LATESTWORLD

സ്ത്രീകളെ ലൈംഗിക അടിമകളാക്കിയ സ്വയം പ്രഖ്യാപിത മോട്ടിവേഷന്‍ ഗുരുവിന് 120 വര്‍ഷം തടവ്

ന്യൂയോര്‍ക്ക്: അമേരിക്കയില്‍ സ്ത്രീകളെ ലൈംഗിക അടിമകളാക്കി നെക്‌സിയം എന്ന പേരില്‍ സംഘടന നടത്തി വന്നിരുന്ന സ്വയം പ്രഖ്യാപിത മോട്ടിവേഷന്‍ ഗുരുവിന് 120 വര്‍ഷം തടവുശിക്ഷ. കെയ്ത്ത് റാനിയര്‍ (60) എന്നയാളെയാണ് ന്യൂയോര്‍ക്ക് കോടതി 120 വര്‍ഷത്തെ തടവുശിക്ഷയ്ക്ക് വിധിച്ചത്. സ്ത്രീകളെ നിര്‍ബന്ധിച്ച് ലൈംഗിക ബന്ധത്തിന് പ്രേരിപ്പിച്ചു, കുട്ടികളെ കടത്തിക്കൊണ്ടുപോകല്‍, നിര്‍ബന്ധിത ജോലി എടുപ്പിക്കല്‍ തുടങ്ങിയ കുറ്റങ്ങളും ഇയാള്‍ക്കെതിരെ ചുമത്തിയിട്ടുണ്ട്.
ആയിരക്കണക്കിന് പ്രശസ്തരായ വ്യക്തികളുമാണ് കെയ്ത്തിന്റെ ശിഷ്യഗണത്തിലുള്ളത്.
സ്വയംനവീകരണ കോഴ്‌സുകള്‍ നടത്തുന്ന നെക്‌സിയത്തില്‍ 5000 ഡോളര്‍ ഫീസ് ഈടാക്കി അഞ്ചുദിവസത്തെ കോഴ്‌സിലേക്കാണ് ഇയാള്‍ ആളുകളെ തെരഞ്ഞെടുക്കുന്നത്. എന്നാല്‍ പിന്നീട് ഇവരെ സാമ്പത്തികമായും ലൈംഗികമായും ചൂഷണം ചെയ്യുകയാണ് ചെയ്യുന്നത്. ഇതിനകത്ത് തന്നെ ഡിഒഎസ് എന്ന പേരില്‍ ഒരു പിരമീഡ് മാതൃകയിലുള്ള ഗ്രൂപ്പുണ്ട്. ഇവിടെ സ്ത്രീകള്‍ ലൈംഗിക അടിമകളും കെയ്ത്ത് ഏറ്റവും മുകളില്‍ ഗ്രാന്‍ഡ് മാസ്റ്ററുമാണ്. തുടര്‍ന്ന് അടിമകളായ ഇവരെ ഗുരുവുമായി ലൈംഗികബന്ധത്തില്‍ ഏര്‍പ്പെടാന്‍ നിര്‍ബന്ധിക്കും. പിന്നീട് ഇവരുടെ വ്യക്തിവിവരങ്ങളും ചിത്രങ്ങളും ശേഖരിക്കുകയും ചെയ്യും.
പതിനഞ്ചുകാരിയെ ലൈംഗികമായി ചൂഷണം ചെയ്തുവെന്ന കേസില്‍ 2019ല്‍ ഇയാള്‍ക്കെതിരെ ക്രിമിനല്‍ ഗൂഢാലോചന അടക്കമുള്ള കുറ്റങ്ങള്‍ ചുമത്തിയിരുന്നു. ഇയാളുടെ ഇരകളില്‍ 13 സ്ത്രീകള്‍ കോടതിയില്‍ എത്തിയിരുന്നു. 90 പേര്‍ ജഡ്ജി നിക്കോളാസ് ഗരൗഫിസിന് കത്തെഴുതുകയും ചെയ്തു. സ്വയം ഗുരുവായി പ്രഖ്യാപിച്ച കെയ്ത്ത് യഥാര്‍ഥത്തില്‍ ഒരു തട്ടിപ്പുകാരനാണെന്ന് ജഡ്ജി പറഞ്ഞു.
താന്‍ തെറ്റൊന്നും ചെയ്തിട്ടില്ലെന്ന് കെയ്ത്ത് കോടതിയില്‍ പറഞ്ഞു. തന്റെ അനുയായികള്‍ക്ക് ഏതെങ്കിലും തരത്തില്‍ വിഷമമുണ്ടായെങ്കില്‍ ഖേദിക്കുന്നുവെന്നും കെയ്ത്ത് വ്യക്തമാക്കി. കേസില്‍ പ്രശസ്തരായ മറ്റ് അഞ്ചു പേര്‍ക്കെതിരെയും കുറ്റം ചുമത്തിയിട്ടുണ്ട്. 1998ല്‍ ന്യൂയോര്‍ക്കില്‍ സ്ഥാപിച്ച നെക്‌സിയം എന്ന സംഘടന സ്വയം നവീകരണ കോഴ്‌സുകള്‍ നടത്തിയാണു പ്രശസ്തമായത്. കെയ്ത്തിന്റെ അതിനാടകീയത നിറഞ്ഞ ജീവിത കഥ പ്രമേയമാക്കി ഒരു ഡോക്യുമെന്ററിയും സിനിമയും പുറത്തിറങ്ങിയിട്ടുണ്ട്. അടുത്തിടെയാണ് എച്ച്ബിഒ ഡോക്യുമെന്ററിയായ ‘ദി വാവ്’ പുറത്തിറക്കിയത്.

Related Articles

Back to top button

Adblock Detected

Please consider supporting us by disabling your ad blocker