ENTERTAINMENTMALAYALAM

മരക്കാര്‍ മാര്‍ച്ച് 26ന് എത്തില്ല, ആറാട്ട് ഓഗസ്റ്റിലെത്തും

സംസ്ഥാനത്തെ തീയേറ്ററുകള്‍ വീണ്ടും തുറന്നിരിക്കുകയാണ്. മാസ്റ്ററായിരുന്നു ആദ്യം പ്രദര്‍ശിപ്പിച്ച ചിത്രം. കഴിഞ്ഞ ദിവസം ജയസൂര്യ ചിത്രം വെള്ളം ലോക്ക്ഡൗണിന് ശേഷം തീയേറ്ററുകളിലെത്തുന്ന ആദ്യ മലയാള ചിത്രവുമായി മാറി. തീയേറ്ററുകള്‍ വീണ്ടും തുറക്കുമ്പോള്‍ റിലീസ് കാത്തു നില്‍ക്കുന്ന വമ്പന്‍ സിനിമകള്‍ ധാരാളമുണ്ട്. ആരാധകരും ഏറെ പ്രതീക്ഷകളോടെയാണ് റിലീസുകള്‍ക്കായി കാത്തിരിക്കുന്നത്. ആരാധകര്‍ കാത്തിരിക്കുന്ന പ്രധാന സിനിമകളിലൊന്നാണ് മരക്കാര്‍ അറബിക്കടലിന്റെ സിംഹം. എന്നാല്‍ മരക്കാറിനായുള്ള കാത്തിരിപ്പ് നീളുമെന്നാണ് ഇപ്പോള്‍ വ്യക്തമാകുന്നത്.
മാര്‍ച്ച് 26 ന് മരക്കാര്‍ തീയേറ്ററുകളിലെത്തുമെന്നായിരുന്നു നേരത്തെ അറിയിച്ചിരുന്നത്. എന്നാല്‍ ഇപ്പോള്‍ പുറത്ത് വരുന്ന റിപ്പോര്‍ട്ടുകള്‍ വ്യക്തമാക്കുന്നത് മരക്കാര്‍ ഓണത്തിനായിരിക്കും തീയേറ്ററുകളിലെത്തുക എന്നാണ്. ചിത്രത്തിന്റെ അണിയറ പ്രവര്‍ത്തകര്‍ ഓണക്കാലത്ത് റിലീസ് ചെയ്യാന്‍ തീരുമാനിക്കുകയായിരുന്നു.
അതേസമയം, മോഹന്‍ലാലിന്റെ പുതിയ ചിത്രമായ ആറാട്ട് ഓഗസ്റ്റിലായിരിക്കും എത്തുക എന്നും സൂചനകള്‍ വ്യക്തമാക്കുന്നത്. ആറാട്ട് ഓഗസ്റ്റ് 12 ന് എത്തുമെന്ന് തീയേറ്ററുകള്‍ക്ക് അറിയിപ്പ് ലഭിച്ചതായാണ് റിപ്പോര്‍ട്ടുകള്‍ പറയുന്നത്. ശ്രദ്ധ ശ്രീനാഥ് നായികയാകുന്ന ചിത്രം സംവിധാനം ചെയ്യുന്നത് ബി ഉണ്ണികൃഷ്ണനാണ്. ആറാട്ടിന്റെ ചിത്രീകരണം പുരോഗമിക്കുകയാണ്.
ആരാധകര്‍ ഏറെ പ്രതീക്ഷയോടെയാണ് മരക്കാറിനായി കാത്തിരിക്കുന്നത്. പ്രിയദര്‍ശന്‍ സംവിധാനം ചെയ്യുന്ന ചിത്രത്തില്‍ മഞ്ജു വാര്യര്‍, പ്രണവ് മോഹന്‍ലാല്‍, കല്യാണി പ്രിയദര്‍ശന്‍, കീര്‍ത്തി സുരേഷ് എന്നിവരും പ്രധാന വേഷങ്ങളിലെത്തുന്നുണ്ട്. ആന്റണി പെരുമ്പാവൂരാണ് ചിത്രത്തിന്റെ നിര്‍മ്മാതാവ്. ചില പ്രതിസന്ധികള്‍ പരിഹരിക്കാനുണ്ടെന്നാണ് അണിയറ പ്രവര്‍ത്തകര്‍ പറയുന്നത്.
അതേസമയം, മമ്മൂട്ടി ചിത്രങ്ങളായ വണ്‍, ദ പ്രീസ്റ്റ് തുടങ്ങി ഇരുപതോളം ചിത്രങ്ങളാണ് റിലീസിന് തയ്യാറെടുക്കുന്നത്. കൊവിഡ് പശ്ചാത്തലത്തിലായിരുുന്നു സംസ്ഥാനത്തെ തീയേറ്ററുകള്‍ അടച്ചിട്ടത്. കഴിഞ്ഞ ദിവസം വെള്ളം എന്ന ജയസൂര്യ ചിത്രം തീയേറ്ററുകളിലെത്തി. മികച്ച പ്രതികരണമാണ് വെള്ളത്തിന് ലഭിക്കുന്നത്. തീയേറ്ററുകള്‍ വീണ്ടും ഉണരുമ്പോള്‍ പ്രതീക്ഷയോടെ ഉറ്റു നോക്കുകയാണ് സിനിമാ ലോകം.

Related Articles

Back to top button