ENTERTAINMENTMALAYALAM

എന്നെ ജാഡക്കാരിയും അഹങ്കാരിയുമാക്കിയ ട്രോളുകള്‍ വേദനിപ്പിച്ചു; മലയാളം വിടാനുള്ള കാരണം ഇതെന്ന് പ്രേമത്തിലെ മേരി

പ്രേമത്തിലെ ചുരുളന്‍മുടിക്കാരി മേരിയായി കടന്നു വന്ന് മലയാളികളുടെ പ്രിയങ്കരിയായി മാറിയ നടിയാണ് അനുപമ പരമേശ്വരന്‍. എന്നാല്‍ മലയാളം കടന്ന് മറ്റ് ഭാഷകളിലേക്കും അനുപമ വളര്‍ന്നു. ഇപ്പോള്‍ മണിയറയിലെ അശോകനിലൂടെ മടങ്ങി വരുകയാണ് അനുപമ. പ്രേമം അഞ്ച് വര്‍ഷം പൂര്‍ത്തിയാക്കുമ്പോള്‍ നാല് മലയാള സിനിമകള്‍ മാത്രമേ അനുപമ അഭിനയിച്ചിട്ടുള്ളൂ. അതിന് പിന്നിലെ കാരണം വെളിപ്പെടുത്തുകയാണ് താരം.
”പ്രേമം ഇറങ്ങിയതിന് പിന്നാലെ സോഷ്യല്‍ മീഡിയയുടെ ആക്രമണം നേരിടേണ്ടി വന്നിരുന്നു. എനിക്ക് ജാഡയാണെന്നും അഹങ്കരിയാണെന്നും പറഞ്ഞു. പ്രൊമേഷന്‍ സമയത്ത് ഞാന്‍ ധാരാളം അഭിമുഖങ്ങള്‍ നല്‍കിയിരുന്നു. സിനിമയുമായി ബന്ധമില്ലാത്ത ചിലര്‍ പറഞ്ഞത് അനുസരിച്ചായിരുന്നു അത്. ഞാന്‍ മടുത്തിരുന്നു. തൃശ്ശൂരുകാരിയായൊരു പെണ്‍കുട്ടിയായിരുന്നു ഞാന്‍. അവര്‍ പറയുന്നത് അനുസരിക്കുക മാത്രമായിരുന്നു എനിക്ക് അറിയാവുന്നത്” അനുപമ പറയുന്നു.
”സിനിമ ഇറങ്ങിയപ്പോള്‍ എനിക്ക് കുറച്ച് സ്‌ക്രീന്‍ ടൈം മാത്രമേ ഉണ്ടായിരുന്നുള്ളൂ. അതിന് സോഷ്യല്‍ മീഡിയ ട്രോളാന്‍ തുടങ്ങി. എന്റെ വളര്‍ച്ചയ്ക്ക് വേണ്ടി ഞാന്‍ പബ്ലിസിറ്റി ഉപയോഗിച്ചെന്ന് പറഞ്ഞു. ട്രോളുകള്‍ എന്ന വല്ലാതെ വേദനിപ്പിച്ചു. അങ്ങനെ ഞാന്‍ മലയാള സിനിമയില്‍ നിന്നും മാറി നില്‍ക്കാന്‍ തീരുമാനിച്ചു. വന്ന സിനിമകളൊക്കെ നിരസിച്ചു” അനുപമ പറഞ്ഞു.
”ആ സമയത്തായിരുന്നു തെലുങ്കില്‍ നിന്നും ഓഫര്‍ വരുന്നത്. അതൊരു നെഗറ്റീവ് കഥാപാത്രമായിരുന്നു. എനിക്ക് അഭിനയിക്കാനറിയില്ലെന്ന് ചിലര്‍ പറഞ്ഞിരുന്നു. അതുകൊണ്ട് ഞാനതൊരു വെല്ലുവിളിയായി ഏറ്റെടുത്തു. പുതിയ ഭാഷ പഠിക്കാനും തീരുമാനിച്ചു. അതിന് ശേഷം രണ്ട് തെലുങ്ക് സിനിമകളും ലഭിച്ചു. പിന്നാലെ തമിഴും വന്നു. അങ്ങനെ മുന്നോട്ട് പോയി”
വിവിധ ഭാഷകളിലായി 13 സിനിമകളില്‍ അഭിനയിച്ചിട്ടുണ്ട് ഇതുവരെ അനുപമ. അഭിനയിക്കുക വലിയ മോഹമായിരുന്നുവെങ്കിലും ഈ ജീവിതം സ്വപ്നം പോലും കണ്ടിരുന്നില്ലെന്നും അല്‍ഫോണ്‍സ് പുത്രന്‍ തന്റെ ജീവിതത്തിലേക്ക് ഒരു മാലാഖയെ പോലെയാണ് കടന്നു വന്നതെന്നും അനുപമ പറയുന്നു. അതുകൊണ്ടാണ് തന്റെ വീടിന് പ്രേമം എന്ന് പേരിട്ടതെന്നും താരം പറയുന്നു.
അനുപമ അഭിനയിച്ച പുതിയ ചിത്രമായ മണിയറയിലെ അശോകന്‍ റിലീസിന് ഒരുങ്ങുകയാണ്. ചിത്രത്തിലെ ഉണ്ണിമായേ എന്ന ഗാനം ഹിറ്റായി മാറിരുന്നു. ദുല്‍ഖര്‍ സല്‍മാനും ഗ്രിഗറിയുമാണ് ഗാനം ആലപിച്ചത്. ചിത്രത്തില്‍ അസിസ്റ്റന്റ് ഡയറക്ടറായും അനുപമ പ്രവര്‍ത്തിച്ചിരുന്നു.

Tags

Related Articles

Back to top button
Close