തിരുവനന്തപുരം: കേരള കേഡറിലെ രണ്ട് മുതിര്‍ന്ന എഡിജിപിമാര്‍ക്ക് സ്ഥാനക്കയറ്റം. ക്രൈംബ്രാഞ്ച് മേധാവി ടോമിന്‍ ജെ തച്ചങ്കരിക്കും എസ്പിജി ഡയറക്ടറായി കേന്ദ്ര ഡപ്യൂട്ടേഷനില്‍ പ്രവര്‍ത്തിക്കുന്ന അരുണ്‍ കുമാര്‍ സിന്‍ഹയ്ക്കുമാണ് ഡിജിപി റാങ്ക്. റോഡ് സേഫ്റ്റി കമ്മീഷണര്‍ എന്‍ ശങ്കര്‍ റെഡ്ഡി വിരമിച്ച ഒഴിവിലേക്കാണ് നിയമനം.
1987 ലെ കേരള കേഡര്‍ ഐപിഎസ് ഉദ്യോഗസ്ഥരാണ് ഇരുവരും. ലോക്‌നാഥ് ബെഹ്‌റ, ഋഷിരാജ് സിങ്, ആര്‍ ശ്രീലേഖ എന്നിവരാണ് ഡിജിപി റാങ്കിലുള്ള മറ്റുള്ളവര്‍. ടോമിന്‍ തച്ചങ്കരിയുടെ നിയമന ഉത്തരവ് പ്രത്യേകം പുറപ്പെടുവിക്കുമെന്നും ചീഫ് സെക്രട്ടറി വിശ്വാസ് മേത്ത പത്രക്കുറിപ്പില്‍ വ്യക്തമാക്കി.
