BREAKING NEWSART & CULTUREArticlesKERALA

മഹാത്മാ അയ്യങ്കാളി ജന്മദിനം ഇന്ന്; ജാതിവിവേചനത്തിനെതിരേയുള്ള കാലഘട്ടത്തിന്റെ ചാട്ടുളി

ലോകത്തിലെ തന്നെ ഐതിഹാസികമായ ഒരു ചെറുത്തുനില്‍പ്പും വിപ്ലവവുമായിരുന്നു മഹാത്മാ അയ്യങ്കാളിയുടെ ജീവിതം. തലപ്പാവ് ചുറ്റിയ, അവശേഷിക്കുന്ന ഒരേയൊരു പോര്‍ട്രെയ്റ്റ് പെയിന്റിങ്ങുപോലെ അപൂര്‍ണമാണ് അയ്യങ്കാളിയെക്കുറിച്ചുള്ള വിവരങ്ങളും. ജാതീയമായ വിവേചനങ്ങള്‍ക്ക് എതിരെ മുഷ്ടിയായിരുന്നു മിക്കപ്പോഴും അയ്യങ്കാളിയുടെ ആയുധം, എന്നാല്‍ ഇത് അദ്ദേഹം പ്രതിനിധീകരിച്ച ആശയങ്ങളുടെ മൂല്യം കുറച്ചില്ല.
1893ലാണ് ചരിത്ര പ്രസിദ്ധമായ വില്ലുവണ്ടി സമരം നടക്കുന്നത്. രാജവീഥികളെന്നും ഗ്രാമവീഥികളെന്നും രണ്ടായിതിരിച്ച റോഡുകളില്‍ പില്‍ക്കാലത്ത് രാജവീഥികള്‍ എല്ലാവര്‍ക്കുമായി തുറന്ന് കൊടുത്തെങ്കിലും അവര്‍ണ്ണര്‍ക്ക് ഇതിലൂടെ സഞ്ചാര സ്വാതന്ത്രൃം ഉണ്ടായിരുന്നില്ല. ഇതിനെതിരെയായിരുന്ന അയ്യങ്കാളി തന്റെ വില്ലുവണ്ടിയോടിച്ച് വിപ്ലവം തീര്‍ത്തത്. 1891 മുതല്‍ 1893 വരെയുള്ള കാലയളവില്‍ തുടര്‍ച്ചയായി പൊതുവഴികളിലൂടെ വില്ലുവണ്ടിയില്‍ എത്തിയ അദ്ദേഹം പ്രമാണിമാരെ വെല്ലുവിളിക്കുകയായിരുന്നു. കാളവണ്ടിയില്‍, മുണ്ടും മേല്‍മുണ്ടും വെള്ള ബനിയനും തലപ്പാവും ധരിച്ച് പൊതുവീഥിയിലൂടെയുള്ള സാഹസിക യാത്രയെ എതിര്‍ക്കാനെത്തിയവര്‍ക്കെല്ലാം അയ്യങ്കാളിയുടെ നിശ്ചയദാര്‍ഢ്യത്തിന് മുന്നില്‍ പിന്തിരിയേണ്ടി വന്നു. ബാലരാമപുരം കഴക്കൂട്ടം തുടങ്ങിയ മേഖലകളിലെല്ലാം നിരവധി ഏറ്റുമുട്ടലുകളായിരുന്നു ഈ ഘട്ടത്തില്‍ നടന്നത്.
