BREAKING NEWSLATESTWORLD

ക്രിസ്ത്യാനികള്‍ക്കിടയില്‍ അവഗണന; സ്വന്തം സഭ സ്ഥാപിച്ച് പാക് ട്രാന്‍സ്‌ജെന്‍ഡര്‍ സമൂഹം

ഇസ്ലാമാബാദ്: ക്രിസ്ത്യന്‍ സമൂഹത്തില്‍ നിന്നു നേരിടുന്നത് അവഗണനയും നീതിനിഷേധവുമാണെന്ന് ആരോപിച്ച് സ്വന്തമായി സഭ സ്ഥാപിച്ച് പാകിസ്ഥാനിലെ ട്രാന്‍സ്‌ജെന്‍ഡറുകള്‍. സ്വന്തം സമൂഹത്തിനുള്ളില്‍ നിന്നു തന്നെ പലപ്പോഴും പരിഹാസവും ഒറ്റപ്പെടുത്തലും അനുഭവിച്ചതിനെ തുടര്‍ന്നാണ് ട്രാന്‍സ്‌ജെന്‍ഡര്‍ സമൂഹം തങ്ങള്‍ക്കായി മാത്രം പുതിയ സഭ സ്ഥാപിച്ചതെന്നാണ് റിപ്പോര്‍ട്ട്. മറ്റു സഭകളില്‍ അടിച്ചമര്‍ത്തല്‍ നേരിടുന്ന ഇവര്‍ക്ക് ഇവിടെ ശബ്ദമുയര്‍ത്താനാകുമെന്നും അല്‍ ജസീറ റിപ്പോര്‍ട്ടില്‍ ഫറയുന്നു.
യൂനക്കുകള്‍ക്കായി സഭ
ഫസ്റ്റ് ചര്‍ച്ച് ഓഫ് യൂനക്ക്‌സ് എന്നറിയപ്പെടുന്ന സഭ രാജ്യത്ത് ട്രാന്‍സ്‌ജെന്‍ഡര്‍ വിഭാഗത്തിനു വേണ്ടി മാത്രം സ്ഥാപിക്കപ്പെടുന്ന ആദ്യ ക്രിസ്ത്യന്‍ സഭയാണ്. അടുത്തിടെ നടന്ന സഭായോഗത്തില്‍ നിരവധി ട്രാന്‍സ് വനിതകളാണ് പങ്കെടുത്തതെന്നും മുതിര്‍ന്ന ഒരു ട്രാന്‍സ്‌ജെന്‍ഡര്‍ക്കൊപ്പം ഇവര്‍ ബൈബിള്‍ വായിക്കുകയും ഗാനങ്ങള്‍ ആലപിക്കുകയും ചെയ്തതായി അന്താരാഷ്ട്ര മാധ്യമത്തിന്റെ റിപ്പോര്‍ട്ടില്‍ പറയുന്നു. ദക്ഷിണേഷ്യന്‍ മേഖലയിലെ ചില പ്രദേശങ്ങളില്‍ ട്രാന്‍സ് സ്ത്രീകളെ വിശേഷിപ്പിക്കുന്ന പദമാണ് ‘യൂനക്ക്’.
