BREAKING NEWSKERALA

സംസ്ഥാന നേതൃത്വത്തില്‍ ചേരിപ്പോര്; കാനം രാജേന്ദ്രനെതിരെ കേന്ദ്ര നേതൃത്വത്തിന് പരാതിയുമായി ഇസ്മായില്‍

തിരുവനന്തപുരം: ഡി.രാജയ്‌ക്കെതിരായ കാനത്തിന്റെ വിമര്‍ശനം ആയുധമാക്കി ഇസ്മായില്‍ പക്ഷം. കാനത്തിന്റെ പ്രസ്താവന ജനറല്‍ സെക്രട്ടറിയെ ദുര്‍ബലപ്പെടുത്തുന്നതാണെന്ന പരാതിയുമായി ഇസ്മായില്‍ കേന്ദ്ര നേതൃത്വത്തെ സമീപിച്ചു. ഇതോടെ ഇടവേളയ്ക്കുശേഷം സിപിഐയില്‍ ഗ്രൂപ്പ് പോര് വീണ്ടും സജീവമാവുകയാണ്.
കാനത്തിന്റെ വിമര്‍ശനം അസാധാരണവും അനുചിതവുമാണെന്ന് കെ ഇ ഇസ്മായില്‍ കേന്ദ്രനേതൃത്വത്തിന് നല്‍കിയ പരാതിയില്‍ പറയുന്നു. ജനറല്‍ സെക്രട്ടറിയെ ദുര്‍ബലപ്പെടുത്തുന്ന പ്രസ്താവന സംസ്ഥാന സെക്രട്ടറി തന്നെ നടത്തിയത് ശരിയായില്ലെന്നും ഇസ്മായില്‍. ഇസ്മായില്‍ പക്ഷത്തെ പ്രധാന നേതാക്കള്‍ കേന്ദ്രനേതൃത്വത്തെ ഫോണില്‍ ബന്ധപ്പെട്ടും കാനത്തിനെതിരെ പരാതി അറിയിച്ചിട്ടുണ്ട്.
ജനറല്‍ സെക്രട്ടറിയെ പരസ്യമായി തള്ളിപ്പറഞ്ഞ സംസ്ഥാന സെക്രട്ടറി കാനം രാജേന്ദ്രന്റെ നിലപാട് ദേശീയ എക്‌സിക്യൂട്ടീവ് ചര്‍ച്ച ചെയ്യും. തെറ്റായി ഒന്നും പറഞ്ഞിട്ടില്ലെന്നും പാര്‍ട്ടി നേതൃയോഗങ്ങളില്‍ ഉയര്‍ന്നുവന്ന വികാരം കേന്ദ്ര നേതൃത്വത്തെ അറിയിക്കാന്‍ ബിനോയ് വിശ്വത്തെ ചുമതലപ്പെടുത്തിയ കാര്യം മാത്രമാണ് വാര്‍ത്താ സമ്മേളനത്തില്‍ പറഞ്ഞത് എന്നുമാണ് കാനത്തിന്റെ വിശദീകരണം.
ഡാങ്കെയെ പരാമര്‍ശിച്ചതൊക്കെ ചരിത്രം ഓര്‍മിപ്പച്ചതാണെന്നും കാനം നിലപാടെടുക്കുന്നു. കഴിഞ്ഞ സംസ്ഥാന സമ്മേളനത്തോടെ പാര്‍ട്ടിയില്‍ പൂര്‍ണമായും കാനം പക്ഷത്തിന്റെ ആധിപത്യമായിരുന്നു. കഴിഞ്ഞ ദിവസം ഇടുക്കി ജില്ലാ സെക്രട്ടറി കെ കെ ശിവരാമന്‍ ഉള്‍പ്പെടെ ഇസ്മായില്‍ പക്ഷത്തെ പല നേതാക്കള്‍ക്കെതിരെയും നടപടിയും നേരിടേണ്ടി വന്നു. എന്നാല്‍ ജനറല്‍ സെക്രട്ടറിയെ വിമര്‍ശിച്ച കാനത്തിന്റെ നടപടി വീണ്ടും ഇസ്മായില്‍ പക്ഷത്തെ സജീവമാക്കുകയാണ്.
