FeaturedBREAKING NEWSWORLD

അമേരിക്കയില്‍ പ്രസിഡന്റിനെ തെരഞ്ഞെടുക്കുന്നത് എങ്ങനെ? ദാ ഇങ്ങനെ…

അമേരിക്കയില്‍ 46ാമത് പ്രസിഡന്റ് സ്ഥാനത്തേക്കുള്ള തെരഞ്ഞെടുപ്പ് അവസാന ഘട്ടത്തിലേക്ക് എത്തി നില്‍ക്കുകയാണ്. നവംബര്‍ മൂന്നിനാണ് അമേരിക്കയിലെ തെരഞ്ഞെടുപ്പ് നടക്കുക. ഇതിനെ ചുറ്റിപ്പറ്റി നിരവധി ആരോപണ പ്രത്യാരോപണങ്ങളും ഉയരുന്നുണ്ട്. അമേരിക്കകാര്‍ക്ക് പുറമെ ഇന്ത്യന്‍ വംശജര്‍ക്കും നിര്‍ണായക സ്വാധീനം ഈ തെരഞ്ഞെടുപ്പിലുണ്ട്. എങ്ങിനെയാണ് തെരഞ്ഞെടുപ്പ് നടക്കുന്നത് എന്ന് മനസിലാക്കാം,

അമേരിക്കയില്‍ ആര്‍ക്ക് പ്രസിഡന്റ് ആകാം ?
അമേരിക്കയില്‍ പൗരന്മാരായിട്ടുള്ള ആര്‍ക്കും പ്രസിഡന്റ് സ്ഥാനത്തേക്ക് മത്സരിക്കുവാന്‍ സാധിക്കും. 14 വര്‍ഷമായി അമേരിക്കയില്‍ സ്ഥിരതാമസമാക്കിയ കുറഞ്ഞത് 35 വയസ് പ്രായമുള്ള ഏതൊരു വ്യക്തിയും തെരഞ്ഞെടുപ്പില്‍ മത്സരിക്കാന്‍ യോഗ്യനാണ്.

അമേരിക്കയിലെ രാഷ്ട്രീയ പാര്‍ട്ടികള്‍ ഏതൊക്കെ ?
പ്രധാനമായും അമേരിക്കയില്‍ രണ്ട് രാഷ്ട്രീയ കക്ഷികളാണ് ഉള്ളത്. ഒന്ന് ഡെമോക്രാറ്റിക് പാര്‍ട്ടിയും. മറ്റൊന്ന് റിപ്പബ്ലിക്കന്‍ പാര്‍ട്ടിയുമാണ്. നിലവിലെ പ്രസിഡന്റ് ഡോണള്‍ഡ് ട്രംപ് റിപ്പബ്ലിക്കന്‍ പാര്‍ട്ടി സ്ഥാനാര്‍ത്ഥിയായാണ് മത്സരിച്ച് ജയിച്ചത്.

പ്രധാന സ്ഥാനാര്‍ത്ഥികള്‍ ആരൊക്കെ ?
നിലവിലെ പ്രസിഡന്റ് ഡോണള്‍ഡ് ട്രംപും ഡെമോക്രാറ്റിക് പാര്‍ട്ടിക്ക് വേണ്ടി ജോ ബൈഡനുമാണ് പ്രസിഡന്റ് തെരഞ്ഞെടുപ്പില്‍ മത്സരിക്കുന്നത്.

എന്താണ് കാമ്പയിനുകള്‍ ?
തെരഞ്ഞെടുപ്പിന് മുന്നോടിയായി ഡെമോക്രാറ്റുകളും റിപ്പബ്ലിക്കന്‍മാരും തങ്ങളുടെ പ്രചരണം ആരംഭിക്കുന്നു. പിന്നീട് ധനസമാഹരണത്തിനും പ്രധാന പ്രചരണത്തിനുമായി ഒരു സംഘത്തെ സജ്ജീകരിച്ച് ടൂര്‍ കാമ്പയിന്‍ ആരംഭിക്കുന്നു.

എന്താണ് സ്ഥാനാര്‍ത്ഥികളുടെ ടെലിവിഷന്‍ സംവാദം ?
പിന്നീട് ഇരു പാര്‍ട്ടികളിലെയും സ്ഥാനാര്‍ത്ഥികള്‍ ടെലിവിഷന്‍ സംവാദങ്ങളില്‍ പങ്കെടുക്കുന്നു. തെരഞ്ഞെടുപ്പ് കാമ്പയിനുകളിലെ ഏറ്റവും പ്രധാനപ്പെട്ട പരിപാടിയാണ് ഇത് എന്നാണ് വിലയിരുത്തുന്നത്. ഈ സംവാദങ്ങള്‍ക്കിടയില്‍ ഓരോ സ്ഥാനാര്‍ത്ഥിക്കും അവരുടെ നയങ്ങളെക്കുറിച്ചുള്ള കടുത്ത ചോദ്യങ്ങള്‍ക്ക് ഉത്തരം നല്‍കുവാനും മറ്റ് സ്ഥാനാര്‍ത്ഥികള്‍ക്കെതിരായ പ്രശ്‌നങ്ങളിലും നയങ്ങളിലും അവരുടെ നിലപാട് വ്യക്തമാക്കുവാനും സാധിക്കും.

