BREAKING NEWSKERALA

ഓണസദ്യ ഉണ്ടാക്കുന്നതില്‍ മാത്രമല്ല, വിളമ്പിലുമുണ്ട് ശാസ്ത്രം

ഓണത്തിന് പ്രധാനമാണ് ഓണസദ്യ. ആവി പറക്കുന്ന കുത്തരിച്ചോറും മധുരവും പുളിയും ഉപ്പും എരിവുമെല്ലാം കൂടിച്ചേരുന്ന പല തരം കറികളും ശേഷം പായസവും പഴവുമെല്ലാം ഉള്‍പ്പെടുന്ന ഒന്നാണിത്. കായ വറവ്, ശര്‍ക്കരവരട്ടി എന്നിവ ഉള്‍പ്പെടുന്ന ഒന്നു കൂടിയാണ് ഓണസദ്യ. വിഭവങ്ങളുടെ കാര്യത്തില്‍ പലയിടത്തും പല തരം വ്യത്യാസങ്ങള്‍ വരുമെന്നു മാത്രം. ഉദാഹരണത്തിന് കേരളത്തിന്റെ വടക്കോട്ടു പോകുന്തോറും, പ്രത്യേകിച്ച് കണ്ണൂര്‍ പോലുള്ള സ്ഥലങ്ങളില്‍ നോണ്‍ വെജ് വിഭവങ്ങള്‍ സദ്യയ്ക്ക് ഏറെ പ്രധാനമാണ്.
സദ്യ ഉണ്ണുന്നതിന് ശാസ്ത്രമുണ്ട്. ഇതു പോലെ തന്നെ സദ്യ വിളമ്പുന്നതിനും ശാസ്ത്രമുണ്ട്. ഓരോരോ വിഭവങ്ങള്‍ ഇലയുടെ ഓരോ ഇടങ്ങളില്‍ വേണം, വിളമ്പാന്‍. പായ നിലത്തു വിരിച്ച് തുശനിലയില്‍ വേണം, ഓണസദ്യയുണ്ണാന്‍. തൂശനിലയുടെ കൂര്‍ത്ത ഭാഗം ഇരിയ്ക്കുന്നയാളുടെ ഇടതു ഭാഗത്തു വരണം. അതായത് വണ്ണം കുറഞ്ഞ അറ്റം ഭാഗം. കായ വറുത്തത്, ശര്‍ക്കരവരട്ടി എന്നിവ തൂശനിലയുടെ തുഞ്ചത്തായി ഇടതു ഭാഗത്ത് വിളമ്പണം. ഇടതു മൂലയില്‍ അച്ചാറും ഇഞ്ചിപ്പുളിയുമെല്ലാം വിളമ്പണം. ഇടതു വശത്ത് ഇലയുടെ താഴത്തായാണ് പഴം വയ്ക്കുക. പപ്പടം ഇതിനു മുകളില്‍ വയ്ക്കണം. മുഴുവനോടെ കാച്ചിയ പപ്പടമാണ് സദ്യയ്ക്ക് ഉപയോഗിയ്ക്കുക. ഇതിന് അപ്പുറത്തായി പച്ചടി, കിച്ചടി എന്നിവ വിളമ്പുന്നു. മധ്യത്തില്‍ നിന്നും തുടങ്ങി വലതു ഭാഗത്തേക്കായി അവിയല്‍, തോരന്‍, കാളന്‍, ഓലന്‍, കൂട്ടുകറി മുതലായവ വിളമ്പുന്നു.
സാമ്പാര്‍ സാധാരണയായി ചോറിനു നടുവിലാണ് ഒഴിയ്ക്കുന്നത്. ആദ്യം സാമ്പാര്‍ കൂട്ടിയല്ല ഉണ്ണുക. ആദ്യം നെയ്യും പരിപ്പും കൂട്ടി വേണം, കഴിയ്ക്കാന്‍. ഇതിനൊപ്പം പപ്പടവും കൂട്ടാം. പിന്നീട് സാമ്പാര്‍ കൂട്ടി കഴിയ്ക്കാം. പിന്നീട് പുളിശേരി. ചിലയിടത്ത് പുളിശേരി കൂട്ടി മൂന്നാമതുണ്ടാകില്ല. പിന്നീട് പായസം, ഇതിനു ശേഷം പായസത്തിന്റെ മധുരം കളയാന്‍ മോര്, രസം എന്നിവ ചേര്‍ത്ത് ഊണ് എന്നതാണ് പതിവ്. പിന്നീട് അവസാനം പഴം കഴിയ്ക്കാം. ഊണു കഴിഞ്ഞ് ഇല മടക്കുന്നതിനും രീതിയുണ്ട്. സദ്യ ഇഷ്ടപ്പെട്ടാല്‍ മുകളില്‍ നിന്നും താഴേയ്ക്കായി ഇല മടക്കുന്നു.
ആള്‍ ഇരുന്ന ശേഷം മാത്രമാണ് ചോറ് വിളമ്പേണ്ടത്. കറികള്‍ ആദ്യം വിളമ്പാം. പായസം ഊണു കഴിയുന്ന മുറയ്ക്കാണ് വിളമ്പേണ്ടത്. ഊണു കഴിച്ചെഴുന്നേറ്റാല്‍ നാലും കൂട്ടിയുള്ള മുറുക്കുന്നതും പലയിടത്തും പ്രധാനമാണ് .

Related Articles

Back to top button