പാര്‍ട്ടി സമ്മേളനങ്ങള്‍ ആരംഭിക്കാനിരിക്കെ എതിര്‍ വിഭാഗത്തിന്റെ നീക്കങ്ങളെ ശക്തമായി പ്രതിരോധിക്കാന്‍ തന്നെയാണ് ഔദ്യോഗിക പക്ഷത്തിന്റെ തീരുമാനം. കേരള പൊലീസിനെ ഉത്തര്‍പ്രദേശ് പൊലീസുമായി താരതമ്യം ചെയ്തതിനാണ് പാര്‍ട്ടി ജനറല്‍ സെക്രട്ടറി ഡി.രാജയെ സിപിഐ സംസ്ഥാന സെക്രട്ടറി കാനം രാജേന്ദ്രന്‍ പരസ്യമായി വിമര്‍ശിച്ചത്. ജനറല്‍ സെക്രട്ടറിയായാലും പാര്‍ട്ടി മാനദണ്ഡം ലംഘിച്ചാല്‍ വിമര്‍ശിക്കുമെന്നു പറഞ്ഞ കാനം, ഉത്തര്‍ പ്രദേശ് പൊലീസിനെ പോലെയല്ല കേരളാ പൊലീസെന്നും കേരളാ പൊലീസ് വ്യത്യസ്തമാണെന്നും പറഞ്ഞു.
ജനറല്‍ സെക്രട്ടറിയെ വിമര്‍ശിച്ചതില്‍ എന്താണ് കുഴപ്പം. ജനറല്‍ സെക്രട്ടറിയുടെ ഭാഗത്ത് കുഴപ്പം ഉണ്ടെങ്കില്‍ വിമര്‍ശിക്കും. ഡാങ്കെയെ വിമര്‍ശിച്ച പാര്‍ട്ടിയാണ് സിപിഐ. ജനറല്‍ സെക്രട്ടറിയായാലും ചെയര്‍മാനായാലും സ്റ്റേറ്റ് സെക്രട്ടറിയായാലും പാര്‍ട്ടിയുടെ മാനദണ്ഡങ്ങള്‍ ലംഘിക്കാന്‍ പാടില്ല. അത് അനുസരിക്കണം. ഇല്ലെങ്കില്‍ വിമര്‍ശിക്കുമെന്നും കാനം വാര്‍ത്താ സമ്മേളനത്തില്‍ പറഞ്ഞു.
മൂന്നു ദിവസങ്ങളിലായി നടന്ന പാര്‍ട്ടി സംസ്ഥാന എക്‌സിക്യൂട്ടീവ്, കൗണ്‍സില്‍ യോഗങ്ങളില്‍ ജനറല്‍ സെക്രട്ടറി ഡി.രാജയ്ക്കും ദേശീയ എക്‌സിക്യൂട്ടീവ് അംഗം ആനി രാജയ്ക്കും എതിരേ രൂക്ഷമായ വിമര്‍ശനങ്ങള്‍ ഉയര്‍ന്നിരുന്നു. ഈ വിമര്‍ശനങ്ങളെ ന്യായീകരിച്ചാണ് കാനം വാര്‍ത്താ സമ്മേളനത്തില്‍ നിലപാട് വ്യക്തമാക്കിയത്.
ദേശീയ എക്‌സിക്യൂട്ടീവ് തീരുമാനങ്ങള്‍ വിശദീകരിക്കുമ്പോഴല്ല, രാജ സംസ്ഥാന പൊലീസിനെ വിമര്‍ശിച്ചത്. പത്ര സമ്മേളനത്തിനു ശേഷം മാധ്യമങ്ങളെ കണ്ടപ്പോഴാണ് ഡി.രാജ അഭിപ്രായം പറഞ്ഞത്. ചോദ്യത്തിന് അനുസരിച്ചായിരുന്നു പ്രതികരണം. അത് ദേശീയ എക്‌സിക്യൂട്ടീവിന്റേയോ ദേശീയ സെക്രട്ടേറിയറ്റിന്റേയോ അഭിപ്രായമല്ല. ദേശീയ എക്‌സിക്യൂട്ടീവ് അംഗങ്ങള്‍ സംസ്ഥാന രാഷ്ട്രീയത്തെ കുറിച്ച് പ്രതികരിക്കുമ്പോള്‍ സംസ്ഥാന ഘടകത്തിന്റെ കൂടി അനുമതി വേണമെന്നാണ് തീരുമാനം.
