BREAKING NEWSLATESTWORLD

വൈദികര്‍ പീഡിപ്പിച്ചത് രണ്ട് ലക്ഷം കുഞ്ഞുങ്ങളെ; മാര്‍പാപ്പയെ നേരില്‍ക്കണ്ട് ഫ്രഞ്ച് പ്രധാനമന്ത്രി ചര്‍ച്ച നടത്തി

വത്തിക്കാന്‍: എഴുപതു വര്‍ഷത്തിനിടെ ഫ്രാന്‍സിലെ കത്തോലിക്കാ പുരോഹിതര്‍ രണ്ട് ലക്ഷത്തിലധികം കുട്ടികളെ ലൈംഗികമായി ദുരുപയോഗിച്ചിട്ടുണ്ടെന്ന റിപ്പോര്‍ട്ടിനു പിന്നാലെ മാര്‍പാപ്പയുമായി കൂടിക്കാഴ്ച നടത്തി ഫ്രഞ്ച് പ്രധാനമന്ത്രി ഴോങ് കാസ്റ്റെ. വത്തിക്കാനിലെത്തി മാര്‍പാപ്പയുമായി ചര്‍ച്ച നടത്തിയ ഫ്രഞ്ച് പ്രധാനമന്ത്രി ഇറ്റാലിയന്‍ പ്രധാനമന്ത്രി മാരിയോ ഡ്രാഗിയുമായും ചര്‍ച്ച നടത്തി.
1950 മുതലുള്ള കാലത്ത് 216,000 കുട്ടികളെ ഫ്രാന്‍സിലെ കത്തോലിക്കാ പുരോഹിതര്‍ ലൈംഗികമായി ദുരുപയോഗം ചെയ്തിട്ടുണ്ടെന്ന റിപ്പോര്‍ട്ട് വലിയ വിവാദമായതിരുന്നു. വിഷയത്തില്‍ ഫ്രഞ്ച് കത്തോലിക്കാ സഭയ്‌ക്കെതിരെ ആഗോളതലത്തില്‍ വിമര്‍ശനം ഉയര്‍ന്നിട്ടുണ്ട്. സംഭവം കത്തോലിക്കാ സഭയ്ക്ക് മൊത്തത്തില്‍ നാണക്കേടാണെന്ന് മാര്‍പാപ്പ പ്രതികരിക്കുകയും ചെയ്തിരുന്നു. ‘എനിക്ക് നാണക്കേട്, നമുക്കാകെ നാണക്കേട്’ എന്നായിരുന്നു സംഭവത്തില്‍ മാര്‍പാപ്പുടെ പ്രതികരണം.
സംഭവത്തെ ഫ്രാന്‍സിലെ കത്തോലിക്കാ സഭാ നേതൃത്വവും അപലപിച്ചിരുന്നു. എന്നാല്‍ കുമ്പസാരത്തിനിടെ ആളുകള്‍ ലൈംഗികപീഡനത്തെപ്പറ്റി അറിയിച്ചാല്‍ വൈദികര്‍ക്ക് ഇത് റിപ്പോര്‍ട്ട് ചെയ്യാന്‍ കഴിയില്ലെന്ന് ഫ്രാന്‍സിലെ ബിഷപ് കോണ്‍ഫറന്‍സ് അധ്യക്ഷന്‍ ആര്‍ച്ച്ബിഷപ്പ് എറിക് ഡി മൗളിന്‍ ബ്യൂഫോര്‍ നടത്തിയ പ്രസ്താവയാണ് വീണ്ടും വിവാദത്തിനു തിരികൊളുത്തിയത്. സംഭവത്തില്‍ കഴിഞ്ഞ വര്‍ഷം വത്തിക്കാന്‍ സ്വീകരിച്ച നിലപാടിനു സമാനമായിരുന്നു ആര്‍ച്ച് ബിഷപ്പിന്റെ പ്രസ്താവനയും. ഇതിനു പിന്നാലെയാണ് മാര്‍പാപ്പയുമായി ഫ്രഞ്ച് പ്രധാനമന്ത്രി കൂടിക്കാഴ്ച നടത്തുന്നതെന്നതാണ് ശ്രദ്ധേയം.