രാജ്യത്ത് വിദ്യാഭ്യാസ അവകാശ നിഷേധങ്ങള്‍ക്കൊപ്പം ഇന്നും ചര്‍ച്ചയാകുന്ന വിഷയമാണ് പഞ്ചമിയുടെ സ്‌കൂള്‍ പ്രവേശനം. 1914ലാണ് ദളിത് പെണ്‍കുട്ടിയായ പഞ്ചമിയുമായി അയ്യങ്കാളി സ്‌കൂളിലെത്തുന്നത്. നാളുകള്‍ നീണ്ടു നിന്ന കൃഷിഭൂമി തരിശിടല്‍ സമരത്തിന് പിന്നാലെ താഴ്ന്ന ജാതിയില്‍പ്പെട്ട കുട്ടികള്‍ക്ക് സ്‌കൂള്‍ പ്രവേശനത്തിന് അനുമതി ലഭിച്ചതോടെയാണ് അയ്യങ്കാളി പഞ്ചമിയെയും കൊണ്ട് സ്‌കൂളിലെത്തുന്നത്. എന്നാല്‍ അധികൃതര്‍ കുട്ടിയ്ക്ക് പ്രവേശനം നല്‍കാന്‍ വിസമ്മതിച്ചു. തിരുവിതാംകൂര്‍ ഭരണാധികാരിയുടെ ഉത്തരവ് വകവെയ്ക്കാതെയായിരുന്നു ഈ നടപടി. പഞ്ചമിയെ ക്ലാസില്‍ ചേര്‍ക്കാനുള്ള ശ്രമങ്ങള്‍ മറ്റൊരു പ്രക്ഷോഭത്തിലേക്കാണ് കാര്യങ്ങളെത്തിച്ചത്. തുടര്‍ന്ന് സ്‌കൂള്‍ അഗ്‌നിക്കിരയായി. പഞ്ചമി ഇരുന്ന ബെഞ്ചും സ്‌കൂളിന്റെ ഏതാനം ഭാഗങ്ങളും മാത്രമാണ് ഇവിടെ അവശേഷിച്ചത്. ഇത് പിന്നീട് ചരിത്ര സ്മാരകവുമായി.
1904ല്‍ അയ്യങ്കാളി പള്ളിക്കൂടത്തിന്റെ തുടക്കം. ജാതിവിവേചനം കാരണം തിരുവിതാംകൂറില്‍ ആ കാലഘട്ടത്തില്‍ അയിത്ത ജാതിക്കാരായ പുലയര്‍ ഉള്‍പ്പെടെയുള്ളവരുടെ കുട്ടികള്‍ക്ക് സ്‌കൂളില്‍ പ്രവേശനമുണ്ടായിരുന്നില്ല. പുലയരെക്കാള്‍ ജാതിയില്‍ അല്‍പ്പം ഉയര്‍ന്നവരെന്ന് കരുതിയിരുന്ന ഈഴവര്‍ക്കും സമാനമായ വിലക്കുണ്ടായിരുന്നു. സവര്‍ണവരാണ് പ്രധാനമായും എതിര്‍പ്പ് ഉയര്‍ത്തിയത്. രാജകീയ സര്‍ക്കാരും ദിവാന്മാരും ഇത് കണ്ടില്ലെന്ന് നടിച്ചു. പുതുവല്‍വിളാകം എന്ന പ്രദേശത്ത് അയ്യങ്കാളിയുടെ സുഹൃത്തുകൂടെയായിരുന്ന കൊച്ചാപ്പിയില്‍ നിന്നും വാങ്ങിയ 18 സെന്റ് സ്ഥലത്താണ് സ്‌കൂള്‍ പണിതത്. തീണ്ടല്‍ജാതിക്കാരായ കുട്ടികള്‍ക്കായി തീണ്ടല്‍ ജാതിക്കാര്‍ നിര്‍മ്മിച്ച ഇന്ത്യയിലെ തന്നെ ആദ്യത്തെ സ്‌കൂളായിരുന്നു ഇതെന്ന്, മഹാത്മ അയ്യങ്കാളി അയ്യങ്കാളിയുടെ അറിയപ്പെടാത്ത ചരിത്രം എന്ന പുസ്തകത്തില്‍ വിവരിക്കുന്നുണ്ട്. ഈ പള്ളിക്കൂടം സവര്‍ണര്‍ അഗ്‌നിക്കിരയാക്കിയതായും പുസ്തകം വിവരിക്കുന്നുണ്ട്.
പുലയക്കുട്ടികളുടെ വിദ്യാഭ്യാസം തന്നെയായിരുന്നു കര്‍ഷകരുടെ പണിമുടക്കിന് പ്രധാനകാരണം. 1904ല്‍ ആണ് ഈ പ്രക്ഷോഭം അയ്യങ്കാളി നയിക്കുന്നത് എന്ന് വിവിധ ചരിത്രരേഖകള്‍ വാദിക്കുന്നു. നെല്‍പ്പാടങ്ങള്‍ കൃഷി ചെയ്യാതെ ഇടാന്‍ ആഹ്വാനം ചെയ്ത അയ്യങ്കാളി, പുലയ കുട്ടികള്‍ക്ക് സ്!കൂള്‍ പ്രവേശം നല്‍കാത്തപക്ഷം പാടങ്ങളില്‍ മുട്ടിപ്പുല്ലു കിളിര്‍പ്പിക്കുമെന്നാണ് ഉയര്‍ത്തിയ ഭീഷണി. 1907ല്‍ ആണ് ഈ സമരം അവസാനിക്കുന്നത്. ദിവാന്‍ നിയോഗിച്ച പ്രതിനിധി നടത്തിയ ചര്‍ച്ചയില്‍ അയിത്ത ജാതിക്കാരായ കുട്ടികള്‍ക്ക് സ്‌കൂള്‍ പ്രവേശവും അയിത്ത ജാതിക്കാര്‍ക്ക് സഞ്ചാര സ്വാതന്ത്ര്യവും അനുവദിച്ചു.
