KERALALATEST

ദുരിതാശ്വാസ വിതരണത്തില്‍ വിവേചനം എല്‍ഡിഎഫ് സര്‍ക്കാരിനു ഭൂഷണമല്ല; വിമര്‍ശനവുമായി സിപിഐ

തൊടുപുഴ: പെട്ടിമുടി, കരിപ്പൂര്‍ ദുരന്തങ്ങളില്‍ മരിച്ചവര്‍ക്കുള്ള ദുരാതാശ്വാസ വിതരണത്തില്‍ സര്‍ക്കാര്‍ കാട്ടുന്ന വിവേചനത്തിനെതിരെ സിപിഐ ജില്ലാ നേതൃത്വം. പെട്ടിമുടി മണ്ണിടിച്ചില്‍ ദുരന്തത്തില്‍ മരിച്ചവര്‍ക്കു നല്‍കുന്നതിന്റെ ഇരട്ടി ധനസാഹായം കരിപ്പൂര്‍ വിമാന ദുരന്തത്തില്‍ മരിച്ചവര്‍ക്ക് നല്‍കാനുള്ള സര്‍ക്കാര്‍ തീരുമാനത്തിനെതിരെ സിപിഐ ഇടുക്കി ജില്ലാ സെക്രട്ടറി കെ.കെ.ശിവരാമനാണ് രംഗത്തെത്തിയത്.
ദുരിതാശ്വാസ വിതരണത്തില്‍ വിവേചനം എല്‍ഡിഎഫ് സര്‍ക്കാരിനു ഭൂഷണമല്ല. ഉരുള്‍പൊട്ടി മരിച്ചവര്‍ക്ക് 5 ലക്ഷം രൂപയും വിമാനാപകടത്തില്‍ മരിച്ചവര്‍ക്ക് 10 ലക്ഷവും പ്രഖ്യാപിച്ചത് വിവേചനപരമാണ്. ഇടതു സര്‍ക്കാരിനു ചേരാത്ത നടപടിയാണിത്.പെട്ടിമുടി ദുരന്തത്തില്‍ മരിച്ചവര്‍ പാവങ്ങളില്‍ പാവങ്ങളാണ്. അന്നന്നത്തെ അന്നത്തിനു വേണ്ടി കൂലിവേല ചെയ്യുന്നവര്‍. ഇവര്‍ക്കു ലഭിക്കുന്ന കൂലി കൊണ്ടാണ് കുടുംബം ഓരോ ദിവസവും ജീവിതം മുന്നോട്ടുകൊണ്ടുപോകുന്നത്. ഇവര്‍ക്ക് അര്‍ഹമായ നഷ്ടപരിഹാരം നല്‍കണം” ശിവരാമന്‍ ആവശ്യപ്പെട്ടു.

പെട്ടിമുടിയില്‍ മണ്ണിടിഞ്ഞുണ്ടായ അപകടത്തില്‍ മരിച്ചവരുടെ എണ്ണം 26 ആയി. ശനിയാഴ്ച സന്ധ്യയ്ക്ക് 6 വരെ നടത്തിയ തിരച്ചിലിനിടെ കണ്ടെടുത്ത 8 പേരും മരിച്ചിരുന്നു. കണ്ടെത്താന്‍ ബാക്കിയുള്ള 40 പേര്‍ക്കായി ഇന്നും തിരച്ചില്‍ തുടരും. 26 മൃതദേഹങ്ങളും രാജമല ആശുപത്രിയിലെ പോസ്റ്റ്‌മോര്‍ട്ടത്തിനു ശേഷം സമീപത്തെ മൈതാനത്ത് മൂന്നു കുഴികളിലായി കൂട്ടത്തോടെയാണു സംസ്‌കരിച്ചത്.

Related Articles

Back to top button