ഹോണ്ട എൻഎക്സ്200 എന്ന പേര് കമ്പനി ഇന്ത്യയിൽ ഈ വർഷം മാർച്ചിൽ രജിസ്റ്റർ ചെയ്തിരുന്നു. ഇത് അഡ്വഞ്ചർ ബൈക്കിനായാണ് എന്നാണ് വിവരം. കഴിഞ്ഞ ഓഗസ്റ്റിൽ ഹോണ്ട അവതരിപ്പിച്ച ഹോർനെറ്റ് 2.0-യുടെ എൻജിൻ ആണ് എൻഎക്സ്200-ലും ഇടം പിടിക്കുക എന്നാണ് റിപോർട്ടുകൾ. അങ്ങനെയെങ്കിൽ 8,500 ആർപിഎമ്മിൽ 17.03 ബിഎച്ച്പി കരുത്തും 6,000 ആർപിഎമ്മിൽ 16.1 എൻഎം ടോർക്കും നിർമ്മിക്കുന്ന 184.4 സിസി, സിംഗിൾ സിലിണ്ടർ, ഫ്യുവൽ ഇൻജെക്ഷൻ എൻജിനാണ് എൻഎക്സ്200-നെ ചലിപ്പിക്കുക.
ഹോർനെറ്റ് 2.0-ലെ ആകർഷകമായ ഘടകങ്ങളായ എൽഇഡി ഹെഡ്, ടെയിൽ, ഇൻഡിക്കേറ്റർ ലാമ്പുകൾ, എൽസിഡി ഇൻസ്ട്രുമെന്റ് ക്ലസ്റ്റർ, മസ്കുലാർ ആയ പെട്രോൾ ടാങ്ക്, സ്പ്ലിറ്റ്-സ്റ്റൈൽ അലോയ് വീലുകൾ, ഒരല്പം കയറി നിൽക്കുന്ന പില്ലിയൺ സീറ്റ് എന്നിവ എൻഎക്സ്200-ലും ചെറിയ മാറ്റങ്ങളോടെ തുടരാനാണ് സാധ്യത. ഡ്യുവൽ സ്പോർട്ട് ബൈക്ക് ആയതുകൊണ്ട് വ്യത്യസ്തമായ ടയറുകൾ, ട്രാവൽ കൂടിയ സസ്പെൻഷൻ, വലിപ്പമേറിയ ഹാൻഡിൽ ബാർ തുടങ്ങിയവ ഹോണ്ട എൻഎക്സ്200-ൽ പ്രതീക്ഷിക്കാം.
സിഗ്-വീൽസ് റിപ്പോർട്ട് അനുസരിച്ച് അടുത്ത മാസം തന്നെ ഹോണ്ട എൻഎക്സ്200യുടെ ലോഞ്ച് പ്രതീക്ഷിക്കാം. ഏകദേശം 1.45 ലക്ഷം ആണ് എക്‌സ്-ഷോറൂം വിലയായി കണക്കാക്കുന്നത്. അതായത് ഹോർനെറ്റ് 2.0-യെക്കാൾ 15,000 രൂപ കൂടുതൽ. വിപണിയിൽ ഹീറോ എക്‌സ്പൾസിന്റെയും റോയൽ എൻഫീൽഡ് ഹിമാലയന്റെയും ഇടയിലാണ് വിലയുടെ കാര്യത്തിൽ ഹോണ്ട എൻഎക്സ്200യുടെ സ്ഥാനം.
