KERALALATEST

അസംകാരിക്ക് എന്താ ഇവിടെക്കാര്യം എന്ന് ആരും ചോദിക്കല്ലേ, മുന്‍മി ഇരിട്ടിയില്‍ ബിജെപി സ്ഥാനാര്‍ത്ഥി

കണ്ണൂര്‍: കണ്ണൂരിന്റെ മരുമകളായ അസം സ്വദേശിനി മുന്‍മി തെരഞ്ഞെടുപ്പ് അങ്കത്തിനിറങ്ങുന്നു. ബിജെപി സ്ഥാനാര്‍ത്ഥിയായി ഇരിട്ടി നഗരസഭയിലേക്കാണ് അസം സ്വദേശിനിയായ യുവതി മത്സരിക്കുന്നത്. നഗരസഭയിലെ പതിനൊന്നാം വാര്‍ഡായ വികാസ് നഗറിലാണ് ഇതേ വാര്‍ഡിലെ താമസക്കാരായ എല്‍ഡിഎഫ്, യുഡിഎഫ് സ്ഥാനാര്‍ഥികളോട് ഏറ്റുമുട്ടാന്‍ ലോഹാന്‍പൂര്‍ ജില്ലയിലെ ബോഗിനടി സ്വദേശിനിയായ മുന്‍മി ഇറങ്ങിയിരിക്കുന്നത്.
ചെങ്കല്‍ ക്വാറി തൊഴിലാളിയായ കെഎന്‍ ഷാജിയെ ഏഴ് വര്‍ഷം മുന്‍പ് വിവാഹം കഴിച്ചതോടെയാണ് മുന്‍മി ഇരിട്ടിയിലെത്തുന്നത്. ഇപ്പോള്‍ ഊവാപ്പള്ളിയിലെ അയ്യപ്പ ഭജനമഠത്തിന് സമീപം വാടക വീട്ടിലാണ് മുന്‍മിയും മക്കളായ സാധികയും ഋതികയും അടങ്ങുന്ന കുടുംബം താമസിക്കുന്നത്. നമ്പര്‍ തെറ്റിയെത്തിയ ഒരു ഫോണ്‍ വിളിയാണ് മലനിരകള്‍ കടന്നുള്ള തങ്ങളുടെ പ്രണയവിവാഹത്തിന് കാരണമായതെന്ന് മുന്‍മി പറയുന്നു.
ചെങ്കല്‍ ക്വാറിയില്‍ ജോലിചെയ്യുന്ന ഒരു തൊഴിലാളിയെ ഷാജി വിളിച്ചത് നമ്പര്‍ തെറ്റി മുന്‍മിയുടെ ഫോണിലേക്കു വരികയായിരുന്നു. നന്നായി ഹിന്ദി സംസാരിക്കാന്‍ അറിയുന്ന ആളായിരുന്നു ഷാജി. അതുകൊണ്ടുതന്നെ ഈ വിളി ഒരു പ്രണയമായി വളരുകയും ഇരു വീട്ടുകാരുടെയും സമ്മതത്തോടെ ഇരിട്ടി കീഴൂരിലെ ക്ഷേത്രത്തില്‍ വിവാഹിതരാവുകയും ചെയ്തു. പാരമ്പര്യമായി കോണ്‍ഗ്രസ് കുടുംബമായിരുന്നു തന്റേതെന്ന് മുന്‍മി പറഞ്ഞു.
അച്ഛന്‍ ലീലാ ഗോഗോയിയും അമ്മ ഭവാനി ഗൊഗോയിയും കോണ്‍ഗ്രസ്സുകാരായിരുന്നു. എന്നാല്‍ ഇന്ന് അസം അടിമുടി മാറിയെന്നും നരേന്ദ്ര മോദിയുടെ ഭരണം ചെയ്യുന്ന നല്ല കാര്യങ്ങള്‍ കണ്ട് തന്റെ കുടുംബവും ബിജെപിയിലേക്ക് മാറിയെന്നും നല്ല പച്ച മലയാളത്തില്‍ മുന്‍മി പറഞ്ഞു. മലയാളം പഠിച്ചതോടെ അസമിസ് ഭാഷ തന്നെ മറവിയിലേക്കു പോയി. എന്നാല്‍ മലയാളം എഴുതാനും വായിക്കാനും കഴിയാത്തതാണ് പ്രയാസമെന്നും അതുകൂടി പഠിക്കുന്നുണ്ടെന്നും മുന്‍മി പറഞ്ഞു. വീടുകയറിയുള്ള പ്രചരണം തുടങ്ങിയിട്ടുണ്ട്. പാര്‍ട്ടി പ്രവര്‍ത്തകര്‍ എപ്പോഴും പ്രചരണത്തിന് കുടെയുള്ളതിനാല്‍ ജനങ്ങളുമായി ആശയവിനിമയത്തിന് പ്രയാസമില്ലെന്നാണ് മുന്‍മി പറയുന്നത്. എന്തു തന്നെയായാലും കണ്ണൂരിന് കൗതുകമായിരിക്കുകയാണ് അസം സ്വദേശിനിയുടെ തെരഞ്ഞെടുപ്പ് പോരാട്ടം.

Related Articles

Back to top button

Adblock Detected

Please consider supporting us by disabling your ad blocker