BREAKING NEWSWORLD

ഈജിപ്ഷ്യന്‍ മമ്മിയുടെ ഉദരത്തില്‍ 2000 വര്‍ഷം പഴക്കമുള്ള ഭ്രൂണം; കേടുകൂടാതിരുന്നതിനു കാരണം ഇതാണ്

നൂറ്റാണ്ടുകള്‍ക്കു മുന്‍പ് മമ്മി രൂപത്തിലാക്കി സൂക്ഷിച്ചിരുന്ന സ്ത്രീയുടെ വയറിനുള്ളില്‍ ഒരു ഗര്‍ഭസ്ഥ ശിശുവിനെ കണ്ടെത്തി ഗവേഷകര്‍. 2000 വര്‍ഷത്തോളം പഴക്കമുള്ള മമ്മിയുടെ ഉള്ളില്‍ അപ്രതീക്ഷിതമായാണ് ഗവേഷകസംഘം ഭ്രൂണം കണ്ടെത്തിയത്. വാഴ്‌സോ സര്‍വകലാശാലയിലെ ഗവേഷകരുടേതാണ് കണ്ടെത്തല്‍.
സിടി സ്‌കാനും എക്‌സ് റേയും ഉപയോഗിച്ച് നടത്തിയ പരിശോധനയിലാണ് ഭ്രൂണം കണ്ടെത്തിയതെന്നാണ് ഗവേഷകര്‍ പറയുന്നത്. കഴിഞ്ഞ വര്‍ഷം ഏപ്രിലിലാണ് കണ്ടെത്തല്‍ നടന്നതെങ്കിലും ഇപ്പോഴാണ് ഇതു സംബന്ധിച്ച വാര്‍ത്ത പുറത്തു വരുന്നത്. എംബാം ചെയ്യപ്പെട്ട നിലയിലുള്ള ഭ്രൂണവുമായി ഇതാദ്യമായാണ് ഒരു മമ്മി കണ്ടെത്തുന്നത്.
ഒരു മുട്ട അച്ചാറിട്ടു വെച്ചിരുന്നതു പോലെ മമ്മിയ്ക്കുള്ളില്‍ ഭ്രൂണം സുരക്ഷിതമായിരുന്നു എന്നാണ് ഗവേഷകര്‍ പറയുന്നത്. മരിക്കുന്ന സമയത്ത് ഈ സ്ത്രീ ഗര്‍ഭിണിയാണെന്ന് അറിഞ്ഞു കൊണ്ടുതന്നെയാണ് മൃതദേഹം മമ്മിരൂപത്തിലാക്കിയതെന്നാണ് കരുതപ്പെടുന്നത്. എന്നാല്‍ പ്രത്യേക നടപടികളൊന്നും കൂടാതെ തന്നെ ഗര്‍ഭസ്ഥശിശു സംരക്ഷിക്കപ്പെട്ടിരുന്നത് എങ്ങനെയെന്നാണ് ശാസ്ത്രജ്ഞരെ അമ്പരിപ്പിച്ചത്. എന്നാല്‍ മൃതദേഹം മമ്മിരൂപത്തിലാക്കി സംരക്ഷിക്കപ്പെട്ടപ്പോള്‍ ശരീരത്തിലെ ആസിഡിന്റെ അളവ് കൂടുമെന്നും ഇങ്ങനെയാണ് ഭ്രൂണം സംരക്ഷിപ്പെട്ടിരുന്നതെന്നുമാണ് ഗവേഷകര്‍ പറയുന്നത്.
അതേസമയം ഈ മമ്മി എവിടെയാണ് സൂക്ഷിച്ചിരുന്നതെന്നോ ഈ സ്ത്രീ മരിച്ചത് എങ്ങനെയാണെന്നോ വ്യക്തതയില്ല. അതേസമയം, ഭ്രൂണത്തിന്റെ സ്ഥാനം അപഗ്രഥിച്ച വിദഗ്ധര്‍ ഇവര്‍ പ്രസവത്തിനിടെയല്ല മരിച്ചതെന്നാണ് കരുതുന്നത്. മരണസമയത്ത് ഭ്രൂണത്തിന് ആറോ ഏഴോ മാസത്തെ വളര്‍ച്ചയുണ്ടായിരുന്നു എന്നാണ് കണ്ടെത്തല്‍.
മൃതദേഹത്തിലെ രക്തത്തിന്റെ പിഎച്ച് നിലയും ഗര്‍ഭാശയത്തിലെ പിഎച്ച് നിലയും കാലം ചെല്ലുന്തോറും താഴുമെന്നും അങ്ങനെ കൂടുതല്‍ ആസിഡിന്റെ അംശം എത്തുന്നതു വഴിയാണ് ഭ്രൂണം സംരക്ഷിക്കപ്പെട്ടതെന്നുമാണ് ഗവേഷകര്‍ പറയുന്നത്. കൂടാതെ ശരീരം നാട്രോണ്‍ ഉപയോഗിച്ച് പൊതിയുന്നതിനാല്‍ ഓക്‌സിജനുമായുള്ള സമ്പര്‍ക്കവും കുറയും. ഇതോടെ ഭ്രൂണം ഉള്‍പ്പെടുന്ന ഗര്‍ഭപാത്രം സംരക്ഷിക്കപ്പെട്ടിരിക്കുമെന്നും ഗവേഷകര്‍ പറയുന്നു. കൂടാതെ ശരീരത്തിലെ അമോണിയയുടെ അളവും വര്‍ധിക്കും.
ഭ്രൂണം അച്ചാറിട്ടതു പോലെ സംരക്ഷിക്കപ്പെട്ടു എന്നു പറഞ്ഞാല്‍ അത് ശരിയാണെന്നു തോന്നില്ല. പക്ഷെ ഏറ്റവും യോജിക്കുന്ന താരതമ്യം അതാണെന്ന് ഗവേഷകര്‍ പറഞ്ഞു.
ഗര്‍ഭാവസ്ഥയില്‍ ഭ്രൂണത്തിന് എല്ലുകള്‍ കുറവാണെന്നതിനു പുറമെ കാലക്രമേണ എല്ലുകള്‍ നശിച്ചു പോകുക കൂടി ചെയ്തതാണ് ഭ്രൂണം എളുപ്പത്തില്‍ കണ്ടെത്താരിക്കാന്‍ കഴിഞ്ഞതെന്നും ഗവേഷക!ര്‍ പറഞ്ഞു. ഒരു മുട്ട ആസിഡ് നിറച്ച പാത്രത്തിലിട്ടു വെച്ചാല്‍ മുട്ടയുടെ തോട് ആസിഡില്‍ അലിഞ്ഞു പോകുമെന്നും ഉള്‍ഭാഗം അതേപടി നിലനില്‍ക്കുമെന്നും ഗവേഷകര്‍ ഉദാഹരണമായി ചൂണ്ടിക്കാട്ടി.
സാധാരണഗതിയില്‍ മൃതദേഹങ്ങള്‍ മമ്മിയാക്കുമ്പോള്‍ ആന്തരികാവയവങ്ങള്‍ നീക്കം ചെയ്യാറുണ്ട്. എന്നാല്‍ ഇവര്‍ ഗര്‍ഭപാത്രം നീക്കം ചെയ്യാതിരുന്നത് എന്തുകൊണ്ടാണെന്നു കണ്ടെത്താനുള്ള ശ്രമത്തിലാണ് ഗവേഷകര്‍.

Related Articles

Back to top button

Adblock Detected

Please consider supporting us by disabling your ad blocker