BREAKING NEWSKERALANEWS

കൃഷിഭൂമി കൃഷിക്കുമാത്രം, മറ്റൊന്നും പാടില്ല; സംസ്ഥാനം മുഴുവന്‍ ബാധകമെന്നും ഹൈക്കോടതി

കൊച്ചി: കൃഷിയാവശ്യങ്ങള്‍ക്ക് മാത്രമായി അനുവദിച്ച ഭൂമിയിലെ നിര്‍മാണം സംബന്ധിച്ച് ഹൈക്കോടതിയുടെ സുപ്രധാന ഉത്തരവ് . ഭൂപതിവ് ചട്ടപ്രകാരം കൃഷിയാവശ്യങ്ങള്‍ക്കുളള ഭൂമി മറ്റാവശ്യങ്ങള്‍ക്ക് ഉപയോഗിക്കരുതെന്ന മുന്‍ ഉത്തരവ് ശരിവെച്ച ഹൈക്കോടതി ഈ ഉത്തരവ് സംസ്ഥാനത്തിന് മുഴുവന്‍ ബാധകമാണെന്നും വ്യക്തമാക്കി. ഇടുക്കിയിലെ എട്ടു വില്ലേജുകള്‍ക്ക് മാത്രമായി നിജപ്പെടുത്തി സംസ്ഥാന സര്‍ക്കാര്‍ കൊണ്ടുവന്ന വിജ്ഞാപനമാണ് ഇതോടെ അസ്ഥിരപ്പെട്ടു.
ഭൂപതിവ് ചട്ടപ്രകാരം കൃഷി ആവശ്യത്തിന് മാത്രമായി കൈമാറിയ ഭൂമി മറ്റാവശ്യങ്ങള്‍ക്ക് ഉപയോഗിക്കരുതെന്നായിരുന്നു ജസ്റ്റീസ് വിനോദ് ചന്ദ്രന്റെ മുന്‍ ഉത്തരവ്. ഈ ഉത്തരവിന്റെ ചുവടുപിടിച്ച് വിജ്ഞാപനം പുറത്തിറക്കിയ സംസ്ഥാന സര്‍ക്കാര്‍ ഈ വ്യവസ്ഥ പക്ഷേ മൂന്നാര്‍ മേഖല ഉള്‍പ്പെടുന്ന ഇടുക്കിയിലെ എട്ടുവില്ലേജുകള്‍ക്ക് മാത്രമായി ചുരുക്കി. ഇതോടെ സംസ്ഥാനത്തിന്റെ മറ്റു ഭാഗങ്ങളില്‍ ഭൂപതിവ് ചട്ടപ്രകാരം വ്യക്തികള്‍ക്ക് ലഭിച്ച ഭൂമിയില്‍ നിര്‍മാണ പ്രവര്‍ത്തനങ്ങള്‍ നടത്താമെന്ന വ്യാഖ്യാനമുണ്ടായി. സര്‍ക്കാരിന്റെ ഈ നടപടി ചോദ്യം ചെയ്തുളള സ്വകാര്യ ഹര്‍ജിയില്‍ വിജ്ഞാപനം സംസ്ഥാന വ്യാപകമാക്കണമെന്ന് ഹൈക്കോടതി നേരത്തെ തന്നെ നിര്‍ദേശിച്ചിരുന്നു. എന്നാല്‍ സര്‍ക്കാരിന്റെ ഭാഗത്തുനിന്ന് തുടര്‍ നടപടിക്ക് കാലതാമസമുണ്ടായതോടെയാണ് ജസ്റ്റീസ് മുഹമ്മദ് മുഷ്താഖിന്റെ ബെഞ്ച് മുന്‍ ഉത്തരവ് സംസ്ഥാനത്താകെ ബാധകമാണെന്ന് വ്യക്തമാക്കി പുതിയ ഉത്തരവ് പുറപ്പെടുവിച്ചത്.
ഇതനുസരിച്ച് നിര്‍മാണ പ്രവര്‍ത്തനത്തിന് അനുമതി തേടി വ്യക്തികള്‍ സമീപിച്ചാല്‍ പ്രസ്തുത ഭൂമി ഭൂപതിവ് ചട്ടപ്രകാരം കൈമാറിയ കൃഷിഭൂമിയാണോയെന്ന് പരിശോധിച്ച് ഉറപ്പുവരുത്തണം. അങ്ങനെയെങ്കില്‍ അക്കാര്യം കൈവശാവകാശ സര്‍ട്ടിഫിക്കറ്റില്‍ വ്യക്തമാക്കണം. കൃഷിയാവശ്യത്തിന് നല്‍കിയ ഭൂമയില്‍ മറ്റൊരു നിര്‍മാണ പ്രവര്‍ത്തനവും പാടില്ലെന്ന ഹൈക്കോടതി മുന്‍ ഉത്തരവ് ശരിവെച്ചാണ് നടപടി. ഇതോടെ കേരളത്തിലെ ടൂറിസം മേഖലകളിലടക്കം ഭൂപതിവ് ചട്ടപ്രകാരം കൃഷിയാവശ്യത്തിനായി നല്‍കിയ ഭൂമിയില്‍ നിര്‍മാണ പ്രവര്‍ത്തനത്തിന് അനുമതി നല്‍കാന്‍ സര്‍ക്കാരിനോ തദ്ദേശ സ്ഥാപനങ്ങള്‍ക്കോ കഴിയില്ല.

Related Articles

Back to top button