വയനാട്: സംസ്ഥാന സര്‍ക്കാരിനെതിരെ ശക്തമായ പ്രചാരണം നടത്തി തദ്ദേശ തെരഞ്ഞെടുപ്പില്‍ മികച്ച നേട്ടമുണ്ടാക്കുന്നതിനായി മിഷന്‍ 2025 അവതരിപ്പിച്ച് പ്രതിപക്ഷനേതാവ് വിഡി സതീശന്‍. വയനാട്ടില്‍ കെപിസിസി ക്യാമ്പ് എക്‌സിക്യൂട്ടീവിലാണ് പ്രതിപക്ഷ നേതാവ് തന്റെ മിഷന്‍ 2025 അവതരിപ്പിച്ചത്. പ്രാദേശിക വിഷയങ്ങള്‍ ഉയര്‍ത്തി ശക്തമായ പ്രതിഷേധവുമായി രംഗത്ത് വരാനാണ് മിഷന്‍ 2025 ലൂടെ കോണ്‍ഗ്രസ് നേതാവ് ആവശ്യപ്പെടുന്നത്.
തദ്ദേശ തെരഞ്ഞെടുപ്പില്‍ വലിയ വിജയം നേടാന്‍ പ്രാദേശിക വിഷയങ്ങള്‍ സജീവ ചര്‍ച്ചയാക്കണമെന്ന് ഇതില്‍ നിര്‍ദ്ദേശിക്കുന്നു. 2019 – 2024 ലോക്‌സഭ തെരഞ്ഞെടുപ്പുകളില്‍ പാര്‍ട്ടികള്‍ക്ക് നിയമസഭ മണ്ഡല തലത്തില്‍ നടത്താനായ പ്രകടനം താരതമ്യം ചെയ്ത ക്യാമ്പില്‍ ബിജെപിയുടെ പ്രകടനം ഗൗരവത്തോടെ കാണണമെന്നും അഭിപ്രായമുയര്‍ന്നു. സുരേഷ് ഗോപിയുടെ വിജയത്തിന് സിനിമാതാരം എന്ന പ്രതിച്ഛായ സഹായിച്ചുവെന്നും അഭിപ്രായം ഉയര്‍ന്നു. ബിജെപിയുടെ ചിട്ടയായ പ്രവര്‍ത്തനം തൃശ്ശൂരിലെ വിജയത്തിന് കാരണമായെന്ന് മറ്റൊരു വിഭാഗം ചൂണ്ടിക്കാട്ടി.
സിപിഎം വിരുദ്ധ വോട്ടുകള്‍ മലബാറില്‍ കോണ്‍ഗ്രസിന് കിട്ടിയപ്പോള്‍ തെക്കന്‍ കേരളത്തില്‍ ബിജെപിയിലേക്കാണ് ആ വോട്ടുകള്‍ പോയതെന്നത് ഗൗരവതരമെന്നും ക്യാമ്പില്‍ അഭിപ്രായം ഉയര്‍ന്നു.
