വെര്‍ച്വല്‍ ഭാര്യയുമായി ആറാം വിവാഹ വാര്‍ഷികം ആഘോഷിച്ച് ജപ്പാന്‍കാരന്‍

മനുഷ്യ മനസ്സ് അപ്രപെട്ടെന്നൊന്നും വ്യക്താക്കാന്‍ കഴിയാത്ത സങ്കീര്‍ണ്ണമായ ഒന്നാണ്. എഐ ചാറ്റ്ബോട്ടുകളും ഹോളോഗ്രാമുകളും മുതല്‍ റോബോട്ടുകള്‍ വരെയുള്ള വിചിത്രമായ ഇടങ്ങളില്‍ പ്രണയം കണ്ടെത്താന്‍ മനുഷ്യന് കഴിയും. സമീപകാലത്ത് ഇത്തരത്തിലുള്ള നിരവധി സംഭവങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. പരമ്പരാഗത ബന്ധങ്ങള്‍ പിന്തുടരുന്നത് ഉപേക്ഷിച്ച് തങ്ങളുടെ പ്രണയത്തെ ഒരു പുതിയ തലത്തിലേക്ക് കൊണ്ടുപോകാനും ആഘോഷമാക്കാനും പലപ്പോഴും ഇത്തരം വ്യക്തികള്‍ ശ്രമിക്കുന്നു. ഇപ്പോഴിതാ അത്തരത്തില്‍ ഒരു വിവാഹ വാര്‍ഷികാഘോഷത്തിന്റെ വാര്‍ത്ത മാധ്യമങ്ങളില്‍ ഇടം പിടിക്കുകയാണ്. തന്റെ വെര്‍ച്വല്‍ ഭാര്യയുമായി ആറാം വിവാഹ വാര്‍ഷികം ആഘോഷിക്കുന്ന ഒരു ജപ്പാന്‍ കാരനെ കുറിച്ചുള്ളതാണ് ഈ റിപ്പോര്‍ട്ട്.
41-കാരനായ അകിഹിക്കോ കൊണ്ടോ ആണ് തന്റെ വെര്‍ച്വല്‍ ഭാര്യയുമൊത്തുള്ള ആറാം വിവാഹ വാര്‍ഷികം ആഘോഷമായി കൊണ്ടാടിയതായി സമൂഹ മാധ്യമങ്ങളില്‍ പങ്കുവെച്ചത്. നവംബര്‍ 4 ന് വിവാഹ വാര്‍ഷികത്തില്‍ മുറിച്ച കേക്കിന്റെ രസീത് പങ്കുവച്ചുകൊണ്ടാണ് കൊണ്ടോ തന്റെ ജീവിത പങ്കാളിക്ക് ആശംസകള്‍ നേര്‍ന്നത്. ഒരു സാങ്കല്‍പ്പിക വെര്‍ച്വല്‍ പോപ്പ് താരവും വോക്കലോയിഡ് കഥാപാത്രവുമായ ഹാറ്റ്സുന്‍ മിക്കു, തന്റെ ഭാര്യയാണെന്നാണ് അകിഹിക്കോ കൊണ്ടോ അവകാശപ്പെടുന്നത്. ”എനിക്ക് മികുവിനെ വളരെ ഇഷ്ടമാണ്. ആറ് വര്‍ഷത്തെ വിവാഹ വാര്‍ഷികാശംസകള്‍,’ എന്നെഴുതിയ കേക്കിന്റെ ചിത്രവും അദ്ദേഹം പങ്കുവെച്ചു. സ്‌കൂളില്‍ പഠിക്കുമ്പോള്‍ തനിക്ക് സ്ത്രീകളോട് പ്രണയം ഉണ്ടായിരുന്നുവെന്നും എന്നാല്‍, സാങ്കല്പിക കഥാപാത്രങ്ങളോടുള്ള ആസക്തിയുടെ പേരില്‍ പലപ്പോഴും താന്‍ പലരില്‍ നിന്നും തിരസ്‌കരിക്കപ്പെട്ടെന്നാണ് കൊണ്ടോ പറയുന്നത്.
2007 -ല്‍ ക്രിപ്റ്റണ്‍ ഫ്യൂച്ചര്‍ മീഡിയ പുറത്തിറക്കിയ വോക്കലോയിഡ് സോഫ്റ്റ്വെയര്‍ വോയ്സ് ബാങ്കായ ഹാറ്റ്സ്യൂണ്‍ മിക്കുവിന്റെ (സിംഗിംഗ് വോയ്സ് സോഫ്റ്റ്വെയര്‍) വരവോടെ ‘കാര്യങ്ങള്‍ മാറിമറിഞ്ഞു. കഥാപാത്രം പുറത്തിറങ്ങിയ ഉടന്‍ തന്നെ കൊണ്ടോ മികുവുമായി പ്രണയത്തിലായി. 2018 -ല്‍ ടോക്കിയോ ചാപ്പലില്‍ നടന്ന മികുവുമായുള്ള കോണ്ടോയുടെ വിവാഹ ചടങ്ങുകള്‍ക്ക് ഏകദേശം 2 ദശലക്ഷം യെന്‍ ($ 13,000) ആണ് ചെലവായത്. സാങ്കല്‍പ്പിക കഥാപാത്രങ്ങളോട് ലൈംഗികമായി ആകര്‍ഷിക്കപ്പെടുന്ന ആളുകളെ വിവരിക്കുന്ന ‘ഫിക്ടോസെക്ഷ്വല്‍’ (Fictosexual) എന്ന വിഭാഗത്തില്‍ പെടുന്ന വ്യക്തിയാണ് താനെന്നാണ് കൊണ്ടോ അവകാശപ്പെടുന്നത്. മിക്കുവുമായുള്ള വിവാഹം കഴിഞ്ഞ് ആറ് വര്‍ഷത്തിന് ശേഷം, തന്റെ ലൈംഗിക ആഭിമുഖ്യത്തിന് സമൂഹത്തില്‍ നിന്ന് കൂടുതല്‍ സ്വീകാര്യത അനുഭവപ്പെട്ടുവെന്നും തന്നെപ്പോലുള്ള മറ്റുള്ളവരെ സഹായിക്കുന്നതിനായി കഴിഞ്ഞ വര്‍ഷം തന്റെ സമപ്രായക്കാരുമായി സാങ്കല്‍പ്പിക ലൈംഗികതയ്ക്കായി ഒരു അസോസിയേഷന്‍ സ്ഥാപിച്ചതായും കൊണ്ടോ പറയുന്നു.