KERALALATEST

‘അപ്പാ..’, പൊലീസിനോട് കൈകൂപ്പി അലറിക്കരഞ്ഞ് കുഞ്ഞയ്യപ്പന്‍; ഒടുവില്‍ അച്ഛനെ കണ്ടപ്പോള്‍ ആശ്വാസം, നിലയ്ക്കലിലെ കാഴ്ച

പത്തനംതിട്ട: അഞ്ചാം ദിനവും ശബരിമല തീര്‍ത്ഥാടകരുടെ ദുരിതം തുടരുന്നു. തിരക്ക് കാരണം പലരും മല ചവിട്ടാതെ മടങ്ങുകയാണ്. അതിനിടെ, കൂട്ടം തെറ്റിയ കുഞ്ഞയ്യപ്പന്റെ കരച്ചില്‍ അടക്കം ഏവരുടെയും മനസലിയിപ്പിക്കുന്ന ദൃശ്യങ്ങളും ശബരിമലയില്‍ നിന്ന് പുറത്ത് വരുന്നുണ്ട്. നിലയ്ക്കലിലെ തിരക്കില്‍പ്പെട്ട് കൂട്ടം തെറ്റിയ കുഞ്ഞ് കരഞ്ഞുകൊണ്ട് അച്ഛനെ തിരയുന്ന ദൃശ്യങ്ങളാണ് പുറത്ത് വന്നത്. പൊലീസിനോട് കൈകൂപ്പി അലറിക്കരയുന്ന കുഞ്ഞയ്യപ്പന്‍ ഒടുവില്‍ അച്ഛനെ കണ്ടപ്പോള്‍ ആശ്വാസത്തോടെ കൈവീശി കാട്ടുന്നതും ദൃശ്യങ്ങളിലുണ്ട്.
അതേസമയം, തിരക്കില്‍പ്പെട്ട് മണിക്കൂറുകളോളം ദുരിതത്തിലായ തീര്‍ത്ഥാടകര്‍ ശബരിമല ദര്‍ശനം നടത്താതെ മടങ്ങി പോകുന്നുണ്ട്. നിലയ്ക്കലിലും മറ്റും കാത്തുകിടന്നവരാണ് പന്തളം വലിയകോയിക്കല്‍ ക്ഷേത്രത്തിലെത്തി സന്നിധാനത്ത് ചെയ്യേണ്ട ചടങ്ങുകള്‍ അവിടെ നടത്തി നാട്ടിലേക്ക് തിരികെ പോകുന്നത്. പന്തളം വലിയ കോയിക്കല്‍ ക്ഷേത്രത്തിലെത്തി ഇരുമുടി അഴിച്ച് നെയ്യഭിഷേകം നടത്തി മാല ഊരി വീടുകളിലേക്ക് മടങ്ങുകയാണ് ചില ഭക്തര്‍. ശബരിമല സന്നിധാനത്ത് ചെയ്യേണ്ട ചടങ്ങുകളാണ് തീര്‍ത്ഥാടകര്‍ക്ക് പന്തളത്ത് നടത്തേണ്ടി വരുന്നത്. തിരിക്കില്‍പ്പെട്ട് നൂറ് കണക്കിന് തീര്‍ത്ഥാടകര്‍ ഇങ്ങനെ മടങ്ങുന്നുണ്ട് എന്ന് പന്തളം ക്ഷേത്ര ഭാരവാഹികള്‍ പറയുന്നു. തിരക്കനുസരിച്ച് ശബരിമലയില്‍ ക്രമീകരണങ്ങള്‍ ഏര്‍പ്പെടുത്തുന്നില്‍ വന്ന വീഴ്ചയാണ്, തീര്‍ത്ഥാടകര്‍ക്ക് പന്തളത്തു എത്തി മടങ്ങേണ്ട അവസ്ഥയില്‍ എത്തിച്ചതെന്നും അവര്‍ പറയുന്നു.

Related Articles

Back to top button