ആ തീരുമാനം ലംഘിക്കപ്പെട്ടു എന്നതാണ് തന്റെ കത്തില്‍ പറഞ്ഞത്. ആ തീരുമാനം ഒരു ദേശീയ എക്‌സിക്യുട്ടീവ് അംഗം ലംഘിച്ചു എന്നായിരുന്നു പരാതി. കത്തില്‍ ഞാന്‍ പറഞ്ഞ കാര്യങ്ങള്‍ ശരിയാണെന്ന് ദേശീയ എക്‌സിക്യൂട്ടീവും ശരിവച്ചെന്ന് കാനം പറഞ്ഞു. വനിതാ നേതാവ് എന്തു പറഞ്ഞു എന്നതല്ല, നിലവിലെ മാനദണ്ഡം ലംഘിച്ചു എന്നതാണ് പ്രശ്‌നം. അതു ലംഘിച്ചു എന്നതു തന്നെയാണ് പാര്‍ട്ടിയുടെ വിലയിരുത്തലെന്ന് ആനി രാജയുടെ വിവാദ പരാമര്‍ശം സൂചിപ്പിച്ച് കാനം വ്യക്തമാക്കി.
ഉത്തര്‍ പ്രദേശും കേരളവും ഒരു പോലെ എന്നാണ് ഡി.രാജ പറഞ്ഞത്. അക്കാര്യത്തില്‍ അങ്ങനെയല്ല, അദ്ദേഹം പറഞ്ഞത് തെറ്റാണ്. സിപിഐയുടെ അഭിപ്രായവും അതല്ല. ഉത്തര്‍പ്രദേശും കേരളവും ഒരു പോലെയല്ല. കേരളം വ്യത്യസ്തമണ്. അത് അദ്ദേഹത്തിന് അറിയാവുന്നതാണ്. ഓക്‌സിജന്‍ ഇല്ലെന്നു പറഞ്ഞതിന് ഡോക്ടര്‍ക്കെതിരെ കേസെടുത്ത പൊലീസാണ് ഉത്തര്‍ പ്രദേശിലേത്. കേരളത്തിലെ പൊലീസ് കോവിഡ് കാലത്ത് എപ്പോഴും നിരത്തിലുള്ള പൊലീസാണ്. രണ്ടും വ്യത്യസ്തമാണ്.
കേരളാ പൊലീസിന്റെ ഒറ്റപ്പെട്ട തെറ്റുകള്‍ മാധ്യമങ്ങള്‍ സാമാന്യവത്കരിക്കുകയാണ്. തെറ്റുണ്ടാകുമ്പോള്‍ പൊലീസ് തിരുത്തുകയും നടപടി എടുക്കുകയും ചെയ്യുന്നുണ്ട്. എന്നാല്‍ ഉത്തര്‍പ്രദേശ് പൊലീസ് അങ്ങനെയല്ലെന്നും കാനം രാജേന്ദ്രന്‍. സംസ്ഥാന കൗണ്‍സിലിലും സെക്രട്ടേറിയറ്റിലും നടന്ന ചര്‍ച്ചകള്‍ ഡി.രാജയെ അറിയിക്കാന്‍ ദേശീയ സെക്രട്ടേറിയറ്റ് അംഗമായ ബിനോയ് വിശ്വത്തെ സിപിഐ സംസ്ഥാന കൗണ്‍സില്‍ യോഗം ചുമലതപ്പെടുത്തി.
കേരളാ പൊലീസില്‍ ആര്‍എസ്എസ് ഗ്യാംഗ് പ്രവര്‍ത്തിക്കുന്നുണ്ടെന്നും മുഖ്യമന്ത്രി ഇക്കാര്യം ശ്രദ്ധിക്കണം എന്നുമായിരുന്നു ഡല്‍ഹിയില്‍ മാധ്യമങ്ങളെ കണ്ടപ്പോള്‍ ആനി രാജ പറഞ്ഞത്. ഇതിനെതിരേ തൊട്ടടുത്ത ദിവസം തന്നെ കാനം രാജേന്ദ്രന്‍ പാര്‍ട്ടി ദേശീയ നേതൃത്വത്തിന് പരാതി നല്‍കിയിരുന്നു. ആനി രാജയുടെ നടപടി പാര്‍ട്ടി ദേശീയ എക്‌സിക്യൂട്ടീവ് തീരുമാനത്തിന്റെ ലംഘനം എന്നായിരുന്നു കത്തിലെ ആരോപണം

Related Articles

Back to top button

Adblock Detected

Please consider supporting us by disabling your ad blocker