യൂനക്കുകള്‍ ദൈവത്തിനു പ്രിയപ്പെട്ടവരാണെന്നാണ് സഭയുടെ സഹസ്ഥാപകയും പാസ്റ്ററുമായ ഗസാല ഷഫീഖ് പറയുന്നത്. ഈ ഉദ്ദേശം മുന്‍നിര്‍ത്തി തന്നെയാണ് സഭയ്ക്ക് ഈ പേര് നല്‍കിയിരിക്കുന്നതെന്നും അവര്‍ പറഞ്ഞു. പാകിസ്ഥാനില്‍ താരത്യമേന ക്രിസ്ത്യന്‍ വിഭാഗം കൂടുതലായുള്ള കറാച്ചിയിലാണ് പുതിയ സഭ സ്ഥാപിക്കപ്പെട്ടിരിക്കുന്നത്. ക്രിസ്ത്യന്‍ സമൂഹത്തിനുള്ളില്‍ തങ്ങള്‍ക്ക് തുല്യപരിഗണന കിട്ടുന്നില്ലെന്നാണ് ഇവരുടെ ആക്ഷേപം. ‘പരിഹസിക്കുന്ന കണ്ണുകളോടെയാണ് ആളുകള്‍ ഞങ്ങളെ നോക്കുന്നത്.’ ട്രാന്‍സ്‌ജെന്‍ഡര്‍ എന്ന നിലയില്‍ പലവട്ടം പീഡനങ്ങള്‍ നേരിട്ടിട്ടുള്ള നേനാ സൗത്രേ പറഞ്ഞു. ആര്‍ക്കും അടുത്തിരിക്കാന്‍ പോലും ഇഷ്ടമല്ലെന്നും ഞങ്ങള്‍ മോശക്കാരാണെന്നുമാണ് മറ്റുള്ളവര്‍ പറയുന്നതെന്ന് അവര്‍ പറഞ്ഞു. ‘ഞങ്ങളും മനുഷ്യരാണ്. ഞങ്ങളും ജനങ്ങളുടെ ഭാഗമാണ്. ഞങ്ങള്‍ക്ക് എന്താണ് കുഴപ്പം? ഞങ്ങള്‍ ഇങ്ങനെയാണ്.’ അവര്‍ പറഞ്ഞു.
മൂന്നാം ലിംഗമെന്ന ഗണത്തില്‍ പെടുത്തി പാക് സര്‍ക്കാര്‍ ട്രാന്‍സ്‌ജെന്‍ഡറുകളെ അംഗീകരിച്ചിട്ടുണ്ടെങ്കിലും രാജ്യത്ത് ജാതിമതഭേദമില്ലാതെ ട്രാന്‍സ്‌ജെന്‍ഡറുകള്‍ കടുത്ത പീഡനം നേരിടുന്നുണ്ടെന്നാണ് റിപ്പോര്‍ട്ടുകള്‍. പലപ്പോഴും വീടുകളില്‍ നിന്ന് പുറത്താക്കപ്പെടുന്ന ഇവര്‍ ഭിക്ഷയെടുത്തും വിവാഹചടങ്ങുകളില്‍ നൃത്തം ചെയ്തുമാണ് ഉപജീവനം കണ്ടെത്തുന്നത്. 95 ശതമാനത്തിലധികം മുസ്ലീങ്ങളുള്ള പാകിസ്ഥാനില്‍ ന്യൂനപക്ഷമായ ക്രിസ്ത്യന്‍ വംശജര്‍ അടിച്ചമര്‍ത്തപ്പെടുന്നുവെന്ന റിപ്പോര്‍ട്ടുകള്‍ക്കിടെയാണ് ക്രിസ്ത്യന്‍ ന്യൂനപക്ഷങ്ങള്‍ക്കുള്ളിലുള്ള ട്രാന്‍സ്‌ജെന്‍ഡറുകള്‍ ഇത്തരത്തില്‍ പരാതിയുമായി എത്തുന്നത്.
പലപ്പോഴും ക്രിസ്ത്യാനികള്‍ക്കിടയില്‍ തന്നെ ക്രിസ്ത്യന്‍ ട്രാന്‍സ്‌ജെന്‍ഡറുകള്‍ അവഗണിക്കപ്പെടുന്ന സ്ഥിതിയാണുള്ളതെന്നാണ് അല്‍ ജസീറ റിപ്പോര്‍ട്ടില്‍ പറയുന്നത്. പള്ളികളില്‍ പലപ്പോഴും ഏറ്റവും പിന്‍നിരയില്‍ ഇരിക്കാന്‍ ആവശ്യപ്പെടാറുണ്ടെന്നും സ്ത്രീകളേപ്പോലെ വസ്ത്രം ധരിക്കരുതെന്ന് മറ്റുള്ളവര്‍ പറയാറുണ്ടെന്നും ഇവര്‍ പറയുന്നു. പള്ളികളില്‍ സ്ത്രീകള്‍ക്കും പുരുഷന്മാര്‍ക്കുമുള്ള ഇടം പ്രത്യേകം തിരിച്ചിരിക്കും. പുരുഷന്മാരുടെ അടുത്തിരിക്കാന്‍ പറഞ്ഞ് സ്ത്രീകളും സ്ത്രീകളുടെ കൂടെ ഇരിക്കാന്‍ പറഞ്ഞ് പുരുഷന്മാരും തന്നെ ഒഴിവാക്കാറുണ്ടെന്ന് ട്രാന്‍സ്‌ജെന്‍ഡറാ? അര്‍സു പറഞ്ഞു. ‘ഇത് എനിക്ക് തന്നെ വലിയ സംശയമാണ്.’ അവര്‍ പറഞ്ഞു.
