ന്യൂഡല്‍ഹി: അപകടകരമായ രീതിയില്‍ വാഹമോടിച്ചുവന്നയാളെ തടയാന്‍ ശ്രമിച്ച ട്രാഫിക് പോലീസ് കോണ്‍സ്റ്റബിളിനെയും ബോണറ്റില്‍ വലിച്ചിഴച്ച് മുന്നോട്ടുകുതിക്കുന്ന കാറിന്റെ സിസിടിവി ദൃശ്യങ്ങള്‍ സോഷ്യല്‍ മീഡിയയില്‍ പ്രചരിക്കുന്നു. സൗത്ത് വെസ്റ്റ് ഡല്‍ഹിയിലെ കന്റോണ്‍മെന്റ് മേഖലയിലാണ് തിങ്കളാഴ്ച വൈകീട്ടാണ് സംഭവം.
തിങ്കളാഴ്ച വൈകീട്ട് 5.10നാണ് ഫാന്‍സി നമ്പര്‍ പ്ലേറ്റുളള ഒരു കാര്‍ അപകടകരമായ രീതിയില്‍ റോഡിലൂടെ ഓടിച്ചുവരുന്നത് പോലീസിന്റെ ശ്രദ്ധയില്‍ പെട്ടത്. പോലീസ് ഉടനെ ഡ്രൈവര്‍ക്ക് വാഹനം നിര്‍ത്താനുളള നിഗ്‌നല്‍ നല്‍കി. നിര്‍ത്താനെന്ന രീതിയില്‍ വേഗത കുറച്ച വാഹനം അപ്രതീക്ഷിതമായി മുന്നോട്ടെടുക്കുകയായിരുന്നു. ഇതുതടയാനായി കാറിന് മുന്നിലേക്ക് വന്ന പോലീസ് കോണ്‍സ്റ്റബിള്‍ ബോണറ്റിന്റെ മുകളിലേക്ക് വീണു.
എന്നാല്‍ കാര്‍ നിറുത്തുന്നതിനുപകരം പോലീസ് ഉദ്യോഗസ്ഥനേയും വഹിച്ച് മുന്നോട്ടുനീങ്ങുകയാണ് ചെയ്തത്. കാര്‍ വേഗതയില്‍ മുന്നോട്ടുകുതിച്ചതോടെ കോണ്‍സ്റ്റബിള്‍ വൈപ്പറില്‍ പിടിച്ച് തൂങ്ങിക്കിടക്കാന്‍ ശ്രമിച്ചു. ഇതോടെ കാര്‍ ഇടത്തേക്കും വലത്തേക്കും വെട്ടിച്ച് പോലീസുകാരനെ ബോണറ്റില്‍ നിന്ന് താഴേക്ക് വീഴ്ത്താനായി ഡ്രൈവറുടെ ശ്രമം. ഒടുവില്‍ 400 മീറ്ററോളം പോയ ശേഷം ബോണറ്റില്‍ നിന്ന് കോണ്‍സ്റ്റബിള്‍ റോഡിലേക്ക് വീഴുകയായിരുന്നു. കാര്‍ ഓടിച്ച ശുഭം കുമാര്‍ രക്ഷപ്പെടാന്‍ ശ്രമിച്ചെങ്കിലുംജനങ്ങളും പോലീസും ചേര്‍ന്ന് ഇയാളെ പിന്തുടര്‍ന്ന് പിടികൂടി. കോണ്‍സ്റ്റബിള്‍ മഹിപാല്‍ യാദവിന്റെ പരാതിയുടെ അടിസ്ഥാനത്തില്‍ ഇയാള്‍ക്കെതിരെ എഫ്.ഐ.ആര്‍. രജിസ്റ്റര്‍ ചെയ്തിട്ടുണ്ട്. ഇന്ത്യന്‍ ശിക്ഷാനിയമത്തിലെ 186,353, 279 വകുപ്പുകളാണ് ഇയാള്‍ക്കെതിരെ ചുമത്തിയിരിക്കുന്നത്.
39 1 minute read
