LATESTNATIONAL

ലോണ്‍ തീര്‍ക്കണോ? ബെഡ്‌റൂമിലേക്ക് ചെല്ലണമത്രേ; യുവതിയുടെ പരാതിയില്‍ അനങ്ങാതെ പൊലീസ്

ബെംഗളുരു: ലോക്ക് ഡൗണിനു മുമ്പ് നാലായിരം രൂപ വീതം ആപ്പുകളില്‍ നിന്നും ലോണെടുക്കുമ്പോള്‍ ഭീമാ നഗറില്‍ താമസിക്കുന്ന ബ്യൂട്ടീഷന്‍ തനിക്ക് ഇതുപോലൊരു അനുഭവം ഉണ്ടാകുമെന്ന് ഒരിക്കല്‍ പോലും ചിന്തിച്ചിട്ടുണ്ടാകില്ല. ആശുപത്രി ആവശ്യങ്ങള്‍ക്കായാണ് ലോണെടുത്തത്. മാര്‍ച്ച് മാസത്തെ ശമ്പളം ലഭിച്ച ശേഷം ലോണ്‍ തിരിച്ചടയ്ക്കാമെന്നായിരുന്നു യുവതിയുടെ പ്രതീക്ഷ. എന്നാല്‍ അതിനെയെല്ലാം തകിടംമറിച്ചുകൊണ്ടാണ് ലോക്ക് ഡൗണ്‍ പ്രഖ്യാപിച്ചതും യുവതിക്ക് ജോലി നഷ്ടപ്പെടുന്നതും.
‘ലോണ്‍ തിരിച്ചടവ് മുടങ്ങിയതിനെത്തുടര്‍ന്ന് റിക്കവറി ഏജന്റുമാര്‍ തന്നെ നിരന്തരം വിളിച്ചുകൊണ്ടിരിക്കുകയാണ്. രണ്ട് ദിവസം അവര്‍ക്കൊപ്പം കിടക്ക പങ്കിട്ടാല്‍ ലോണ്‍ ക്യാന്‍സല്‍ ചെയ്യാമെന്നാണ് അവര്‍ പറയുന്നത്. രാത്രിയും പകലും വിളിച്ച് ഏജന്റുമാര്‍ ഭീഷണിപ്പെടുത്തുകയാണ്.’ ഇതിനെതിരെ ജീവന്‍ ഭീമാനഗര്‍ പോലീസ് സ്റ്റേഷനില്‍ പരാതി നല്‍കിയെങ്കിലും ഫലമില്ലെന്നാണ് യുവതിയുടെ പരാതി.
‘ലോണ്‍ തിരിച്ചടയ്ക്കാന്‍ 15 ദിവസമാണ് നല്‍കിയിരുന്നത്. ജോലി നഷ്ടപ്പെട്ടതോടെ അതിനു കഴിയാതെ വന്നു. കുറച്ച് ദിവസംകൂടി തരുമോയെന്ന് ഞാന്‍ ചോദിച്ചു. എന്നാല്‍ അവര്‍ പലിശ ഈടാക്കുകയാണ് ചെയ്തത്. ഏപ്രില്‍ അവസാനമായപ്പോഴേക്കും ഓരോ ആപ്ലിക്കേഷനിലും പലിശയടക്കം 8,000 രൂപയായി മാറി.’
‘തന്റെ ഫോണില്‍ സേവ് ചെയ്തിരിക്കുന്ന കോണ്ടാക്ടുകളില്‍ വിളിച്ച് ലോണ്‍ തിരികെ അടയ്ക്കാനുള്ള വിവരം അറിയിക്കുമെന്നും ഏജന്റുമാര്‍ ഭീഷണിപ്പെടുത്തി. ആദ്യം വിശ്വസിച്ചില്ലെങ്കിലും തുടര്‍ന്ന് അവര്‍ തന്റെ ഫോണിലെ കോണ്ടാക്ട് ലിസ്റ്റിന്റെ സ്‌ക്രീന്‍ഷോട്ട് ഏജന്റുമാര്‍ തനിക്ക് അയച്ചുവെന്നും യുവതി പറയുന്നു. ഇതോടെ കുറച്ച് പണം സംഘടിപ്പിച്ച താന്‍ ലോണിന്റെ കുറച്ചുഭാഗം തിരികെ അടച്ചു. ശേഷിക്കുന്ന 3,000 രൂപ തിരികെ അടയ്ക്കാന്‍ ആവശ്യപ്പെട്ട് അവര്‍ വിളിച്ചു. തിരികെ അടയ്ക്കാന്‍ ഉദ്ദേശിക്കുന്നില്ലെങ്കില്‍ രണ്ട് രാത്രികള്‍ അവര്‍ക്കൊപ്പം പങ്കിടണമെന്നും അങ്ങനെ ചെയ്താല്‍ ലോണ്‍ അവര്‍ ക്ലിയര്‍ ചെയ്യാമെന്നും പറഞ്ഞു.’ രാത്രികാലങ്ങളില്‍ വിളിച്ച് ഏജന്റുമാര്‍ മോശം ഭാഷയില്‍ സംസാരിക്കുകയാണെന്ന് യുവതി പരാതിപ്പെട്ടു.
‘പോലീസില്‍ ഇക്കാര്യങ്ങള്‍ ചൂണ്ടിക്കാട്ടി പരാതി നല്‍കിയിരുന്നു. താന്‍ കൊടുത്ത നമ്പറുകളിലേക്ക് പോലീസ് തിരികെ വിളിച്ചു. എന്നാല്‍ കോള്‍ കണക്ട് ചെയ്യുന്നുണ്ടായിരുന്നില്ല.’ നടപടിയെടുക്കാമെന്ന് പോലീസ് പറഞ്ഞെങ്കിലും പിന്നീട് നടപടി ഉണ്ടായില്ലെന്നാണ് യുവതി പറയുന്നത്, ബാഗ്ലൂര്‍ മിറര്‍ റിപ്പോര്‍ട്ട് ചെയ്തു.

Related Articles

Back to top button