BREAKINGNATIONAL

വര്‍ഷം 25 ലക്ഷം രൂപ വരുമാനം, എന്നിട്ടും ഒന്നിനും തികയുന്നില്ല, പോസ്റ്റുമായി യുവാവ്, പിന്നാലെ വിമര്‍ശനം

വര്‍ഷത്തില്‍ എത്ര ലക്ഷം രൂപ കിട്ടിയാല്‍ നിങ്ങള്‍ക്ക് സന്തോഷത്തോടെ ജീവിക്കാം. അങ്ങനെ ഒരു ചോദ്യം ചോദിച്ചാല്‍ ഓരോരുത്തര്‍ക്കും ഓരോ ഉത്തരമായിരിക്കും അല്ലേ? എന്നാല്‍, 25 ലക്ഷം രൂപാ കിട്ടിയിട്ടും അതൊന്നും പോരാ എന്ന് പറയുന്ന ഒരു യുവാവാണ് ഇപ്പോള്‍ സോഷ്യല്‍ മീഡിയയില്‍ വിമര്‍ശനങ്ങളേറ്റു വാങ്ങുന്നത്.
ഇന്‍വെസ്റ്ററായ സൗരവ് ദത്തയാണ് ഈ വരുമാനമുണ്ടായിട്ടും കുടുംബത്തെ മുന്നോട്ട് കൊണ്ടുപോകുന്നത് വലിയ പാടുള്ള കാര്യമാണ് എന്ന് പറഞ്ഞിരിക്കുന്നത്. എക്‌സില്‍ (മുമ്പ് ട്വിറ്റര്‍) ആണ് സൗരവ് ദത്തയുടെ ഈ വെളിപ്പെടുത്തല്‍. എന്തായാലും, പോസ്റ്റ് അധികം വൈകാതെ തന്നെ വൈറലായി മാറുകയായിരുന്നു. നിരവധിപ്പേരാണ് പോസ്റ്റിനെ വിമര്‍ശിച്ചുകൊണ്ട് മുന്നോട്ട് വന്നത്.
ഗ്ലാസ്‌ഡോറിലെ ഒരു റിപ്പോര്‍ട്ട് പ്രകാരം രാജ്യത്തെ ശരാശരി വാര്‍ഷിക വരുമാനം ഏകദേശം 9.45 ലക്ഷം രൂപയാണ്. അതായത് മാസവരുമാനം 8000 മുതല്‍ 1.34 ലക്ഷം വരെ. മറ്റൊരു റിപ്പോര്‍ട്ട് പറയുന്നത് ഉത്തര്‍ പ്രദേശിലെ ശരാശരി സാലറി 20,730 ആണെന്നാണ്. ?ഗുജറാത്തില്‍ ഏകദേശം 18,880 ഉം. ഫോര്‍ബ്‌സിന്റെ ഒരു സര്‍വേ സൂചിപ്പിക്കുന്നത് പുരുഷ ജീവനക്കാര്‍ ശരാശരി 19.53 ലക്ഷം രൂപ സമ്പാദിക്കുന്നുവെന്നാണ്. എന്നാല്‍, സഹപ്രവര്‍ത്തകരായ സ്ത്രീകള്‍ 15.16 ലക്ഷം രൂപയും.
എന്നാല്‍, ശരാശരി ഇങ്ങനെയൊക്കെയാണെങ്കിലും ചില വ്യക്തികള്‍ ലക്ഷങ്ങളും കോടികളും സമ്പാദിക്കുന്നുണ്ട്. എന്നാല്‍, മറ്റ് ചിലരോ വളരെ തുച്ഛമായ വരുമാനമാണ് ഉണ്ടാക്കുന്നത്. വര്‍ഷം 27,000 രൂപ സമ്പാദിക്കുന്നവര്‍ ദാരിദ്ര്യരേഖയ്ക്ക് മുകളിലാണ്.
എന്നാല്‍, അതേ സാഹചര്യത്തിലാണ് സൗരവ് ദത്ത 25 ലക്ഷം രൂപ കൊണ്ട് വീട് മുന്നോട്ട് കൊണ്ടുപോകാനാകുന്നില്ല എന്ന് പറഞ്ഞിരിക്കുന്നത്. ഏകദേശം 1.5 ലക്ഷം രൂപയാണ് മാസം കിട്ടുന്നത്. മൂന്ന് പേരടങ്ങുന്നതാണ് കുടുംബം. അത്യാവശ്യ ചെലവുകള്‍ക്കായി ഏകദേശം ഒരു ലക്ഷം രൂപ ചെലവഴിക്കും. ഭക്ഷണം കഴിക്കുന്നതിനും വിനോദത്തിനും യാത്രയ്ക്കുമായി 25,000 രൂപ, കൂടാതെ 25,000 രൂപ എമര്‍ജന്‍സിക്കും മെഡിക്കല്‍ ആവശ്യങ്ങള്‍ക്കും. എല്ലാം കഴിയുമ്പോള്‍ സേവ് ചെയ്യാന്‍ ഒന്നുമില്ല എന്നാണ് പരാതി.
നിരവധിപ്പേരാണ് ഇതിന് മറുപടിയുമായി എത്തിയത്. സ്മാര്‍ട്ടായി നോക്കിയും കണ്ടും ചെലവാക്കിയാല്‍ ഇഷ്ടം പോലെ സേവ് ചെയ്യാം എന്നാണ് മിക്കവരും അഭിപ്രായപ്പെട്ടത്.

Related Articles

Back to top button