പള്ളികളില്‍ പാട്ടുകള്‍ പാടാനും ബൈബിള്‍ വായിക്കാനുമെല്ലാം ഇഷ്ടമാണെങ്കിലും തങ്ങളെ ഇതൊന്നും അനുവദിക്കാറില്ലെന്ന് അര്‍സു പറഞ്ഞു. തങ്ങള്‍ ഇതിനായി മുന്നിലേയ്ക്ക് എത്തിയാലും ഞങ്ങള്‍ പാട്ടുപാടിയാല്‍ വലിയ പ്രശ്‌നമായാണ് മറ്റുള്ളവര്‍ കാണുന്നതെന്നും അവര്‍ പറഞ്ഞു. എന്തിനാണ് ഇങ്ങനെ മറ്റുള്ളവര്‍ക്ക് തോന്നുന്നതെന്ന് അറിയില്ലെന്നും ഞങ്ങളുടെ രക്ഷിതാക്കള്‍ക്ക് മനുഷ്യരായി തന്നെയാണ് തങ്ങള്‍ ജനിച്ചതെന്നും ഇവര്‍ പറയുന്നു. ‘ദൈവം അവരെ സൃഷ്ടിച്ചതു പോലെ തന്നെയാണ് ഞങ്ങളെയും സൃഷ്ടിച്ചത്.’ അവര്‍ പറഞ്ഞു. എന്നാല്‍ പുതുതായി രൂപീകരിച്ച സഭയില്‍ എല്ലാത്തിന്റെയും മുന്‍നിരയില്‍ ട്രാന്‍സ്‌ജെന്‍ഡറുകളാണ്. സഭയിലെ പാസ്റ്ററായ ഷഫീക്കിന്റെ വീടിനോടു ചേര്‍ന്നാണ് പള്ളി സ്ഥാപിച്ചിരിക്കുന്നത്. സിമന്റിട്ട തറയില്‍ പല നിറങ്ങളുള്ള കാര്‍പ്പറ്റിട്ട് മനോഹരമാക്കിയിരിക്കുന്നു. ഇരിക്കാന്‍ പ്ലാസ്റ്റിക് കസേരകളുമുണ്ട്.
കറാച്ചിയിലെ കത്തീഡ്രല്‍ പള്ളിയോടു തൊട്ടുചേര്‍ന്നു തന്നെയാണ് പുതിയ സഭയുടെ ആസ്ഥാനവും. ‘ദ ഫസ്റ്റ് ചര്‍ച്ച് ഫോര്‍ യൂനക്ക്‌സ്’ എന്ന് വലിയ ഇംഗ്ലീഷ് അക്ഷരങ്ങളില്‍ എഴുതിയിട്ടുണ്ട്. കൂടാതെ പാക് ട്രാന്‍സ്‌ജെന്‍ഡറുകള്‍ സ്വയം വിശേഷിപ്പിക്കുന്ന ‘ഖ്വാജാ സിറാ’ എന്ന പേരും ബോര്‍ഡില്‍ രേഖപ്പെടുത്തിയിട്ടുണ്ട്. സഭയുടെ സഹസ്ഥാപകയായ ഗസാല ഷഫീക് പാകിസ്ഥാനിലെ അപൂര്‍വം ചില വനിതാ പാസ്റ്റര്‍മാരില്‍ ഒരാളും കൂടിയാണ്. രാജ്യത്തെ ഒരേയൊരു ട്രാന്‍സിജെന്‍ഡര്‍ അഭിഭാഷകയും മുസ്ലീം മതസ്ഥയുമായ നീഷ റാവുവും പുതിയ സഭയ്ക്ക് പിന്തുണയുമായി എത്തിയിട്ടുണ്ട്. എല്ലാ ആഴ്ചകളിലും നടക്കുന്ന സര്‍വീസുകളില്‍ പങ്കെടുക്കാന്‍ എത്തുമെന്നും നീഷ റാവു അറിയിച്ചിട്ടുണ്ട്. താനൊരു മുസ്ലീമാണെങ്കിലും ക്രിസ്ത്യന്‍ ട്രാന്‍സ്‌ജെന്‍ഡര്‍മാരുടെ വേദനയറിയാമെന്നാണ് ഇവര്‍ പറയുന്നത്.
