെ ശ്രമത്തിനിടെ കവറിലുണ്ടായിരുന്ന തോക്കില് നിന്ന് വെടിപൊട്ടിയാണ് അപകടമുണ്ടായതെന്നാണ് പൊലീസുകാര് വിശദമാക്കുന്നത്. ഓടയിലേക്ക് തോക്ക് വലിച്ചെറിഞ്ഞ ബൈക്ക് യാത്രക്കാരനായുള്ള തെരച്ചില് പൊലീസ് ഊര്ജ്ജിതമാക്കിയിട്ടുണ്ട്. കവറിനുള്ളില് തോക്ക് ആണെന്ന് തിരിച്ചറിയും മുന്പ് അബദ്ധത്തില് വെടിപൊട്ടിയെന്നാണ് ഒപ്പമുണ്ടായിരുന്ന പൊലീസുകാര് വിശദമാക്കുന്നത്. പൊലീസുകാരന്റെ നെഞ്ചിലാണ് വെടിയേറ്റത്.
വൈകുന്നേരം അഞ്ചരയോടെയായിരുന്നു അപകടമുണ്ടായത്. സംഭവത്തില് തോക്ക് ഉപേക്ഷിച്ച യുവാവെന്ന് സംശയിക്കുന്ന ആളിന്റെ ദൃശ്യങ്ങള് പൊലീസ് ഇതിനോടകം പുറത്ത് വിട്ടിട്ടുണ്ട്. പരിക്കേറ്റ പൊലീസുകാരനെ എയര്ലിഫ്റ്റ് ചെയ്തെങ്കിലും ജീവന് രക്ഷിക്കാനായില്ല. നഗരത്തിന്റെ വിവിധ മേഖലകളില് നിന്ന് നൂറിലധികം തോക്കുകള് കണ്ടെത്തിയ ഉദ്യോഗസ്ഥനാണ് സേനയ്ക്ക് നഷ്ടമായതെന്നാണ് അധികൃതര് പ്രതികരിക്കുന്നത്.
