തിരുവനന്തപുരം: നെടുമങ്ങാട് കെഎസ്ആര്‍ടിസി ഡിപ്പോയില്‍ എത്തിച്ച ഡീസലില്‍ വന്‍ വെട്ടിപ്പ്. 15,000 ലിറ്റര്‍ ഡീസല്‍ എത്തിച്ചപ്പോഴാണ് 1000 ലിറ്ററിന്റെ കുറവ് കണ്ടെത്തിയത്. ഡീസല്‍ അളവിലെ കുറവ് വിവാദമായതോടെ അടുത്ത ടാങ്കറില്‍ ബാക്കി ഡീസല്‍ എത്തിക്കുകയായിരുന്നു.
കഴിഞ്ഞ കുറേ മാസങ്ങളായി നെടുമങ്ങാട് ഡിപ്പോയിലെത്തുന്ന ഡീസലിന്റെ അളവില്‍ കുറവുണ്ടെന്ന് ജീവനക്കാര്‍ പരാതിപ്പെട്ടിരുന്നു. ജീവനക്കാര്‍ നിരന്തരം പരാതി പറഞ്ഞിട്ടും അളവ് പരിശോധിക്കാന്‍ ഡിപ്പോ അധികൃതര്‍ മെനക്കെട്ടതുമില്ല. ഒടുവില്‍ കഴിഞ്ഞ ദിവസം രാത്രി ഡിപ്പോയില്‍ എത്തിച്ച ഡീസല്‍ അളന്ന് നോക്കിയപ്പോഴാണ് ഡീസലിലെ കുറവ് വ്യക്തമായത്. 15,000 ലിറ്റര്‍ എത്തിക്കേണ്ടയിടത്ത് ടാങ്കറിലുണ്ടായിരുന്നത് 14, 000 ലിറ്റര്‍. 1000 ലിറ്ററിന്റെ കുറവ്.
നെടുമങ്ങാട് എംഎസ് ഫ്യുവല്‍സ് എന്ന സ്ഥാപനമാണ് ഡിപ്പോയില്‍ ഡീസലെത്തിക്കുന്നത്.
അളവിലെ കുറവ് ജീവനക്കാര്‍ കണ്ടുപിടിച്ചതോടെ അടുത്ത ടാങ്കറില്‍ ബാക്കി 1000 ലിറ്ററെത്തിച്ചു. ജീവനക്കാര്‍ കണ്ടുപിടിച്ചില്ലായിരുന്നെങ്കില്‍ കെഎസ്ആര്‍ടിസിക്ക് നഷ്ടം ഏകദേശം 96,000 രൂപ. നെടുമങ്ങാട് ഡിപ്പോയില്‍ മൈലേജ് കുറവാണെന്നായിരുന്നു കഴിഞ്ഞ മാസങ്ങളില്‍ ഡിപ്പോ അധികൃതര്‍ ജീവനക്കാരോട് പറഞ്ഞിരുന്നത്.
മെക്കാനിക്കിന്റെയും ഡ്രൈവറുടെ പിടിപ്പുകേട് കൊണ്ടാണ് മൈലേജ് കിട്ടാത്തത് എന്ന്
ചൂണ്ടിക്കാട്ടി ഡിപ്പോയില്‍ ബോധവത്കരണ ക്ലാസും സംഘടിപ്പിച്ചിരുന്നു. അളവിലെ കൃത്രിമത്വം ഉന്നത ഉദ്യോഗസ്ഥരെ അറിയിച്ചിട്ടുണ്ടെന്നാണ് ഡിപ്പോ അധികൃതര്‍
പറയുന്നത്. സമാന വെട്ടിപ്പ് മറ്റ് ഡിപ്പോകളിലും നടക്കുന്നുണ്ടെന്നാണ് ജീവനക്കാര്‍
ആരോപിക്കുന്നത്.
