ദില്ലി: ഹിന്ഡന്ബര്ഗ് ഉയര്ത്തിയ ആരോപണം തള്ളി സെബി ചെയര്പേഴ്സണ് മാധബി പുരി ബുച്ച്. ഹിന്ഡന്ബര്ഗ് സ്വഭാവഹത്യ നടത്തുകയാണ്. എല്ലാ നിക്ഷേപങ്ങളും സെബിയെ അറിയിച്ചതാണെന്നും മാധബി പുരി ബുച്ച് പറഞ്ഞു. ഏത് ഏജന്സിക്കും രേഖകള് നല്കാന് തയ്യാറാണ്. ഹിന്ഡന്ബര്ഗിന് കാരണം കാണിക്കല് നോട്ടീസ് നല്കിയതിന്റെ പ്രതികാരമെന്ന് മാധബി ബുച്ച് പറഞ്ഞു. ഇന്നലെയാണ് സെബി ചെയര്പേഴ്സണെതിരെ പുതിയ വെളിപ്പെടുത്തലുമായി ഹിന്ഡന് ബര്ഗ് രം?ഗത്തെത്തിയത്.
സെബി ചെയര്പേഴ്സണ് മാധബി ബുച്ചിനും, ഭര്ത്താവിനും അദാനി ഗ്രൂപ്പിലേക്ക് പണമെത്തിയ നിഴല് കമ്പനികളില് നിക്ഷേപം ഉണ്ടായിരുന്നുവെന്നാണ് ഹിന്ഡന് ബര്ഗ് കണ്ടെത്തല്. അദാനിക്കെതിരായ അന്വേഷണം സെബി മന്ദഗതിയിലാക്കിയതിന് പിന്നില് ഈ ബന്ധമെന്നും ഹിന്ഡന് ബര്ഗ് റിപ്പോര്ട്ടിലുണ്ട്. അദാനിക്കെതിരെ മുന്പ് ഹിന്ഡന് ബര്ഗ് നടത്തിയ വെളിപ്പെടുത്തല് രാജ്യത്ത് വലിയ കോളിളക്കം ഉണ്ടാക്കിയിരുന്നു. ഓഹരി വിപണിയുമായി ബന്ധപ്പെട്ട് അദാനി ഗ്രൂപ്പ് കൃത്രിമത്വം കാട്ടിയെന്നാണ് ഹിന്ഡന്ബര്ഗ് നേരത്തെ പുറത്ത് വിട്ട റിപ്പോര്ട്ട്. 2023 ജനുവരി 24നായിരുന്നു അദാനി ഗ്രൂപ്പിനെതിരെ വന് വെളിപ്പെടുത്തലുകളുമായി ഹിന്ഡന്ബര്ഗ് റിസര്ച്ച് റിപ്പോര്ട്ട് പുറത്തുവന്നത്. ഓഹരികള് പെരുപ്പിച്ച് കാട്ടി അദാനി വന് ലാഭം കൊയ്തുവെന്നും, അതു വഴി കൂടുതല് വായ്പകള് സംഘടിപ്പിക്കുന്നുവെന്നുമായിരുന്നു കഴിഞ്ഞ വര്ഷം പുറത്ത് വിട്ട റിപ്പോര്ട്ടിലുണ്ടായിരുന്നത്.
യുഎസ് ആസ്ഥാനമായുള്ള ഗവേഷക സ്ഥാപനമായ ഹിന്ഡന്ബര്ഗ് റിസര്ച്ചിന്റെ റിപ്പോര്ട്ട് വരുന്നതിന് തലേന്ന് അദാനിയുടെ ആകെ ഓഹരി മൂല്യം19.2 ലക്ഷം കോടി രൂപയായിരുന്നു. അദാനി ഗ്രൂപ്പ് ഓഹരി മൂല്യം ഉയര്ത്തി കാട്ടി തട്ടിപ്പ് നടത്തി എന്നാണ് റിപ്പോര്ട്ടിലെ ആരോപണം. ഒരു ദശാബ്ദക്കാലമായി ഓഹരി വിപണിയില് കൃത്രിമത്വം കാട്ടിയെന്നും മാത്രമല്ല, അക്കൗണ്ടിംഗ് തട്ടിപ്പുകളിലും ഈ കമ്പനി ഉള്പ്പെട്ടിട്ടുണ്ടെന്ന് റിപ്പോര്ട്ട് പറഞ്ഞു. റിപ്പോര്ട്ട് പുറത്ത് വന്നതിന് പിന്നാലെ അദാനിയുടെ ഓഹരി മൂല്യം കുത്തനെ ഇടിഞ്ഞിരുന്നു.
