കാഞ്ഞങ്ങാട്: ‘മാര്‍ക്‌സിസ്റ്റ് പാര്‍ട്ടിയുടെ ബ്രാഞ്ച് സെക്രട്ടറി പറഞ്ഞു, ഈ കേസ് പിന്‍വലിക്കണമെന്ന്. അതിന് തയ്യാറാകാത്തതിനാല്‍ കൂലിപ്പണിപോലും തരാന്‍ സമ്മതിക്കുന്നില്ല’- അതിജീവിതയുടെ അമ്മ ഹൊസ്ദുര്‍ഗ് പോക്സോ അതിവേഗ പ്രത്യേക കോടതിയില്‍ പൊട്ടിക്കരഞ്ഞ് പറഞ്ഞു. സാറെ, എനിക്കൊരു കാര്യം പറയാനുണ്ട്, ഞാനതു പറഞ്ഞോട്ടെയെന്ന് ചോദിച്ച ഇവര്‍ക്ക് ജഡ്ജി പി.എം. സുരേഷ് അതിനുള്ള അനുമതി നല്‍കി. വിതുമ്പലോടെ തുടങ്ങിയ ഇവര്‍ പൊട്ടിക്കരയുകയായിരുന്നു. ബ്രാഞ്ചും സെക്രട്ടറിയുടെ പേരും അമ്മ പറഞ്ഞിട്ടുണ്ട്. മൊഴി രേഖപ്പെടുത്തിയ ജഡ്ജി, അടുത്ത ദിവസം ബേഡകം ഇന്‍സ്പെക്ടറോട് കോടതിയില്‍ ഹാജരകാന്‍ നിര്‍ദേശിച്ചു. ബേഡകം പോലീസ് സ്റ്റേഷന്‍ പരിധിയില്‍ കഴിഞ്ഞ വര്‍ഷം നടന്ന പീഡനക്കേസിന്റെ വിചാരണവേളയിലാണ് കോടതിയില്‍ നാടകീയസംഭവം അരങ്ങേറിയത്. വിസ്തരിക്കാനായി കൂട്ടില്‍ കയറ്റിനിര്‍ത്തിയപ്പോഴാണ് അതിജീവിതയുടെ അമ്മ ന്യായാധിപനു മുന്നില്‍ സങ്കടംപറഞ്ഞത്.
14 പേര്‍ പ്രതികളായ കേസാണിത്. 16-കാരിയാണ് പീഡനത്തിനിരയായത്. വയറുവേദനയെ തുടര്‍ന്ന് ആസ്പത്രിയിലെത്തിയപ്പോഴാണ് കുട്ടി പീഡനത്തിനിരയായ വിവരം പുറത്തറിയുന്നത്. തുടര്‍ന്ന് ചൈല്‍ഡ്ലൈന്‍ അധികൃതര്‍ പോലീസില്‍ അറിയിക്കുകയായിരുന്നു. വെവ്വേറെ സമയങ്ങളില്‍ പീഡനം നടന്നുവെന്നാണ് കേസ്. 14 കേസുകളായാണ് രജിസ്റ്റര്‍ ചെയ്തിരുന്നത്.
ഇതിലൊരു കേസിന്റെ വിചാരണയാണിപ്പോള്‍ നടക്കുന്നത്. കേസ് പിന്‍വലിക്കണമെന്ന് ബ്രാഞ്ച് സെക്രട്ടറി ആവശ്യപ്പെട്ടുവെന്നാണ് അതിജീവിതയുടെ അമ്മ വെളിപ്പെടുത്തിയിരിക്കുന്നത്.