കുമ്പസാരം ശക്തമായ കൗദാശഇക ഉടമ്പടിയുടെ ഭാഗമാണെന്നും പുരോഹിതര്‍ക്ക് കുമ്പസാര രഹസ്യം മറ്റൊരാളോടു വെളിപ്പെടുത്താന്‍ സാധിക്കില്ലെന്നുമാണ് കത്തോലിക്കാ സഭയുടെ നിലപാട്. എന്നാല്‍ കുമ്പസാരിക്കുന്ന വ്യക്തിയോടു വിവരം മറ്റൊരാളോടു വെളിപ്പെടുത്താന്‍ വൈദികനു നിര്‍ബന്ധിക്കാമെന്നും സഭ കഴിഞ്ഞ വര്‍ഷം പുതുക്കിയ മാര്‍ഗനിര്‍ദേശങ്ങളില്‍ വ്യക്തമാക്കുന്നുണ്ട്.
അതേസമയം, ലൈംഗികാക്രമണങ്ങള്‍ സംബന്ധിച്ച് സഭയുടെ നിലപാട് ഫ്രഞ്ച് നിയമത്തിന് എതിരാണെന്നാണ് ഇരകളുടെ അഭിഭാഷകര്‍ പറയുന്നത്. വൈദികര്‍ക്ക് ജോലിയുടെ ഭാഗമായി കുമ്പസാരരഹസ്യം സൂക്ഷിക്കാന്‍ ഫ്രാന്‍സിലെ നിയമം അനുവദിക്കുന്നുണ്ട്. എന്നാല്‍ കുട്ടികള്‍ക്കെതിരെയുള്ള ലൈംഗികപീഡനം അടക്കമുള്ള വിഷയങ്ങളില്‍ ഇക്കാര്യം ബാധകമല്ലെന്നാണ് അവര്‍ ചൂണ്ടിക്കാണിക്കുന്നത്.
അതേസമയം, വിവാദത്തിനു പിന്നാലെ ഫ്രഞ്ച് ആഭ്യന്തരമന്ത്രിയുമായി ചര്‍ച്ച നടത്തിയ ആര്‍ച്ച് ബിഷപ്പ് കുട്ടികളുടെ സംരക്ഷണം ഏറ്റവും പ്രാധാന്യത്തോടെ കാണുന്ന വിഷയമാണെന്നാണ് പ്രതികരിച്ചത്. വത്തിക്കാനിലേയ്ക്കുള്ള ഫ്രഞ്ച് പ്രധാനമന്ത്രിയുടെ സംഘത്തില്‍ ആര്‍ച്ച്ബിഷപ്പും ഉള്‍പ്പെടുന്നുണ്ട്. ഫ്രഞ്ച് വിദേശകാര്യമന്ത്രി ഴോങ് യെ ലെ ഡ്രയനും സംഘത്തിലുണ്ട്. ഫ്രാന്‍സും വത്തിക്കാനും തമ്മില്‍ നയതന്ത്രബന്ധം സ്ഥാപിച്ച് 100 വര്‍ഷം പിന്നിടുന്ന സാഹചര്യത്തിലാണ് ഫ്രഞ്ച് നേതൃത്വം വത്തിക്കാനിലെത്തുന്നത്.
അടുത്തിടെ പുറത്തിറങ്ങിയ റിപ്പോര്‍ട്ടില്‍ കുട്ടികളെ പീഡിപ്പിച്ച മൂവായിരത്തിലധികം വൈദികരുടെ പേരുകളാണ് പരാമര്‍ശിക്കുന്നത്. പീഡനത്തിനു ശേഷം ഇരകളെ നിശബ്ദരാക്കാനും അവഗണിക്കാനും ശ്രമിച്ചെന്നും സംഭവം മൂടിവെക്കാന്‍ സഭ ശ്രമിച്ചെന്നുമായിരുന്നു റിപ്പോര്‍ട്ടില്‍ വ്യക്തമാക്കിയത്. ഒക്ടോബര്‍ അഞ്ചാം തീയതിയാണ് റിപ്പോര്‍ട്ട് പുറത്തിറങ്ങിയത്.

Related Articles

Back to top button

Adblock Detected

Please consider supporting us by disabling your ad blocker