ആംഗ്ലിക്കന്‍, മെത്തഡിസ്റ്റ്, റിഫോം ചര്‍ച്ചുകളുടെ കീഴിലുള്ള ചര്‍ച്ച് ഓഫ് പാകിസ്ഥാന്‍ അംഗമാണ് സഭയിലെ മുതിര്‍ന്ന പാസ്റ്ററായ ഗസാല ഷഫീക്. എന്നാല്‍ തന്റെ പുതിയ സഭയ്ക്ക് അംഗീകാരം നേടാന്‍ ഗസാലയ്ക്ക് ആയിട്ടില്ല. ‘ദൈവശാസ്ത്രപരമായ’ പ്രശ്‌നങ്ങളാണ് അവര്‍ ചൂണ്ടിക്കാണിക്കുന്നതെന്നാണ് ഗസാല പറയുന്നത്. എന്നാല്‍ പ്രശ്‌നങ്ങളെന്താണെന്ന് അറിയട്ടെയെന്നാണ് ഗസാലയുടെ നിലപാട്. ട്രാന്‍സ്‌ജെന്‍ഡറുകല്‍ സമൂഹത്തിന്റെ പിന്നിലേയ്ക്ക് മാറണമെന്ന സഭാനേതൃത്വത്തിന്റെ നിലപാട് സ്വീകരിക്കാന്‍ ഗസാല തയ്യാറല്ല. ട്രാന്‍സ്‌ജെന്‍ഡറുകള്‍ ശുദ്ധരല്ലെന്ന നിലപാട് സ്വീകരിക്കാന്‍ ഇവര്‍ തയ്യാറല്ല.
ലൈംഗിക ന്യൂനപക്ഷങ്ങളെന്ന നിലയില്‍ മികച്ച പരിഗണന നേടാന്‍ പുതിയ നീക്കം സഹായിക്കുമെന്നാണ് ഇവരുടെ വിശ്വാസം. മുന്‍പ് ട്രാന്‍സ്‌ജെന്‍ഡറുകളെ മൂന്നാം ലിംഗമെന്ന വിഭാഗമാക്കി പാക് ഭരണഘടന അംഗീകരിച്ചത് രാജ്യത്തെ ട്രാന്‍സ് സമൂഹത്തിന് വലിയ നേട്ടമായിരുന്നു. ഇതോടെയാണ് പലര്‍ക്കും ഐഡി കാര്‍ഡെങ്കിലും ലഭ്യമായത്. പലപ്പോഴും കുടുംബങ്ങളില്‍ നിന്ന് ഇറക്കി വിടുന്ന ട്രാന്‍സ്‌ജെന്‍ഡറുകള്‍ യാഥാസ്ഥിതിക രാജ്യമായ പാകിസ്ഥാനില്‍ കടുത്ത അടിച്ചമര്‍ത്തലാണ് നേരിടുന്നത്. ഇവരുടെ പേരിനൊപ്പം കുടുംബപ്പേര് വരാതിരിക്കാനായി പലപ്പോഴും വീട്ടുകാര്‍ ജനനസര്‍ട്ടിഫിക്കറ്റ് പോലും ഇവര്‍ക്ക് നല്‍കാറില്ല. ഇതുമൂലം ഡ്രൈവിങ് ലൈസന്‍സ് പോലുള്ള അവശ്യരേഖകള്‍ നേടാനും ഇവര്‍ക്ക് കഴിയാറില്ല. ഈ സാഹചര്യത്തിലാണ് പുതിയ സഭ സ്ഥാപിക്കപ്പെടുന്നത്.

Related Articles

Back to top button