തെരഞ്ഞെടുപ്പ് പ്രക്രിയ എങ്ങിനെ ?
ഏറെ സങ്കീര്‍ണമായ ഒരു പ്രക്രിയ ആണ് യുഎസ് പ്രസിഡന്റെ തെരഞ്ഞെടുപ്പ് എന്നത്. ഇന്ത്യയിലേതുപോലെ ജനങ്ങള്‍ നേരിട്ടല്ല അമേരിക്കയില്‍ പ്രസിഡന്റിനെ തെരഞ്ഞെടുക്കുന്നത്. അത് ചെയ്യുന്നത് ഇലക്ടര്‍മാരാണ്. അഞ്ച് ഘട്ടങ്ങളായാണ് തെരഞ്ഞെടുപ്പ് നടക്കുന്നത്. അത് ഇങ്ങനെയാണ്, പ്രൈമറീസും കോക്കസും, നാഷണല്‍ കണ്‍വെന്‍ഷന്‍സ്, ജനറല്‍ ഇലക്ഷന്‍, ഇലക്ട്രല്‍ കോളജ് എന്നിവയാണ് അത്.

എന്താണ് പ്രൈമറിയും കോക്കസും ?
പ്രസിഡന്റ് തെരഞ്ഞെടുപ്പിന്റെ ആദ്യ ഘട്ടം എന്നത് പ്രൈമറിയാണ്. പാര്‍ട്ടി അംഗങ്ങള്‍ ജനറല്‍ ഇലക്ഷനായി ഏറ്റവും മികച്ച സ്ഥാനാര്‍ത്ഥികളെ തെരഞ്ഞെടുക്കാനുള്ള പ്രക്രിയയാണ് പ്രൈമറി. രഹസ്യബാലറ്റ് വഴിയാണ് വോട്ട് രേഖപ്പെടുത്തുക. ഓപ്പണ്‍ പ്രൈമറി, ക്ലോസ്ഡ് പ്രൈമറി എന്നിങ്ങനെ രണ്ട് രീതികളാണുള്ളത്. ഇതില്‍ ഓപ്പണ്‍ പ്രൈമറികളില്‍ പാര്‍ട്ടി വ്യത്യാസമില്ലാതെ എല്ലാവര്‍ക്കും ഇഷ്ടമുള്ള സ്ഥാനാര്‍ത്ഥികള്‍ക്ക് വോട്ട് രേഖപ്പെടുത്താം. ക്ലോസ്ഡ് പ്രൈമറികളില്‍ ഏത് പാര്‍ട്ടിയ്ക്ക് വേണ്ടിയാണോ രജിസ്റ്റര്‍ ചെയിതിട്ടുള്ളത് ആ പാര്‍ട്ടിയുടെ സ്ഥാനാര്‍ത്ഥിയ്ക്ക് മാത്രമേ വോട്ട് ചെയ്യാന്‍ കഴിയൂ. ചര്‍ച്ചകളിലൂടെയും വോട്ടിങ്ങിലൂടെയും പാര്‍ട്ടി അംഗങ്ങള്‍ മികച്ച സ്ഥാനാര്‍ത്ഥിയെ തെരഞ്ഞെടുക്കുന്നതിനെയാണ് കോക്കസ് എന്ന് പറയുന്നത്. അതേസമയം ഓരോ സ്റ്റേറ്റുകളിലും കോക്കസ് നടപ്പാക്കുന്നത് വ്യത്യസ്തമായാണ്. ഫെബ്രുവരി മാസത്തോടെ പ്രൈമറികളും കോക്കസുകളും വഴി സ്ഥാനാര്‍ത്ഥികളെ തെരഞ്ഞെടുക്കാനുള്ള പ്രാരംഭ വോട്ടിങ് തുടങ്ങും.ലോവ ന്യൂ ഹാംഷെയര്‍ നെവാഡ, സൗത്ത് കരോലിന എന്നിവിടങ്ങളില്‍ നിന്നുള്ള ഫലങ്ങളിലായിരിക്കും പ്രധാന ശ്രദ്ധ കേന്ദ്രീകരിക്കുക. ഈ സ്റ്റേറ്റുകളിലെ ഫലങ്ങളായിരിക്കും പ്രസിഡന്റ് സ്ഥാനാര്‍ത്ഥികളെ നിര്‍ണ്ണയിക്കുന്നത്.

