തിരുവനന്തപുരം: രാസപരിശോധനയില്‍ ‘ജവാന്‍’ ബ്രാന്‍ഡ് മദ്യത്തിന് വീര്യം കൂടുതലാണെന്നു കണ്ടെത്തിയതോടെ ജൂലൈ 20 ന് ഉല്‍പാദിപ്പിച്ച മൂന്നു ബാച്ച് മദ്യത്തിന്റെ വില്‍പന അടിയന്തരമായി നിര്‍ത്താന്‍ എക്‌സൈസ് വകുപ്പിന്റെ ഉത്തരവ്. രാസപരിശോധനയിലാണ് മദ്യത്തിന് വീര്യം കൂടിയതായി കണ്ടെത്തിയത്.
സാംപിള്‍ പരിശോധനയില്‍ മദ്യത്തിന്റെ വീര്യം 39.09% v/v, 38.31% v/v, 39.14% v/v ആണെന്ന് കണ്ടെത്തിയതിന് പിന്നാലെയാണ് 245, 246, 247 എന്നീ ബാച്ചുകളിലെ മദ്യത്തിന്റെ വില്‍പന മരവിപ്പിച്ചത്. ഇതുസംബന്ധിച്ച് എല്ലാ ഡിവിഷനുകളിലെയും ഡെപ്യൂട്ടി എക്‌സൈസ് കമ്മീഷണര്‍മാര്‍ക്ക് എക്‌സൈസ് കമ്മിഷണര്‍ അറിയിപ്പ് നല്‍കി. കേരള സര്‍ക്കാരിന് കീഴിലെ ട്രാവന്‍കൂര്‍ ഷുഗേര്‍സ് ആന്‍ഡ് കെമിക്കല്‍സ് ലിമിറ്റഡാണ് ജവാന്‍ മദ്യത്തിന്റെ നിര്‍മാതാക്കള്‍.
കോഴിക്കോട് മുക്കത്തെ ഒരു ബാര്‍ഹോട്ടലില്‍ നിന്നും കഴിഞ്ഞ ആഴ്ച മദ്യം കഴിച്ചവര്‍ക്ക് ശാരീരിക ബുദ്ധിമുട്ട് അനുഭവപ്പെട്ടിരുന്നു. പിന്നാലെ മദ്യം വാങ്ങിയവര്‍ എക്‌സൈസില്‍ പരാതി നല്‍കി. തുടര്‍ന്ന് രണ്ട് കുപ്പികള്‍ പിടിച്ചെടുത്ത എക്‌സൈസ് ഉദ്യോഗസ്ഥര്‍ ഇത് പരിശോധനക്കായി ലാബിലേക്ക് അയച്ചു. ജവാനില്‍ 42.18 ശതമാനമാണ് ഈതൈല്‍ ആല്‍ക്കഹോള്‍ വേണ്ടതെങ്കിലും ബാറില്‍ നിന്ന് പരിശോധനയ്ക്ക് അയച്ച കുപ്പിയില്‍ 62.51 ശതമാനമായിരുന്നു ആല്‍ക്കഹോളിന്റെ അളവ്.
ബാറില്‍ നിന്ന് എക്‌സൈസ് പിടിച്ചെടുത്ത മദ്യം റീജനല്‍ കെമിക്കല്‍ എക്‌സാമിനേഴ്‌സ് ലാബില്‍ പരിശോധിച്ചപ്പോഴാണ് അളവില്‍ കൂടുതല്‍ ആല്‍ക്കഹോള്‍ കണ്ടെത്തിയത്. ബാര്‍ ഉടമയ്‌ക്കെതിരെ അബ്കാരി നിയമപ്രകാരം കേസ് രജിസ്റ്റര്‍ ചെയ്തിരുന്നു. തുടര്‍ അന്വേഷണത്തിലാണ് ചില ബാച്ചുകളിലെ ജവാന്‍ ബ്രാന്‍ഡ് മദ്യത്തിനു വീര്യം കൂടുതലാണെന്ന് സ്ഥിരീകരിച്ചത്.