ഇന്ത്യയിലെ തന്നെ ആദ്യത്തെ നിയമനിര്‍മാണ സഭയെന്ന് അറിയപ്പെടുന്ന ശ്രീമൂലം പ്രജാസഭയി (ശ്രീമൂലം പോപ്പുലര്‍ അസംബ്ലി)ല്‍ അയ്യങ്കാളി അംഗമായിരുന്നു. അയിത്തജാതിക്കാര്‍ നേരിടുന്ന പ്രശ്‌നങ്ങള്‍ സഭയില്‍ അവതരിപ്പിക്കാന്‍ അതേ സമുദായത്തില്‍ നിന്നുള്ളവര്‍ വേണമെന്ന ആവശ്യം ഉയര്‍ന്ന് വന്ന സാഹചര്യത്തിലായിരുന്നു അയ്യങ്കാളിയുടെ സഭാപ്രവേശനം. പി രാജഗോപാലാചാരിയാണ് അയ്യങ്കാളിയെ 1911 ഡിസംബര്‍ 5ന് സഭയിലേക്ക് നോമിനേറ്റ് ചെയ്യുന്നത്. സഭാംഗമായിരുന്ന കുമാരനാശാന്‍ അയ്യങ്കാളിയ്ക്ക് ഹൃദ്യമായ സ്വാഗതമേകിയെന്നാണ് ചരിത്രം പറയുന്നത്. 1912 ഫെബ്രുവരി 27 ന് നടന്ന ശ്രീമൂലം പ്രജാസഭയുടെ എട്ടാമത് യോഗത്തില്‍ അയ്യങ്കാളി പങ്കെടുത്തു സംസാരിച്ചു. പട്ടയഭൂമി പതിച്ച് നല്‍കുന്നതിനെക്കുറിച്ചായിരുന്നു അദ്ദേഹം ആദ്യമായി സഭയില്‍ സംസാരിച്ചത്.
തീണ്ടല്‍, തൊടീല്‍, അടിമത്തം എന്നിങ്ങനെ പുലയര്‍ ഉള്‍പ്പെടെയുള്ള അടിച്ചമര്‍ത്തപ്പെട്ടിരുന്ന വിഭാഗക്കാരുടെ അവകാശങ്ങള്‍ക്ക് വേണ്ടി അയ്യങ്കാളി രൂപപ്പെടുത്തിയ സംഘത്തിന്റെ പേരാണ് പൊതുവെ അയ്യങ്കാളിപ്പട എന്ന് അറിയപ്പെടുന്നത്. ഇത് ഏതെങ്കിലും സംഘടനരൂപത്തില്‍ ആയിരുന്നില്ലെന്നാണ് മനസിലാക്കാന്‍ കഴിയുന്നത്. അയ്യന്‍കാളിയുടെ സമരങ്ങള്‍ കൂടുതലും സവര്‍ണരോടുള്ള ഏറ്റുമുട്ടലുകളായിരുന്നു. അയ്യന്‍കാളി കളരി അഭ്യസിച്ചിരുന്നു. അവകാശങ്ങള്‍ നേടിയെടുക്കാന്‍ കായികമായ സംഘട്ടനങ്ങള്‍ വേണ്ടിവരുമെന്ന് അദ്ദേഹം വിശ്വസിച്ചിരുന്നു. വില്ലുവണ്ടി സമരമുള്‍പ്പെടെയുള്ള സമരങ്ങള്‍ക്ക് അയ്യങ്കാളിക്ക് പിന്തുണയായതും സംഘര്‍ഷങ്ങളില്‍ സഹായകമായതും ഇതേ അയ്യങ്കാളിപ്പടയാണ്.

Related Articles

Back to top button