എന്താണ് നാഷണല്‍ കണ്‍വെന്‍ഷന്‍സ് ?
തെരഞ്ഞെടുപ്പിന്റെ രണ്ടാം ഘട്ടമാണ് നാഷണല്‍ കണ്‍വെന്‍ഷന്‍സ്. ഇരുപാര്‍ട്ടികളും തങ്ങളുടെ പ്രസിഡന്റ് സ്ഥാനാര്‍ത്ഥിയെ തെരഞ്ഞെടുക്കുന്നതിനായി നാഷണല്‍ കണ്‍വെന്‍ഷനുകള്‍ നടത്താറുണ്ട്. ഓരോ സ്റ്റേറ്റുകളില്‍ നിന്നും പ്രൈമറിയും കോക്കസും വഴി തെരഞ്ഞെടുക്കപ്പെട്ട പ്രതിനിധികള്‍ തങ്ങള്‍ക്ക് പ്രിയങ്കരരായ സ്ഥാനാര്‍ത്ഥികളെ അംഗീകരിക്കുന്നു. ഈ കണ്‍വെന്‍ഷന്റെ അവസാനത്തോടെ പ്രസിഡന്റ് സ്ഥാനാര്‍ത്ഥികളെ ഇരു പാര്‍!ട്ടികളും പ്രഖ്യാപിക്കുന്നു. ഈ സമയത്ത് പ്രസിഡന്റ് സ്ഥാനാര്‍ത്ഥി തന്റെ റണ്ണിങ് മേറ്റ് അഥവാ വൈസ് പ്രസിഡന്റ് സ്ഥാനാര്‍ത്ഥിയെ നാമനിര്‍ദ്ദേശം ചെയ്യുന്നു. പിന്നീട്, അദ്ദേഹം തന്നെ പ്രചരണത്തിന് ചുക്കാന്‍ പിടിക്കും.

ജനറല്‍ ഇലക്ഷന്‍ എന്ത് ?
ജനങ്ങള്‍ നേരിട്ട് പങ്കെടുക്കുന്ന പ്രക്രിയയാണ് ജനറല്‍ ഇലക്ഷന്‍. രാജ്യത്തെ എല്ലാ വിഭാഗം ജനങ്ങളും തങ്ങളുടെ പ്രസിഡന്റിനായും വൈസ് പ്രസിഡന്റിനായും വോട്ടുകള്‍ രേഖപ്പെടുത്തും. നവംബറിലാണ് അമേരിക്കയില്‍ തെരഞ്ഞെടുപ്പ് നടക്കുക. അമേരിക്കയില്‍ ജനങ്ങള്‍ വോട്ട് ചെയ്യുന്നത് നേരിട്ട് പ്രസിഡന്റ് സ്ഥാനാര്‍ത്ഥിക്കല്ല മറിച്ച് ഇലക്ടര്‍മാര്‍ക്കാണ്. പിന്നീട്, ഈ ഇലക്ടര്‍മാരാണ് പ്രസിഡന്റ് സ്ഥാനാര്‍ത്ഥിക്ക് വോട്ട് ചെയ്യുന്നത്. ഏറ്റവുമധികം ഇലക്ട്രല്‍ വോട്ടുകള്‍ ലഭിക്കുന്ന സ്ഥാനാര്‍ത്ഥിയാകും പ്രസിഡന്റ് സ്ഥാനാര്‍ത്ഥി. എന്നാല്‍ മെയ്ന്‍ നബ്രാസ്‌ക എന്നീ സ്റ്റേറ്റുകളില്‍ ഇതിന് വിത്യാസമുണ്ട്.

എന്താണ് ഇലക്ട്രല്‍ കോളജ് ?
ഒരോ സ്റ്റേറ്റുകളിലേയും ജനസംഖ്യയുടെ ആനുപാതികമായി തെരഞ്ഞെടുക്കപ്പെട്ട ഇലക്ടര്‍മാര്‍ പ്രസിഡന്റിനെ തെരഞ്ഞെടുക്കുന്നതാണ് ഇലക്ട്രല്‍ കോളേജ്. ഓരോ സ്റ്റേറ്റിനും കോണ്‍ഗ്രസിനെ പ്രതിനിഥീകരിക്കാന്‍ നിശ്ചിത ഇലക്ടര്‍മാര്‍ ഉണ്ടാകും. ഓരോ സ്റ്റേറ്റുകളുടേയും നയങ്ങള്‍ക്ക് അനുസൃതമായി 538 ഇലക്ടര്‍മാര്‍ വരെ ഉണ്ടാകും. ജനറല്‍ ഇലക്ഷനേ തുടര്‍ന്ന് ഓരോ ഇലക്ടര്‍മാരും ഓരോ വോട്ട് രേഖപ്പെടുത്തുന്നു. 270 വോട്ടില്‍ കൂടുതല്‍ നേടുന്ന സ്ഥാനാര്‍ത്ഥി വിജയിക്കുന്നു. ജനുവരി മാസത്തോടെ പുതിയ പ്രസിഡന്റും വൈസ് പ്രസിഡന്റും ചുമതല ഏല്‍ക്കുന്നു.

Related Articles

Back to top button