KERALALATEST

മകന്റെ ചവിട്ടേറ്റ് വാരിയെല്ലുകള്‍ ഒടിഞ്ഞ പിതാവ് മരിച്ചു

കറുകച്ചാല്‍: മകന്റെ ചവിട്ടേറ്റ് വാരിയെല്ലുകള്‍ ഒടിഞ്ഞ് ഗുരുതരമായി പരുക്കേറ്റ ശാന്തിപുരം റൈട്ടന്‍കുന്ന് ചക്കുങ്കല്‍ ജോണ്‍ ജോസഫ് (കൊച്ചൂട്ടി65) മരണത്തിനു കീഴടങ്ങി.
ചെത്തിപ്പുഴയിലെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്നലെ പുലര്‍ച്ചെയാണ് മരണം. കറുകച്ചാല്‍ പൊലീസ് കസ്റ്റഡിയിലെടുത്ത മകന്‍ ജോസി ജോണിനെ (37) കോടതി റിമാന്‍ഡ് ചെയ്തു.
റബര്‍ ടാപ്പിങ് തൊഴിലാളിയായിരുന്നു ജോണ്‍. ഇരുവൃക്കകളും തകരാറിലായതോടെ 3 വര്‍ഷമായി ഡയാലിസിസ് ചെയ്താണ് കഴിഞ്ഞിരുന്നത്. ഞായറാഴ്ച രാവിലെ 11നായിരുന്നു ക്രൂരമായ മര്‍ദനത്തിന് ഇരയായത്. മദ്യപിച്ചെത്തിയ ജോസി അച്ഛനെയും തടയാനെത്തിയ അമ്മ അന്നമ്മ(62)യെയും മര്‍ദിച്ചെന്നാണ് പൊലീസ് കേസ്. ജോണിനെ കട്ടിലില്‍ നിന്നു വലിച്ച് നിലത്തിട്ട് വയറില്‍ ചവിട്ടുകയായിരുന്നു. ജോണിന്റെ 6 വാരിയെല്ലുകള്‍ ചവിട്ടേറ്റ് ഒടിഞ്ഞു. ആന്തരികാവയവങ്ങള്‍ക്കും ഗുരുതരമായി പരുക്കേറ്റു. രക്തസ്രാവവുമുണ്ടായി. ശസ്ത്രക്രിയ നടത്തിയെങ്കിലും രക്ഷിക്കാനായില്ല. മൃതദേഹം പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ക്ക് വിട്ടുനല്‍കും. സംസ്‌കാരം പിന്നീട് കൂത്രപ്പള്ളി സെന്റ് മേരീസ് പള്ളിയില്‍.
ഗുജറാത്തില്‍ വാഹനങ്ങളുടെ ടയര്‍ പഞ്ചര്‍ ഒട്ടിക്കുന്ന ജോലി ചെയ്തിരുന്ന ജോസി നാലു മാസം മുന്‍പാണ് നാട്ടിലെത്തിയത്. നാട്ടിലെത്തിയാല്‍ മാതാപിതാക്കള്‍ക്ക് മര്‍ദനമേല്‍ക്കുമായിരുന്നെന്ന് അയല്‍ക്കാര്‍ പറയുന്നു. സ്ഥിരമായി മദ്യപിച്ചിരുന്നതായും നാട്ടുകാരുമായി അടിപിടി ഉണ്ടാക്കിയിരുന്നതായും പറയുന്നു. സന്ധ്യാസമയങ്ങളില്‍ വീട്ടില്‍ നിന്ന് പിതാവിന്റെ ഉച്ചത്തിലുള്ള നിലവിളി കേട്ടിരുന്നതായി അയല്‍വാസികള്‍ പറയുന്നു.
അരയില്‍ കത്തിയുമായിട്ടാണ് പലപ്പോഴും കാണപ്പെട്ടിരുന്നത്. പിതാവിന് മര്‍ദനമേറ്റ ദിവസം രാത്രിയിലും ജോസി നാട്ടുകാരുമായി വഴക്കിട്ടിരുന്നു. ജോസി രണ്ടുതവണ വിവാഹം കഴിച്ചിരുന്നതായും ബന്ധുക്കള്‍ പറയുന്നു. വീട്ടുകാര്‍ ആലോചിച്ചു നടത്തിയതായിരുന്നു ആദ്യ വിവാഹം. ഇതില്‍ ഒരു കുട്ടിയുമുണ്ട്. ഏതാനും വര്‍ഷത്തിനു ശേഷം ഈ ബന്ധം അവസാനിച്ചു. തുടര്‍ന്ന് മറ്റൊരു യുവതിയെയും കൂട്ടി ജോസി വീട്ടിലെത്തിയിരുന്നു. ഇതില്‍ രണ്ടു കുട്ടികളുണ്ട്. ഇവരെയും ഉപദ്രവിക്കാന്‍ തുടങ്ങിയതോടെ ഏതാനും വര്‍ഷം മുന്‍പ് ഈ ബന്ധവും അവസാനിച്ചതായും നാട്ടുകാര്‍ പറയുന്നു. ജോണിന്റെ ഇരുവൃക്കകളും തകരാറിലായത് 3 വര്‍ഷം മുന്‍പാണ്. ഇതോടെ കുടുംബത്തിന്റെ വരുമാനം ചികിത്സയ്ക്കുപോലും തികയാതെയായി. നാട്ടുകാരുടെയും ബന്ധുക്കളുടെയും സഹായത്തോടെയാണ് ഡയാലിസിസിന് പണം കണ്ടെത്തിയിരുന്നത്.

Related Articles

Back to top button